បច្ចុប្បន្នទីផ្សាររថយន្តអគ្គីសនីកំពុងមានប្រជាប្រិយភាពខ្លាំងឡើង ហើយក៏មានក្រុមហ៊ុនផលិតរថយន្តនៅជុំវិញពិភពលោកបានហក់ចូលប្រឡុកក្នុងអាជីវកម្មរថយន្តមួយនេះផងដែរ។ ងាក់មកក្រុមហ៊ុនផលិតរថយន្តដែលមានឈ្មោះបោះសំឡេងក្នុងទីផ្សាររថយន្តរបស់ប្រទេសចិន BYD ឬ Built Your Dreams បានត្រៀមប្រកាសចេញរថយន្តអគ្គិសនីម៉ូដែលថ្មីរបស់ខ្លួននៅថ្ងៃទី 09 ខែធ្នូ ឆ្នាំ 2022 ត្រូវនឹងសប្តាហ៍ក្រោយនេះ។
រថយន្តអគ្គីសនីម៉ូដែលថ្មីរបស់ BYD ដែលត្រៀមបង្ហាញខ្លួននៅពេលខាងមុខនេះមានឈ្មោះថា BYD Corvette 07 ដែលមាននឹងមានចំនួនរហូតដល់ 6 ជម្រើសម៉ូដែល ជាមួយការបំពាក់អាគុយអគ្គិសនីបីទំហំផ្សេងគ្នា ហើយនិងមានតម្លៃចាប់ពីខ្ទង់ $320,00 ដល់ $40,750។ ចំពោះផ្នែកឌីស្សាញបាដាខាងមុខរបស់រថយន្តអគ្គិសនី BYD SUV ម៉ូដែលថ្មីនេះ ត្រូវបានគេដឹងថា រចនាឡើងជាមួយក្រឡាសំណាញ់ wide six-bar grille រំលេចដោយស្លាកសញ្ញា BYD ប្រភេទ Luminous នៅចំកណ្តាល។
BYD Corvette 07 គឺជាប្រភេទរថយន្ត PHEV មានជម្រើសពីរស៊េរី គឺ DM-I និង DM-p ហើយទាំងពីរម៉ូដែលមានបំពាក់មកជាមួយម៉ាស៊ីនសាំងចំនុះ 1.5L Turbo ជាមួយអាគុយអគ្គិសនីកំលាំង 102kW។ ចំពោះម៉ូដែល SUV ថ្មីរបស់ BYD ត្រូវបានគេរំពឹងថានឹងមានបំពាក់មកជាមួយអាគុយអគ្គិសនីទំហំ 18.3kWh និង 36.8kWh ជាមួយលទ្ធភាពបើកបរបានចំងាយផ្លូវ 100 គីឡូម៉ែត្រ និង 205 គីឡូម៉ែត្រ។ គ្រប់ម៉ូដែលស៊េរីថ្មីទាំងអស់នេះអាចជាន់វ៉ាត់ទ្រនិចកុងទ័យពី 0 ទៅ 100 គីឡូម៉ែត្រចំនាយពេល 8.5 វិនាទី, 8.9 វិនាទី និងស្ទុះបំផុតដល់ 4.7 វិនាទី។ សម្រាប់រថយន្តម៉ូដែលថ្មីរបស់ BYD ដែលខ្លាំងជាងគេបំផុតអាចបើកបរបានចំងាយផ្លូវដល់ 1,200 គីឡូម៉ែត្រឯណោះ ហើយ SUV ម៉ូដែលថ្មីនេះ ក៏នឹងគាំទ្របច្ចេកវិទ្យាសាកថ្មល្បឿនលឿនកំលាំង 75kW ផងដែរ។
BYD Corvette 07 DM-I គឺប្រើប្រាស់ម៉ូទ័រអគ្គិសមួយសម្រាប់បង្វិលកង់ខាងមុខដែលអាចបង្កើនកំលាំងទាញបាន 197hp។ ដោយឡែកសម្រាប់ម៉ូដែល Corvette 07 DM-p បានបំពាក់ម៉ាស៊ីនសាំងចំនុះ 1.5L ជាមួយការបំពាក់ម៉ូទ័រអគ្គិសនីចំនួន 2 សម្រាប់ទាញកងទាំងខាងមុខ និងខាងក្រោយ ដោយអាចបង្កើនថាមពលបាន 295kW និងមានកំលាំងរមូល 656Nm។ BYD Corvette 07 គឺជាម៉ូដែលដំបូងរបស់ក្រុមហ៊ុនដែលគាំទ្រជាមួយបច្ចេកវិទ្យាសោរសុវត្ថិភាព NFC Digital key របស់ Apple បន្ថែមពីលើការប្រើប្រាស់ឧបករណ៍ Android ដោយអនុញ្ញាតិឲ្យម្ចាស់រថយន្តអាចប្រើទូរស័ព្ទ iPhone និង Apple Watch ដើម្បីចាក់ និងបើកសោររថយន្តទៀតផង៕
