Denza គឺជាម៉ាកយីហោរថយន្តអគ្គិសនីមួយក្នុងចំនោមម៉ាកយីជាច្រើនទៀតរបស់ក្រុមហ៊ុន BYD (Build Your Dreams) ។ នៅពេលថ្មីៗនេះ Denza បានប្រកាសពីគម្រោងក្នុងការប្រកាសចេញលក់រថយន្តអគ្គិសនីស៊េរីថ្មីម៉ាក N7 របស់ខ្លួននៅក្នុងទីផ្សារប្រទេសចិន។ បើតាមការបញ្ជាក់ពី Denza រថយន្តអគ្គិសនីស៊េរីថ្មីឆ្នាំ 2024 N7 របស់ខ្លួននឹងមានចេញលក់នៅលើទូទាំងទីផ្សារក្នុងទីក្រុងធំៗចំនួន 70 នៅក្នុងប្រទេសចិន នៅថ្ងៃទី 01 ខែមេសា ឆ្នាំ 2024 ឆាប់ៗនេះ។
Danza N7 នឹងចេញលក់ជាមួយជម្រើសពីម៉ូដែល គឺម៉ូដែលកម្រិតមធ្យម Entry-Level និងម៉ូដែលកម្រិតខ្ពស់ High-End Model ដោយនឹងមានតម្លៃចាប់ពីខ្ទង់ $42,000 ទៅដល់ $53,000។ Denza N7 ត្រូវបានរចនាបន្ថែមពីជម្រើសពណ៌ខៀវថ្មីហៅថា “Xizi Blue” ដែលមានពណ៌ភ្លឺរលោងឆ្លុះ ហើយផ្នែកខាងមុខត្រូវបានរចនាឡើងថ្មីខុសពីស៊េរីមុនដែលមើលទៅកាន់តែមានភាពស្រស់ស្អាតប្រណិត ជាមួយរបាំងការពារភក់រចនាឡើងពីដែកក្រុមពិសេស។ ចំនែកផ្នែកខាងក្រោយមានការឌីស្សាញជាមួយភ្លើង LED ភ្លឺច្បាស់កាត់ពីម្ខាងទៅម្ខាងយ៉ាងប្រណិតជាមួយនិមិត្តសញ្ញាអក្សរ EV AWD នៅខាងស្តាំ។ និយាយរួមទៅការឌីស្សាញរបស់ Denza N7 2024 គឺមានភាពប្រណិតទាន់សម័យ ប្រកបដោយភាពរឹងមាំ។
រថយន្ត Mid-Size SUV EV មួយនេះមានបណ្តោយតួខ្លួន 4,860mm X ទទឹងខ្លួន 1,935mm X កម្ពស់ 1,602 mm ហើយនិងគម្លាតចន្លោះកង់មុខទៅកង់ក្រោយ 2,940 mm និងដំបូលរថយន្តត្រូវបានរចនាឡើងដោយយអាចបើកបានជាមួយទំហំ 1.93㎡ sunroof។ នៅផ្នែកខាងក្នុងមានឌីស្សាញបែប Two-tone Color ដោយមានពណ៌បែបប្រផេះជាមួយពណ៌សក្បុស ដោយនៅផ្នែកកណ្តាលនៃ Dashboard មានអេក្រង់កម្សាន្តទំហំ 17.3-inch, អេក្រង់ខាងក្រោយចង្កូតទំហំ 10.25-inch Full-LCD Instrument Panel, អេក្រង់ Co-pilot ទំហំ 10.25-inch រួមនឹងប្រព័ន្ធបច្ចេកវិទ្យាបាញ់លើអេក្រង់ខាងមុខ AR-HUD ដែលអាចបញ្ចាំងបានច្បាស់ក្នុងទំហំ 50-inch។
ជាមួយគ្នានេះ Denza ក៏បានធ្វើការបង្កើនសមត្ថភាពជាមួយប្រព័ន្ធ DiLink smart car system ជំនាន់ចុងក្រោយដែលអនុញ្ញាតិឲ្យរថយន្តស៊េរីថ្មីនេះអាចគាំទ្រមុខងារបញ្ជាដោយសំឡេង voice recognition, មុខងារចំណាំផ្ទៃមុខ facial recognition, ប្រព័ន្ធសេវា 5G network, មុខងារ in-car karaoke, និងមុខងារបញ្ជារថយន្តតាមរយះកម្មវិធីទូរស័ព្ទដៃ mobile app remote control រួមទាំងមុខងារប្រើប្រាស់ថ្មីៗទំនើបៗចុងក្រោយជាច្រើនទៀត។ Denza N7 2024 បំពាក់នូវកញ្ចក់មើលក្រោយប្រភេទ rearview mirror ជាមួយកាមេរ៉ាក្រោយទំហំ 2MP ភ្ជាប់នូវក្រោមកន្ទុយ Spoiler ហើយនៅចន្លោះកៅអីអ្នកបើក និងអ្នករួមដំណើរមានប្រព័ន្ធបច្ចេកវិទ្យាសាកភ្លើងស្មាតហ្វូនឥតខ្សែកំលាំង 50W Wireless Charging Pad ចំនួនពីរ។
ហើយសម្រាប់អេក្រង់ Co-pilot ទំហំ 10.25-inch គឺគាំទ្រមុខងារកំនត់សំខាន់ៗចំនួន 8 ដូចជាមុខងារកំដៅ heating, ខ្យល់កៅអី ventilation, មុខងារម៉ាស្សា massage functions, និងមុខងារសំរាកជើង leg rest ជាមួយកម្រិតសីតុណ្ហភាពពី 0 – 70 degrees rangeជាដើម។ ចំនែកអ្នករួមដំណើរខាងក្រោយ ក៏អាចធ្វើការកំនត់មុខងារផ្ទាល់ខ្លួនជាមួយអេក្រង់នៅកណ្តាលដែលគាំទ្រជាមួយមុខងារថ្មីៗដូចជា electric backrest angle adjustment, ventilation, និង massage។ Denza N7 2024 មានពីរជម្រើស គឺជម្រើសប្រើម៉ូទ័រអគ្គិសនីមួយ (Single-motor rear-wheel drive) និងម៉ូទ័រពីរ ( dual-motor four-wheel drive) ជាមួយគ្នានេះ ក៏មានជម្រើសម៉ូដែល Entry-level ផងដែរ ដោយម៉ូដែលនេះត្រូវបានស្ថាប័ន MIIT ក្នុងប្រទេសចិនបានបញ្ជាក់ថា គឺប្រើប្រាស់ម៉ូទ័រអគ្គិសនីស៊េរី TZ200XYS កំលាំង 170kWh និងអាចជាន់ល្បឿនលឿនបំផុត (Top-speed) បានដល់ 210km/h។
ដោយឡែកសម្រាប់ម៉ូដែលប្រើម៉ូទ័រអគ្គិសនីមួយអាចផលិតថាមពលកំលាំង 230kW និងប្រព័ន្ធរមូលបាន 360Nm និងអាចជាន់ស្ទុះពី 0 ទៅ 100km/h ប្រើពេលខ្ទង់ 6.8 វិនាទី ហើយនិងមានភ្ជាប់ដោយកញ្ចប់អាគុយទំហំ 91.3kWh ប្រភេទ Blade Battery ដោយការសាកភ្លើងមួយពេញម្តងអាចបើកបានចំងាយផ្លូវ 702km នេះបើតាមការបញ្ជាក់ពីស្ថាប័ន CLTC។ ចំនែកម៉ូដែល Denza N7 ដែលប្រើម៉ូទ័រអគ្គិសនីពីរវិញ គឺមានភ្ជាប់នូវម៉ូទ័រខាងក្រោយទំហំ 230kW និងម៉ូទ័រខាងមុខទំហំ 160kW អាចជាន់ស្ទុះពី 0 ទៅ 100km/h ប្រើពេលខ្ទង់ 3.9 វិនាទី។ ហើយម៉ូដែលនេះប្រើកញ្ចប់អាគុយទំហំ 91.3kWh និងអាចបើកបរបានចំងាយផ្លូវ 630km នៅពេលសាកថ្មមួយពេញម្តង។ រថយន្តអគ្គិសនីថ្មី Denza N7 2024 គាំទ្រថាមពលសាកភ្លើងអតិបរមាកំលាំង 230kW៕
