ក្រុមហ៊ុនរថយន្តម៉ាក Mazda ប្រចាំប្រទេសថៃបានធ្វើការប្រកាសចេញលក់រថយន្ត Pick Up ស៊េរីថ្មីរបស់ខ្លួនម៉ូដែល Mazda BT-50 Facelift ជាផ្លូវការណ៍ជាមួយជម្រើសម៉ូដែល (Option) រហូតដល់ទៅ 7-Option ជាមួយតម្លៃចាប់ពីខ្ទង់ 752,000 បាត ដល់ទៅ 1,272,000 បាត (ជាង $20,635 ទៅ $34,904)។
រថយន្ត Mazda BT-50 ស៊េរីថ្មីនេះ ប្រើប្រាស់គ្រោងឆ្អឹងដូចគ្នាទៅនឹងរថយន្ត Isuzu D-Max ដែរ ជាមួយការប្រើប្រាស់ភាសារចនា Kodo design Language របស់ Mazda ផ្ទាល់។ នៅផ្នែកខាងមុខរបស់ BT-50 Facelift ថ្មីនេះមានការឌីស្សាញជាមួយផ្ទាំង Bumper ថ្មីលេចពណ៌ខ្មៅ ជាមួយប៉ាណារចនាជាបន្ទាត់អូសកាត់ស៊ីមេទ្រីគ្នាជាមួយនឹងចង្កៀងបំភ្លឺ និងមាននិមិត្តសញ្ញា Mazda នៅកណ្តាល។ សម្រាប់ម៉ូដែល Mazda BT-50 Facelift ដែលមាន Option ខ្ពស់ទំនើបជាងគេមានបំពាក់នូវយ៉ាន់កង់ប្រភេទដែកអាលុយមីញ៉ូមអាឡយទំហំ 18-inch។ បើតាមការបញ្ជាក់ពី Mazda Thailand រថយន្តស៊េរីថ្មី BT-50 Facelift ប្រៀបបាននឹងរថយន្ត SUV-Style Pickup ដោយសារតែមានការរចនាបញ្ចូលរវាងរថយន្ត SUVs និង Sedan។
Mazda BT-50 Facelift គឺជាគូប្រជែងទីផ្សារជាមួយនឹងម៉ូដែល Isuzu D-Max និង Toyota Hilux Revo ស៊េរីថ្មី។ ទៅលើកំលាំងម៉ាស៊ីនវិញ សម្រាប់ម៉ូដែលមធ្យមរបស់ Mazda BT-50 Facelift បំពាក់នូវម៉ាស៊ីនម៉ាស៊ូតចំនុះ 1.9-litre ជាប្រភេទ Bluepower turbodiesel engine របស់ក្រុមហ៊ុន Isuzu ដែលអាចផលិតកំលាំងបាន 150 សេះ និងកំលាំងរមូល 450Nm។ ចំនែកមួយជម្រើសទៀតបំពាក់ម៉ាស៊ីនចំនុះ 3-litre ប្រភេទ Turbodiesel engine ដែលអាចផលិតកំលាំងបាន 190 សេះ និងកំលាំងរមូល 450Nm។ ទាំងពីរជម្រើសម៉ាស៊ីន គឺបំពាក់នូវប្រព័ន្ធប្រអប់លេខ 6 វគ្គស្វ័យប្រវត្តិ (6-speed automatic gearbox) ឬលេខដៃ 6 វគ្គ (6-speed manual gearbox) ទៅតាមជម្រើសម៉ូដែល ដែលបានជ្រើសរើស។
សម្រាប់ម៉ូដែលបំពាក់ម៉ាស៊ីន 3-litre Turbodiesel engine ដំណើរការដោយប្រព័ន្ធបើកបរ 2WD ជំនូសឲ្យ 4WD។ លើកលែងតែម៉ូដែល top-speed double Cab ដែលដំណើរការដោយប្រព័ន្ធ 4WD ហើយម៉ូដែលនេះ ក៏មានបំពាក់នូវប្រព័ន្ធ Rough Terrain Mode system និងប្រព័ន្ធ rear electronic diff-lock system ផងដែរ។ ចំនែកការឌីស្សាញផ្នែកខាងក្នុង មានការឌីស្សាញដូចគ្នាទៅនឹង Isuzu D-Max ដែរ ដោយគ្រាន់តែបំពាក់ឡូហ្គោ Mazda ជំនូសឲ្យឡូហ្គោ Isuzu ប៉ុណ្ណោះ។ សម្រាប់ម៉ូដែល Entry-Level នៃ BT-50 Facelift មានបំពាក់អេក្រង់កម្សាន្តទំហំ 7-inch ដែលគាំទ្រមុខងារ Apple CarPlay និង Android Auto ចំនែលម៉ូដែល High-End Option បំពាក់អេក្រង់ថាច់ស្រ្គីនទំហំ 9-inch និងកៅអីស្បែកដែល Highlight ពីរពណ៌ គឺពណ៌ប្រផេះ និងពណ៌ខ្មៅ។ ចំនែកនៅខាងក្រោយចង្កូតមានអេក្រង់ពណ៌ប្រភេទ TFT ទំហំ 4.2-inch ជំនូសឲ្យទំហំ 7-inch នៅលើ Isuzu D-Max។
សម្រាប់ប្រព័ន្ធសុវត្ថិភាពវិញ Mazda BT-50 Facelift មានភ្ជាប់នូវប្រព័ន្ធ adaptive cruise control (ACC) ជាមួយមុខងារ stop & go, មុខងារផ្តល់សញ្ញាលើកញ្ចក់មើលក្រោយនៅពេលមានអ្នកវ៉ាជែង advanced blind spot monitoring (ABSM), មុខងារចរាចរ rear cross-traffic alert (RCTA), មុខងារចាប់ហ្វាំងស្វ័យប្រវត្តិពេលមានឧបសគ្គបន្ទាន់ autonomous emergency braking (AEB),និងមុខងាររក្សាគន្លងផ្លូវ lane departure warning (LDW), ប្រព័ន្ធ collision warning (FCW), pedal misapplication mitigation (PMM), និង auto high beam (AHB) ជាដើម៕
