iPhone 8 និង 8 Plus គឺជាទូរស័ព្ទជំនាន់ថ្មីរបស់ Apple ដែលទើបតែនឹងបានសម្ពោធជាផ្លូវការកាលពីពេលថ្មីៗនេះ ហើយក៏ត្រូវបានក្រុមហ៊ុន Apple ចាប់ផ្តើមបញ្ចេញលក់នៅក្នុងទីផ្សារនៃបណ្តាប្រទេសធំៗមួយចំនួនជាបណ្តើរៗហើយ។ ទូរស័ព្ទទាំងពីរនេះ គឺកំពុងតែមានការចាប់អារម្មណ៍យ៉ាងខ្លាំងពីសណាក់ប្រើប្រាស់ជាច្រើន។ យោងតាមការបញ្ជាក់តៗគ្នាពីសំណាក់អ្នកដែលតាមដានការវិវត្តនៃទូរស័ព្ទស៊េរីថ្មីទាំងពីរនេះ បានអោយដឹងថា មិនយូរទេ ទូរស័ព្ទ iPhone 8 និង 8 Plus ក៏អាចនឹងមានលក់ជាផ្លូវការនៅក្នុងប្រទេសកម្ពុជាយើងផងដែរ ដោយពួកគាត់ បានអះអាងថា នេះគឺដោយសារតែនៅពេលនេះ ក្រុមហ៊ុន Apple ក៏មានក្រុមហ៊ុនដៃគូរសហការជាផ្លូវការមួយនៅក្នុងប្រទេសកម្ពុជាដូចគ្នា។ ប្រភពដដែលនេះ បានបង្ហើបទៀតថា ទូរស័ព្ទ iPhone 8 និង 8 Plus អាចនឹងចាប់ផ្តើមដាក់អោយអតិថិជនអាចកម្ម៉ង់បាននាពេលដ៏ខ្លីខាងមុខនេះថែមទៀតផង។
ហេតុដូច្នេះ ប្រសិនបើព័តមានខាងលើនេះ គឺជាព័តមានពិតប្រាកដមែននោះ ប្រិយមិត្តទាំងអស់ ដែលកំពុងតែរង់ចាំការមកដល់របស់ទូរស័ព្ទ iPhone 8 និង 8 Plus ពិតជារីករាយជាក់ជាមិនខាន ពីព្រោះថា ពួកគាត់នឹងទទួលបាននូវអត្ថប្រយោជន៍ពីក្រុមហ៊ុន Apple ដែលធ្លាប់បានផ្តល់ជូនអតិថិជនរបស់ខ្លួននៅតាមបណ្តាប្រទេសធំៗមួយចំនួននាពេលកន្លងមកអញ្ចឹងដែរ។ ហើយទាក់ទងទៅនឹងព័តមានដ៏ថ្មីសន្លាងមួយនេះ អាចនិយាយបានថា នេះគឺជាការចាប់ផ្តើមថ្មីមួយទៀត របស់ក្រុមហ៊ុន Apple សំរាប់អតិថិជននៅប្រទេសកម្ពុជា ដែលកំពុងតែមានការគាំទ្រខ្លាំងទៅលើផលិផលរបស់ខ្លូន។
គួរបញ្ជាក់ថា iPhone 8 មានអេក្រង់ទំហំ 4.7 អ៊ីង ហើយសំរាប់ iPhone 8 Plus គឺមានទំហំ 5.5 អ៊ីង។ ទូរស័ព្ទទាំងពីរម៉ូដែលនេះ ត្រូវបានក្រុមហ៊ុនប្រើប្រាស់នូវកញ្ចក់នៅផ្ទៃខាងមុខ និងស្រោបដោយលោហៈអាលុយមីញ៉ូមនៅផ្នែកខាងក្រោយ។ iPhone 8 ប្រើប្រាស់កាមេរ៉ាមួយគ្រាប់មានទំហំ 12 មេហ្កាភិចសែល មានកែវលែនខ្នាត 28 មីលីមែត្រ និងមានកម្រិត Aperture f/1.8 ប្រើសែនស័រខ្នាត 1/3" sensor ភ្ជាប់នូវមុខងារទប់រំញ័រ OIS ទាំងការថតវីដេអូ និងថតរូបសន្លឹក ហើយនិងមានអំពូលភ្លើងជំនួយប្រភេទ Quad LED True Tone Flash មួយផដែរ។
សម្រាប់ iPhone 8 Plus វិញ គឺមានកាមេរ៉ាចំនួនពីរគ្រាប់ (Dual rear camera) ទំហំ 12 មេហ្កាភិចសែលដូចគ្នា ដោយមួយគ្រាប់ គឺជាប្រភេទ Wide Angle Lens មានកម្រិត Aperture f/1.8 និងមួយគ្រាប់ទៀតជាប្រភេទ Telephoto Lens មានកម្រិត Aperture f/2.8។ កាមេរ៉ាទូរស័ព្ទទាំងពីរនេះ អាចថតបានកម្រិត 4K@60fps និង 1080p@240fps។ អ្វីដែលកាន់តែពិសេសនោះ កាមេរ៉ាទាំងពីរនេះ ត្រូវបានក្រុមហ៊ុន ពង្រឹងទៅលើភាពច្បាស់ ហើយនិងអាចកាត់បន្ថយនូវ Noise បានថែមទៀតផង។ នៅលើទូរស័ព្ទ iPhone 8 និង iPhone 8 Plus ត្រូវបានក្រុមហ៊ុនបំពាក់នូវនូវបច្ចេកវិទ្យាសាកថ្ម Qi Wireless Charging និង Fast Charging ផងដែរ។
សូមជំរាបផងដែរថា ទាក់ទងទៅនឹង iPhone 8 និង 8 Plus អាចនឹងចាប់ផ្តើមដាក់អោយអតិថិជនកម្ពុជា អាចកម្ម៉ង់បានខាងលើនេះ គឺគ្រាន់តែជាព័តមានចរចាមអារ៉ាមមួយតែប៉ុណ្ណោះ ពីព្រោះថា រហូតមកដល់នេះ ក្រុមហ៊ុន Falcon Tech ដែលជាក្រុមហ៊ុនដៃគូររបស់ Apple នៅប្រទេសកម្ពុជា នៅមិនទាន់ផ្តល់សញ្ញាណាមួយថា ទូរស័ព្ទទាំងពីរនេះ នឹងមានលក់នៅពេលណាច្បាស់លាស់នៅឡើយនោះទេ។ ក្រុមការងាររបស់ ទស្សនាវដ្តី ពិភពអេឡិចត្រូនិក នឹងបន្តតាមដាន និងផ្តល់ជូននូវព័តមានជាក់បន្ថែមទៀតនាពេលឆាប់ៗនេះ។