នៅថ្ងៃនេះ ក្រុមហ៊ុន Smart Axiata មានសេចក្តីសោមនស្សរីករាយជាខ្លាំង និងសូមប្រកាសថា ទូរស័ព្ទ iPhone X ដែលគេកំពុងទន្ទឹងរង់ចាំជាខ្លាំងនោះ នឹងបើកទទួលការបញ្ជារទិញជាមុនបានហើយ ចាប់ពីថ្ងៃនេះតទៅ ជាមួយនឹងចំនួនមានកំណត់។ អតិថិជន ដែលបានធ្វើការកម្ម៉ង់ទុកជាមុន នឹងទទួលបានទូរស័ព្ទ iPhone X នៅថ្ងៃចេញលក់ជាផ្លូវការ គឺថ្ងៃទី 24 ខែវិច្ឆិកា ឆ្នាំ 2017 នៅទីតាំង Smart Shop មហាវិថីព្រះមុនីវង្ស។
ទូរស័ព្ទ iPhone X ត្រូវបានដាក់អោយបញ្ជាទិញជាមុន តាមរយៈអនឡាញពីថ្ងៃនេះ រហូតដល់ថ្ងៃទី 23 ខែវិច្ឆិកា ឆ្នាំ 2017 (ឬរហូតដល់អស់ពីស្តុក) ដែលក្នុងនោះ មានម៉ូដែល Space Grey និង Silver ជាមួយនឹងអង្គចងចាំ 64GB (លក់ក្នុងតម្លៃ 1228 ដុល្លារ) ឬក៏ អង្គចងចាំ 256GB (លក់ក្នុងតម្លៃ 1408 ដុល្លារ)។ បន្ថែមលើនេះ អតិថិជននឹងទទួលអត្ថប្រយោជន៍ពិសេស ពីក្រុមហ៊ុន Smart រួមមានៈ លេខទូរស័ព្ទពិសេស ដោយឥតគិតថ្លៃ ដែលមានតម្លៃស្មើនឹង 129 ដុល្លារ និងប្រើប្រាស់គម្រោង Smart ThomMorng រយៈពេល 12 ខែដោយឥតគិតថ្លៃ។ ការជាវទូស័ព្ទ iPhone X ពីក្រុមហ៊ុន Smart នឹងទទួលបានការធានាជាផ្លូវការរយៈពេល 1 ឆ្នាំ ពីក្រុមហ៊ុន Apple។ សូមចុចត្រង់នេះ សម្រាប់ការបញ្ជារទិញជាមុន ៖ https://pre-order.smart.com.kh
តាមប្រសាសន៍របស់នាយកប្រតិបត្តិក្រុមហ៊ុន Smart Axiata លោក ថូម៉ាស ហ៊ុន បានបញ្ជាក់ថា៖ “នៅក្នុងនាមជាប្រតិបត្តិករទូរស័ព្ទចល័តដែលជាដៃគូផ្ដាច់មុខរបស់ក្រុមហ៊ុន Apple ក្នុងព្រះរាជាណាចក្រកម្ពុជា ដូច្នេះ អ្នកនិយមប្រើប្រាស់ទូរស័ព្ទ iPhone ពីក្រុមហ៊ុន Smart នឹងអាចទទួលបានទូរស័ព្ទចល័តដែលគេទន្ទឹមរង់ចាំជាយូរមកហើយក្នុងពេលដ៏ឆាប់ខាងមុខនេះ ព្រមជាមួយនឹងកម្មវិធីបែបឌីជីថលដ៏សម្បូរបែប ក៏ដូចជាសេវាបច្ចេកវិទ្យា 4.5G របស់យើងខ្ញុំដែលបាននឹងកំពុងតែបន្តពង្រីកខ្លួនឥតឈប់ឈរ។ ដោយសារតែទូរស័ព្ទ iPhone X ថ្មីនេះ មានការពេញនិយមទូទាំងពិភពលោកយ៉ាងក្រៃលែង ដូច្នេះស្តុកដំបូងរបស់យើងខ្ញុំគឺមានចំនួនកំណត់។ សូមលោកអ្នករួសរាន់ធ្វើការបញ្ជាទិញជាមុនឲ្យបានឆាប់តាមតែអាចធ្វើបាន! អ្នកកក់មុន នឹងទទួលបានមុន!”