យោងតាមព័ត៌មានថ្មីនៅថ្ងៃនេះ បានបញ្ជាក់ថា ក្រុមហ៊ុន Asus បានត្រៀមខ្លួនក្នុងការរៀបចំបញ្ចេញនូវការអាប់ដេតប្រព័ន្ធប្រតិបត្តិការ Android 9 Pie សម្រាប់ស្មាតហ្វូនលេងហ្គេម Asus ROG Phone ដំបូងបំផុតរបស់ខ្លួនហើយ។ សូមជំរាបថា ស្មាតហ្វូននេះទើបតែបង្ហាញខ្លួននៅកម្ពុជាកាលពីពេលថ្មីៗនេះ ដោយដំណើរការនូវប្រព័ន្ធប្រតិបត្តិការ Android 8.1 Ore។
ថ្មីៗនេះ ស្មាតហ្វូនស៊េរីថ្មី Asus ROG Phone នេះ ក៏ត្រូវបានគេប្រទះឃើញនៅលើ Geekbench ផងដែរ ដោយនៅលើ Platform មួយនេះ ក៏មានការបង្ហាញនូវលទ្ធផលពិន្ទុនៃស្មាតហ្វូននេះផងដែរ នៅក្នុងនោះ ក៏មានការទម្លាយនូវលក្ខណៈសម្បត្តិពិសេសមួយចំនួនដែលទម្លាយថា ស្មាតហ្វូននេះដំណើរការនូវប្រព័ន្ធប្រតិបត្តិការ Android Pie។
គួរបញ្ជាក់ថា ក្រុមហ៊ុននេះ ក៏បានបញ្ចេញនូវប្រព័ន្ធប្រតិបត្តិការ Android Pie សម្រាប់ស្មាតហ្វូន Zenfone 5 និង Zenfone 5Z និង ROG Phone ដែលជាស្មាតហ្វូនទី 3 ដែលទទួលបានការអាប់ដេតនេះផងដែរ។ ស្មាតហ្វូន Asus ROG Phone នេះមានអេក្រង់ទំហំ 6 អ៊ីងជាមួយនឹងការទ្រទ្រង់នូវកម្រិតភាពច្បាស់ 2160x1080px ហើយនឹងមាន Refresh Rate កម្រិត 90Hz ជាមួយនឹងបច្ចេកវិទ្យាថ្មី 1ms response rate ព្រមទាំងអាចបង្ហាញនូវពណ៌ច្បាស់ធម្មជាតិ 108.6% DCI-P3 color gamut ថែមទៀតផង។
ហ្គេមីងហ្វូននេះ ដំណើរការលើបន្ទះឈីប Snapdragon 845 ដែលមានល្បឿន 2.96GHz និងមានរ៉េមទំហំ 8GB រួមនឹងមេម៉ូរិមានពីរជម្រើសសម្រាប់ជ្រើសរើសគឺទំហំ 128GB និង 512GB ។ ស្មាតហ្វូននេះក៏ប្រើប្រាស់ជាមួយនឹងបច្ចេកវិទ្យា Optiflex សម្រាប់បង្កើនល្បឿនទៅលើស្មាតហ្វូននេះថែមទៀតផង។
សម្រាប់ការថតរូបភាពវិញនោះ ស្មាតហ្វូននេះ បំពាក់មកជាមួយនឹងកាមេរ៉ាទំហំ 12MP Sony IMX363 f/1.7 ជាមួយនឹងកែវឡេន 120-degree wide-angle lens និងកាមេរ៉ាទីពីរមានទំហំ 8MP secondary sensor ជាមួយនឹង f/2.0 aperture។ ស្មាតហ្វូននេះ មានកាមេរ៉ាខាងមុខទំហំ 8MP សម្រាប់ថតរូបភាព Selfies និងវីដេអូខល។ ស្មាតហ្វូន Asus ROG Phone ក៏ភ្ជាប់ជាមួយនឹង X Mode ដែលអាចធ្វើការបញ្ឈប់នូវ background tasks ទាំងអស់សម្រាប់ការលេងហ្គេម។
ហ្គេមីងហ្វូននេះ ក៏មានភ្ជាប់ជាមួយនឹងប្រព័ន្ធត្រជាក់ AeroActive cooler ដែលធ្វើការធានាទៅលើស្ថេរភាពនៃការលេងហ្គេមយ៉ាងរលូនផងដែរ។ ក្រុមហ៊ុន ASUS បានអះអាងថា ប្រព័ន្ធកង្ហារល្បឿន 4-Speed អាចធ្វើការបញ្ចុះនូវសីតុណ្ហភាពដល់ទៅ 4.7 ដឺក្រេអង្សារសេថែមទៀត។ សម្រាប់ការតភ្ជាប់របស់ស្មាតហ្វូននេះ មានដូចជា 4G VoLTE, Wi-Fi 802.11 b/g/n/ac, Bluetooth, GPS, 3.5mm headphone jack និង USB Type-C Port។
នៅលើស្មាតហ្វូននេះ ក៏មានភ្ជាប់ជាមួយនឹងប្រព័ន្ធស្កេនក្រយ៉ៅដៃនៅខាងក្រោយ ប្រព័ន្ធការពារការកំពប់ទឹកពីលើ IPX4 splash resistance ប្រព័ន្ធស្កេនមុខដោះសោរ មីក្រូហ្វូនចំនួន 3 ជាមួយនឹងបច្ចេកវិទ្យា ASUS Noise Reduction Technology និង ZeniMoji Live Emojis ថែមទៀត។ ស្មាតហ្វូននេះ មានថាមពលថ្មទំហំ 4000mAh ដែលទ្រទ្រង់នូវបច្ចេកវិទ្យាបញ្ចូលថាមពលថ្មលឿន Asus HyperCharge fast charging technology ដែលអាចបញ្ចូលថាមពលថ្មពី ០ ទៅ 60% នៅក្នុងរយៈពេល 30 នាទីប៉ុណ្ណោះ៕
