នៅថ្ងៃទី 20 ខែមិថុនាឆ្នាំ 2018 នេះ ក្រុមហ៊ុន ថៃសាមសុង អេឡិកត្រូនិក នៅកម្ពុជា បានរៀបចំពិធីចុះអនុស្សារណៈយោគយល់គ្នាជាមួយអាជ្ញាធរអប្សរា ស្តីពីការ “ ការពាររមនីយដ្ឋាន និងរៀបចំតំបន់សៀមរាប-អង្គរ ” ដែលពិធីធនេះត្រូវបានរៀបចំធ្វើឡើងនៅការិយាល័យក្រុមហ៊ុន សាមសុង ដែលអសយដ្ឋាននៅជាន់ទី 21 នៃអាគារ Phnom Penh Tower ក្រោមអធិបតីយភាពដ៏ខ្ពង់ខ្ពស់បំផុតពីសំណាក់ឯកឧត្តម សុខ សង្វារ អគ្គនាយករងអាជ្ញាធរអប្សរា និងលោក Seungho Choi អគ្គនាយកសាខាក្រុមហ៊ុនថៃសាមសុងអេឡិចត្រូនិកប្រចាំប្រទេសកម្ពុជា រួមជាមួយនឹងមន្រ្តី បុគ្គលិកក្រុមហ៊ុន ហើយនឹងអ្នកសារព័ត៌មានជាច្រើនរូប។
នៅក្នុងពិធីនោះដែរ ក្រុមហ៊ុន ថៃសាមសុង អេឡិកត្រូនិក នៅកម្ពុជា បានប្រគល់នូវថវិកា ចំនួន247,080,000លានរៀល (ប្រមាណ 61,770 ដុល្លារអាមេរិក) ពីមូលនិធិនៃការលក់ទូរស័ព្ទ Samsung Galaxy “J” សេរី2016 ដែលបានសន្យានឹងធ្វើការឧបត្ថម្ភទឹកប្រាក់ 10,000 រៀលរាល់ការលក់ផលិតផល 1 គ្រឿង នាពេលកន្លងមកផងដែរ។ ទាក់ទិនទៅនឹងគម្រោងនេះ ក្រុមហ៊ុន ថៃសាមសុង អេឡិកត្រូនិក នៅកម្ពុជា ក៏បានធ្វើការផ្សព្វផ្សាយនិងជំរុញលើកទឹកចិត្តប្រជាជនតាមរយៈយុទ្ធនាការ “មោទនភាពជាតិក្នុងដៃអ្នក” ដោយប្រើប្រាស់រូបភាពអង្គរវត្តនៅលើប្រអប់ (box) និងនៅលើផ្ទាំងមុខ (theme) នៃទូរស័ព្ទដៃម៉ាក Samsung Galaxy “J” សេរី2016 ទៀតផង ក្នុងចេតនាមួយ ដើម្បីបំផុសទឹកចិត្តស្រលាញ់និងមោទនភាពចំពោះប្រាង្គប្រាសាទដ៏មហាអច្ឋរិយៈរបស់កម្ពុជាយើង ។
តាមប្រសាសន៏របស់លោក Seungho Choi អគ្គនាយកសាខាក្រុមហ៊ុនថៃសាមសុងអេឡិចត្រូនិកប្រចាំប្រទេសកម្ពុជា បានអោយដឹងថា រហូតមកទល់ពេលនេះ យើងជឿជាក់ថា ផលិតផល Samsung Galaxy “J” សេរី 2016 បានលក់សំរេចអស់ពីលើទីផ្សារប្រទេសកម្ពុជាហើយ ទើបយើងសំរេចចិត្តជ្រើសរើសយកពេលវេលានេះដើម្បីបិទបញ្ចប់មូលនិធិ Samsung Galaxy “J” សេរី2016 នេះ។ ហើយ មូលនិធិនេះ នឹងប្រគល់ជូនទៅអាជ្ញាធរអប្សរាដើម្បីអភិវឌ្ឍវិស័យទេសចរណ៍ និងរៀបចំរមណីយដ្ឋាននៅតំបន់សៀមរាប-អង្គរ និងកិច្ចការងារផ្សេងៗទៀតតាមទិសដៅការងាររបស់អាជ្ញាធរអប្សារា ។
លោកបានបន្តថា រូបភាពអង្គវត្ត ដែលបានបង្ហាញនៅលើប្រអប់ (box)និងនៅលើផ្ទាំងមុខ (theme) នៃទូរស័ព្ទដៃម៉ាក Samsung Galaxy “J” សេរី (J3 J5 និង J7) គឺបានបង្ហាញពីចេតនារបស់ក្រុមហ៊ុន ដែលចង់ចូលរួមជាមួយប្រជាជនកម្ពុជា នៅក្នុងការបំផុសទឹកចិត្តស្រលាញ់ អភិរក្សនិងថែរក្សាសម្បត្តិវប្បធម៌ដ៏ល្អមួយនេះផងដែរ។
នៅក្នុងពិធីនេះ ឯកឧត្តម សុខ សង្វារ ដែលជាអគ្គនាយករងអាជ្ញាធរអប្សរា ក៏បានមានប្រសាសន៏បញ្ជាក់អោយដឹងផងដែរថា តាងនាមឲ្យអាជ្ញាធរអប្សរាជាតិខ្ងុំសូមថ្លែងអំណរគុណយ៉ាងស្មោះស្ម័គ្រ និងកោតសរសើរចំពោះ ក្រុមហ៊ុន សាមសុង ដែលបានបង្កើតគម្រោងនេះឡើង។ យើងរីករាយក្នុងការទទួលយកមូលនិធិនេះ នឹងប្រើប្រាស់មូលនិធិនេះ សំរាប់កិច្ចការងារក៏ប្រសើរក្នុងការថែទាំប្រាង្គប្រាសាទរបស់យើងឲបានល្អប្រសើរ។
ឯកឧត្តម សុខ សង្វារ បានបន្តថា ឯកឧត្តមពិតជាមានការរីករាយណាស់ដែលក្រុមហ៊ុន សាមសុង ដែលត្រូវបានគេទទួលស្គាល់ទូទាំងពិភពលោក ថាជាក្រុមហ៊ុនស្មាតហ្វូនធំជាងគេ បានសំរេចចិត្តបង្កើតកម្មវិធីល្អៗ ដើម្បីសង្គមកម្ពុជា ក្នុងនោះ ឯកឧត្តម សុខ សង្វារ ក៏បានសុំអំពាវនាវដល់ក្រុមហ៊ុន សាមសុង ក៏ដូចជាក្រុមហ៊ុនដ៏ទៃផ្សេងទៀតបន្តនូវកម្មវិធីនេះ ឫកម្មវិធីសង្គមផ្សេងៗជាបន្តទៀត ដើម្បី អភិវឌ្ឍសេដ្ឋកិច្ច និងសង្គមកម្ពុជា។ ក្រៅពីសកម្មភាពសង្គម ខាងលើនេះ ក្រុមហ៊ុន សាមសុង ក៏បានចូលរួចក្នុងការជួយសង្គមជាតិមានដូចជាការបរិច្ចាកឈាម, យុទ្ធការចែកមួកសុវត្ថិភាព,Love & Care និងវគ្គបណ្តុះបណ្តាលសាមសុង Tech Institute ផងដែរ។