កាលពីថ្ងៃទី19 ខែមិថុនា ឆ្នាំ 2018 កន្លងទៅនេះ ក្រុមហ៊ុន ECI Distribution ដែលជាក្រុមហ៊ុននាំចូល និង ចែកចាយផលិតផលបច្ចេកវិទ្យាដ៏ឈានមុខគេមួយ បានសហការគ្នាជាមួយនឹងក្រុមហ៊ុន Sony ដើម្បីរៀបចំនូវកម្មវិធីបណ្ដុះបណ្ដាលថ្មីមួយដែលពាក់ន្ធ័ទៅនឹងបច្ចេកវិទ្យាចុងក្រោយរបស់ Sony Pro-BRAVIA និង Sony Projector ជូនទៅដល់ដៃគូរចែកចាយបន្តរបស់ខ្លួន ដែលបានប្រព្រឹត្តទៅនៅសណ្ឋាគារ សូហ្វីតែល ភ្នំពេញ ភូគីត្រា។ កម្មវិធីបណ្ដុះបណ្ដាលនេះ មានការចូលរួមដោយផ្ទាល់ពីតំណាងក្រុមហ៊ុន Sony មកពីប្រទេសសិង្ហបុរី ផងដែរ ដូចជា លោកស្រី Jo Yang និង លោក Lawrence Lim ។
នៅក្នុងឱកាសនោះដែរ លោក ញ៉េប ចន្ថា ដែលជាអគ្គនាយកគ្រប់គ្រងទូទៅរបស់ក្រុមហ៊ុន ECI Distribution បានមានប្រសាសន៍អោយដឹងថា គោលបំណងសំខាន់នៃការរៀបចំកម្មវិធីបណ្ដុះបណ្ដាលជូនដល់ដៃគូរចែកចាយបន្តនៅពេលនេះ គឺជាការចូលរួមចំណែកដ៏សំខាន់មួយក្នុងការចែករំលែកនូវបទពិសោធន៍ថ្មីៗ និងបច្ចេកវិទ្យាទំនើបៗ ដែលមាននៅលើផលិតផលថ្មីរបស់ក្រុមហ៊ុន Sony ដែលកំពុងតែមានតំរូវការយ៉ាងខ្លាំងពីសំណាក់អតិថិជននៅក្នុងទីផ្សារប្រទេសកម្ពុជា ក៏ដូចជាទីផ្សារនៅក្នុងពិភពលោកទាំងមូលផងដែរ។ ម្យ៉ាងវិញទៀត ក្រុមហ៊ុន ECI Distribution ចង់បង្កើននូវការប្រាស្រ័យទាក់ទងគ្នា អោយកាន់តែជិតស្និតមួយកំរិតថែមទៀត រវាងក្រុមហ៊ុន និងតំណាងចែកចាយបន្តទាំងអស់ ដែលពួកគាត់ បានខិតខំជួយជុំរុញការលក់ផលិតផលនានារបស់ក្រុមហ៊ុន ក៏ដូចជាផលិតផល Sony អោយទទួលបាននូវភាពជោគជ័យ និងមានភាពល្បីល្បាញរហូតមកដល់ពេលសព្វថ្ងៃនេះ។
នៅក្នុងពិធីនោះដែរក្រុមហ៊ុន SONY ក៏បានណែនាំនូវ Sony Pro-BRAVIA ដែលជាផលិតផលថ្មីរបស់ខ្លួន ដែលបានច្នៃប្រឌិតឡើងជាមួយនិងមុខងារកាន់តែទំនើប។ Sony Pro-BRAVIA ជា Professional Display ដែលអាចផ្តល់ដំណោះស្រាយលើវិស័យចំនួនបីគឺ៖
-ដំណោះស្រាយលើអាជីវកម្ម និង វិស័យអប់រំ
-Digital Signage ដំណោះស្រាយសំរាប់ហាងលក់ទំនិញ
-ដំណោះស្រាយសំរាប់សណ្ឋារគារ
គួរបញ្ជាក់ផងដែរថា Digital Signage គឺជាបច្ចេកវិទ្យាឌីជីថលម្យ៉ាង ដែលត្រូវបានបង្កើតឡើងនៅក្នុងទម្រង់ជា អត្ថបទ រូបភាព ឬ វីដេអូ ដើម្បីបង្ហាញព័ត៌មានផ្សេងៗនៅលើអេក្រង់ LCD ឬ LED ។ ផ្ទាំងបង្ហាញឌីជីថលនេះសាកសមបំផុតដាក់តាំងបង្ហាញនៅតាមទីកន្លែងផ្សេងៗដូចជា ទីសាធារណៈ សារមន្ទីរ ពហុកីឡាដ្ឋាន ហាងលក់ទំនិញ សណ្ឋាគារ ភោជនីយដ្ឋាន ព្រលានយន្តហោះ និងអគារក្រុមហ៊ុន ដើម្បីផ្សព្វផ្សាយកម្មវិធីពិសេស ប្លង់បង្ហាញគោលដៅ និង ព័ត៌មានអំពីហាងឆេងភាគហ៊ុន ជាដើម។ ម្យ៉ាងវិញទៀត នៅតាមបណ្តា សាលារៀន មន្ទីរពេទ្យ និងក្រុមហ៊ុនផ្សេងៗ ក៏បានប្រើប្រាស់ផ្ទាំងបង្ហាញឌីជីថលនេះ ដើម្បីផ្តល់សារទំនាក់ទំនងដល់បុគ្គលិក ក៏ដូចជាផ្តល់ព័ត៌មានដល់ភ្ញៀវផងដែរ។ Sony Pro-BRAVIA ត្រូវបានបំពាក់ទៅដោយអេក្រង់ 4K ដែលផ្តល់នូវកំរិតភាពច្បាស់ចំនួន 3840x2160 ភិកហ្សែល ដែលធ្វើអោយអោយរូបភាពមានពណ៌ធម្មជាតិ ភ្លឺច្បាស់ត្រជាក់ភ្នែក។ អេក្រង់នេះមានបីទំហំសំរាប់ជ្រើសរើសដូចជា 49 អ៊ីញ 55 អ៊ីញ និង 65 អ៊ីញ។
សូមជំរាបជូនផងដែរថា ECI Distribution គឺជាក្រុមហ៊ុនដ៏ធំបំផុត មួយក្នុងការផ្តល់ដំណោះស្រាយនានាខាងផ្នែកបច្ចេកវិទ្យា ដែលបាននាំចូល និង ចែកចាយផលិតផលបច្ចេកវិទ្យាជាច្រើនម៉ាកដូចជា Sony, Dell, Lenovo, DJI, , Fuji Xerox, Transcend, APC, Bitdefender, Motorola, ZKT ហើយនិងឧករណ៍អេឡិកត្រូនិកផ្សេងៗទៀតជាច្រើនទៀតនៅក្នុងប្រទេសកម្ពុជា។
រហូតមកដល់សព្វថ្ងៃនេះ ECI Distribution មានក្រុមហ៊ុនជាដៃគូរសហការ និងក្រុមហ៊ុនចែកចាយបន្តជាច្រើនដែលមានភាពជឿជាក់មកលើផលិតផល និង សេវាកម្មរបស់ខ្លួន ហើយក៏តែងតែគាំទ្រមកលើផលិតផលរបស់ក្រុមហ៊ុនជានិច្ច ស្ទើរតែនៅទូទាំងប្រទេស។ ហើយជាញឹកញយ ក្រុមហ៊ុនតែងតែមានកម្មវិធីបណ្ដុះបណ្ដាល និង បង្ហាញផលិតផលថ្មីៗជូនដល់ដៃគូរសហការរបស់ខ្លួនជានិច្ច។ ព្រមជាមួយគ្នានេះដែរ ក្រុមហ៊ុន ECI Distribution ក៏មានការផ្ដល់ជូននូវសេវាកម្មមកលើផលិតផលក្នុងរយៈពេល 3 ឆ្នាំ ជូនដល់អតិថិជនរបស់ខ្លួននៅទូទាំងប្រទេសកម្ពុជា ៕
ជាចុងក្រោយ លោក ញ៉េប ចន្ថា ក៏សូមថ្លែងអំណរអរគុណយ៉ាងជ្រាលជ្រៅដល់ដៃគូរសហការទាំងអស់ដែលតែងតែគាំទ្រមកលើផលិតផលរបស់ក្រុមហ៊ុន អុី ស៊ី អាយ ឌីស្រ្ទីប៊្យូសិន (ECI Distribution) រហូតមក ហើយក៏សូមជូនពរអោយអតិថិជនទាំងអស់មានសុខភាពល្អ និង រកទទួលទានមានបានគ្រប់ៗគ្នា។