បន្ទាប់ពីក្រុមហ៊ុន Nokia បានចេញលក់ទូរស័ព្ទស្មាតហ្វូន Android One ស៊េរីថ្មី Nokia 2.2 ដែលមានតម្លៃធូរថ្លៃ អស់រយៈពេលខ្លីឃើញថា ស្មាតហ្វូនថ្មីនេះ ទទួលបាននូវការគាំទ្រច្រើនពីសំណាក់អ្នកប្រើប្រាស់ជាច្រើន រហូតមកដល់ត្រូវបានគេចាត់ទុកថា គឺជាស្មាតហ្វូនលំដាប់ថវិការថ្មីមួយ ដែលជាជម្រើសល្អបំផុតសំរាប់ការប្រើប្រាស់ប្រចាំថ្ងៃថែមទៀតផង។ ស្មាតហ្វូន Nokia ស៊េរីថ្មីនេះ ត្រូវបានរចនាឡើងយ៉ាងពិសេសជាមួយនឹងរូបរាងថ្មី និងមានការបំពាក់នូវបន្ទះអេក្រង់ទំហំ 5.7 អ៊ីង ប្រភេទ IPS panel មានស្ទាយដំណក់ទឹក (Waterdrop Notch) ហើយនិងមានបង្កប់កាមេរ៉ាមុខសម្រាប់សែលហ្វីទំហំ 5 មេហ្កាភិចសែល ។
ក្រុមហ៊ុន Nokia បានបញ្ជាក់ថា អេក្រង់របស់ Nokia 2.2 គឺមានលទ្ធភាពអាចទ្រទ្រង់ការបង្ហាញបានក្នុងកម្រិត HD+។ នៅផ្ទៃខ្នងខាងក្រោយមានរំលេចដោយកាមេរ៉ាថតរូបមួយគ្រាប់ទំហំ 13MP ជាមួយអំពូល LED flash មួយគ្រាប់ដំាបញ្ឈរតួរ និងមិនមានទ្រនាប់ស្កែនក្រយ៉ៅម្រាមដៃនោះទេ ដោយវាជំនូសដោយការស្កែនផ្ទៃមុខ (Face Unlock) ក្នុងការដោះសោរ។ ស្មាតហ្វូនស៊េរីថ្មីនេះរត់ដោយបន្ទះឈីប Helio A22 ដែលមានអង្គគណនាកម្រិត Quad-core ជាមួយរ៉េមទំហំ 3GB ព្រមទាំងមានមេម៉ូរីទំហំ 32GB ជាមួយនឹងការដាក់បន្ថែមទំហំផ្ទុកក្រៅបានប្រភេទ microSD។ សម្រាប់ថ្មរបស់ Nokia 2.2 វិញ គឺមានទំហំ 3,000mAh និងអាចសាកបញ្ចូលថាមពលថ្មតាមរយះខ្សែ និងរន្ធចម្លងប្រភេទ microUSB។
លក្ខណះដ៏ពិសេសបំផុតសម្រាប់ Nokia 2.2 គឺវាទទួលបានការធ្វើបច្ចុបប្បន្នភាពថ្មីជានិច្ចទៅលើប្រព័ន្ធសុវត្ថិភាព និងកំនែប្រែ Android ចុចក្រោយដោយផ្ទាល់ពីក្រុមហ៊ុន Google ក្នុងរយះពេល 3 ឆ្នាំដូចនេះ មានន័យថា ស្មាតហ្វូននេះ មានលទ្ធភាពគ្រប់គ្រាន់ក្នុងការទទួលយកនូវការធ្វើបច្ចុប្បន្នភាពឡើងទៅ Android Q ដែលជំនាន់ចុងក្រោយបំផុតបានដោយគ្មានបញ្ហានៅពេលខាងមុខ។ អ្វីដែលពិសេសនោះ គឺថា ស្មាតហ្វូនលំដាប់ Entry-Level មួយនេះ ក៏មានប៊ូតុងដំណើរការមុខងារ Google Assistant នៅផ្នែកលើគែមខាងឆ្វេងថែមទៀតផង។ Nokia 2.2 មានពីរពណ៌គឺខ្មៅ និងទឹកប្រាក់ ហើយស្មាតហ្វូននេះ នឹងចាប់ផ្តើមចេញនៅកម្ពុជាហើយជាមួយតម្លៃប្រមាណខ្ទង់ 127 ដុល្លាអាមេរិក ដោយនឹងមានថែមជូនអាវភ្លៀងមួយថែមទៀតផង ៕
