ថ្មីៗនេះ ស្មាតហ្វូនស៊េរីថ្មី LG G6 របស់ក្រុមហ៊ុន LG ប្រកាសដាក់លក់ជាផ្លូវការនៅក្នុងទឹកដីសហរដ្ឋអាមេរិច ប៉ុន្តែក្រុមហ៊ុនបច្ចេកវិទ្យាកូរ៉េខាងត្បូងនេះ គឺមានគម្រោងក្នុងការដាក់លក់ស្មាតហ្វូនស៊េរី Mini របស់ខ្លួននាពេលឆាប់ៗខាងមុខនេះដែរ។ ខណៈពេលដែលព័ត៌មាននេះ នៅមិនទាន់ទម្លាយជាផ្លូវការនៅឡើយទេនោះ រូបភាពមួយចំនួនរបស់ស្មាតហ្វូន LG G6 Mini នេះ ក៏ត្រូវបានគេបង្ហោះនៅលើអនឡាញផងដែរ។ មិនខុសពីស្មាតហ្វូន LG G6 អេក្រង់ 5.7 អ៊ីងនោះទេ ស្មាតហ្វូន LG G6 Mini មានអេក្រង់ទំហំ 5.4 អ៊ីងនិងមានកម្រិតអេក្រង់ធៀបនឹងតួខ្លួន 80% ។
ទោះជាយ៉ាងណាក៏ដោយ ស្មាតហ្វូន LG G6 និង LG G6 Mini មានកម្រិត 18:9 aspect ratio ដូចនេះ ប្រសិនបើលោកអ្នកមិនមែនជាអ្នកគាំទ្ររបស់ស្មាតហ្វូន LG ស៊េរីថ្មីនេះនោះទេ លោកអ្នកប្រហែលជាខកចិត្តបន្តិចហើយ។ ក្រៅពីទំហំអេក្រង់របស់ស្មាតហ្វូនស៊េរីថ្មីនេះ លក្ខណៈសម្បត្តិរបស់ LG G6 Mini ស្ថិតនៅក្នុងមន្ទិលសង្ស័យនៅឡើយ។ ក្រុមហ៊ុនបច្ចេកវិទ្យា LG ប្រហែលជាអាចផ្លាស់ប្តូរនូវលក្ខណៈសម្បត្តិមួយចំនួននៅលើស្មាតហ្វូន LG G6 Mini ដើម្បីទម្លាក់តម្លៃរបស់ស្មាតហ្វូននេះ ឬស្មាតហ្វូន LG G6 Mini អាចបំពាក់នូវលក្ខណៈសម្បត្តិដូចគ្នាទៅនឹង LG G6 ដូចនេះតម្លៃរបស់វាអាចនឹងមានតម្លៃថ្លៃដដែល។
ទន្ទឹមនឹងនេះផងដែរ ស្មាតហ្វូន LG G6 Mini ប្រហែលជាមិនមែនជាឈ្មោះផ្លូវការរបស់ស្មាតហ្វូនស៊េរីថ្មីរបស់ក្រុមហ៊ុន LG នោះទេ។ បើទោះបីជាស្មាតហ្វូននេះ បង្ហាញខ្លួននៅលើទីផ្សារពិតប្រាកដមែននោះ ក្រុមហ៊ុន LG ក៏ប្រហែលជាជ្រើសរើសក្នុងការដាក់លក់ស្មាតហ្វូន LG G6 Mini នៅក្នុងទីផ្សារមួយចំនួនដែលខ្លួនជ្រើសរើស ហើយទីផ្សារអាមេរិចប្រហែលជាមិនដាក់លក់ទេ៕
