សង្គ្រាមនៃរចនាអេក្រង់គែមតូចបំផុតកំពុងតែខ្លាំងក្លា។ ក្រុមហ៊ុនបច្ចេកវិទ្យា Apple ប្រហែលជាមានគំនិតសម្រាប់រឿងនេះ ផងដែរ គ្រាន់តែវាស្ថិតនៅក្នុងការពន្យារពេលសិន។ ក្រុមហ៊ុនបច្ចេកវិទ្យា Xiaomi ចាប់ផ្តើមធ្វើរឿងនេះមុនគេ ហើយក្រុមហ៊ុនបច្ចេកវិទ្យា LG ក៏បន្តដំណើរតាមក្រោយ។ យ៉ាងណាមិញ វត្តមានរបស់ស្មាតហ្វូនស៊េរីថ្មី Samsung Galaxy S8 ក៏ភ្ជាប់ជាមួយនឹងអេក្រង់ធំដែលមានគែមព័ទ្ធស្តើងបំផុត។ ប្រសិនបើក្រុមហ៊ុនបច្ចេកវិទ្យា LG ពិតជាមានគម្រោងក្នុងការប្រើប្រាស់ប៉ាតង់នេះពិតមែន ស្មាតហ្វូនជំនាន់បន្ទាប់ពីស្មាតហ្វូន LG G6 គឺស្មាតហ្វូន LG V30 នឹងមានអេក្រង់ទី 1 និងអេក្រង់ទី 2 ដ៏ពេញលេញ។
ប្រសិនបើស្មាតហ្វូន LG V30 មានការរចនារូបរាងស្រដៀងគ្នាទៅនឹងស្មាតហ្វូន LG G6 នោះ ក្រុមហ៊ុនបច្ចេកវិទ្យា LG អាចនឹងប្រើប្រាស់នូវប៉ាតង់នេះសម្រាប់អេក្រង់ទីពីររបស់ខ្លួនបាន។ ក្រុមហ៊ុនអាចធ្វើរឿងនេះបានយ៉ាងពិតប្រាកដ។ ខុសគ្នាពីស្មាតហ្វូនស៊េរីថ្មី V10 និង V20 ស្មាតហ្វូននេះនឹងមានកាមេរ៉ាខាងមុខស្ថិតនៅចំណុចកណ្តាលនៃស្មាតហ្វូនតែម្តង ហើយវានឹងភ្ជាប់ជាមួយនឹងលក្ខណៈពិសេសជាច្រើនទៀតនៅលើអេក្រង់ទីពីរ។ សម្រាប់ព័ត៌មានជាច្រើនទៀតនៅមិនទាន់ទម្លាយឱ្យដឹងនៅឡើយទេ ប៉ុន្តែគែមព័ទ្ធជុំវិញអេក្រង់ពិតជាស្តើងតូចនៅផ្នែកខាងលើជាក់ជាមិនខាន។
សម្រាប់ដំណើរការនៃស្មាតហ្វូនស៊េរីថ្មី LG V30 នៅមិនទាន់មានការបញ្ជាក់អ្វីពីក្រុមហ៊ុនបច្ចេកវិទ្យា LG នៅឡើយទេ ប៉ុន្តែក្រុមហ៊ុន LG អាចនឹងបំពាក់នូវមុខងារមួយចំនួនដែលគ្រោងនឹងប្រើប្រាស់នៅលើទូរស័ព្ទ iPhone 8 ដូចជាការបង្កប់នូវប្រព័ន្ធស្កែនក្រយ៉ៅដៃនៅក្រោមអេក្រង់ជាដើម។ សម្រាប់ Speakers វិញវានឹងបង្កប់នៅជុំវិញប្រព័ន្ធកាមេរ៉ាខាងមុខ។ ការប្រើប្រាស់បែបនេះក៏អាចជាកត្តាប៉ះពាល់ទៅដល់ប្រព័ន្ធដំណើរការរបស់កាមេរ៉ាផងដែរ។្អេក្រង់របស់ស្មាតហ្វូន LG V30 អាចនឹងបំពាក់នូវលក្ខណៈសម្បត្តិពិសេសៗជាច្រើន។ យោងទៅតាមប្រភពនេះ វាអាចនឹងមានការផ្លាស់ប្តូរទៅប្រើប្រាស់អេក្រង់ OLED Panels ផងដែរសម្រាប់ LG V30 ហើយក្រុមហ៊ុនបច្ចេកវិទ្យា LG ក៏អាចប្រើប្រាស់អេក្រង់គែមកោងបានថែមទៀត៕
