នៅថ្ងៃនេះ ក្រុមហ៊ុន Samsung បានផ្ញើលិខិតអញ្ជើញជាផ្លូវការទៅកាន់អ្នកសារព័ត៌មានសម្រាប់ព្រឹត្តិការណ៍ Unpacked event របស់ខ្លួននៅក្នុងទីក្រុងញ៉ូវយ៉ក ដែលជាកន្លែងក្រុមហ៊ុនយក្ស Samsung នឹងធ្វើការប្រកាសហ្វាប់ប្លេត Galaxy Note 8។ លិខិតអញ្ជើញនេះ មិនមានការសរសេរអ្វីច្រើននោះទេ គ្រាន់តែគេសង្កេតឃើញមានហ្វាប់ប្លេត Galaxy Note 8 ដែលមានស៊ុមព័ទ្ធអេក្រង់ស្តើងនៅផ្នែកខាងលើ និងផ្នែកខាងក្រោមប៉ុណ្ណោះ ហើយវាមិនមានស៊ុមព័ទ្ធអេក្រង់នៅគែមចំហៀងនោះទេ។ ហ្វាប់ប្លេតស៊េរីថ្មីនេះ ត្រូវបានគេដឹងថានឹងប្រើប្រាស់អេក្រង់ 2:1 Infinity Display ដូចទៅនឹងស្មាតហ្វូនស៊េរីថ្មី Galaxy S8 ដែរ។ អ្វីដែលកាន់តែពិសេសជាងនេះទៀតនោះ តាមរយៈរូបភាព Teaser នេះក៏អាចឆ្លើយតបទៅនឹងពាក្យចចាមអារ៉ាមជាច្រើន ដែលនិយាយថាស៊ុមព័ទ្ធអេក្រង់ផ្នែកខាងលើមានទំហំធំជាងស៊ុមព័ទ្ធអេក្រង់ផ្នែកខាងក្រោមនោះ។
យើងពិតជារីករាយណាស់ដែលមើលឃើញថា បញ្ហារបស់ហ្វាប់ប្លេត Galaxy Note 7 មិនបង្ករការប៉ះពាល់ទៅដល់កេរ្តិ៍ឈ្មោះរបស់ក្រុមហ៊ុន Samsung ឬការលក់របស់ក្រុមហ៊ុននោះទេ។ ការអះអាងនេះគឺដោយសារតែការលក់របស់ស្មាតហ្វូនស៊េរីថ្មី Galaxy S8 និង Galaxy S8+ មានការកើនឡើងយ៉ាងខ្លាំងនៅលើទីផ្សារពិភពលោក។ អ្វីដែលកាន់តែអស្ចារ្យទៀតនោះ វត្តមានរបស់ហ្វាប់ប្លេត Galaxy Note 8 គឺជាអ្វីដែលអ្នកប្រើប្រាស់នូវហ្វាប់ប្លេត Galaxy Note 5 ទាំងអស់កំពុងតែទន្ទឹងរង់ចាំជាយូរមកហើយ។ យើងសង្ឃឹមថា ហ្វាប់ប្លេតស៊េរីថ្មីនេះ នឹងមិនមានបញ្ហាណាមួយកើតឡើងដូចគ្នាទៅនឹងហ្វាប់ប្លេត Galaxy Note 7 នោះទេ។
ហ្វាប់ប្លេត Samsung Galaxy Note 8 អាចនឹងមានអេក្រងទំហំ 6.3 អ៊ីងកម្រិតភាពច្បាស់ Super AMOLED display ជាមួយនឹងកម្រិត 18.5:9aspect ratio ដូចគ្នាទៅនឹងស្មាតហ្វូន Samsung Galaxy S8 និង Galaxy S8+ ។ ហ្វាប់ប្លេតស៊េរីថ្មី Samsung Galaxy Note8 ត្រូវគេរំពឹងថានឹងប្រើប្រាស់នូវលក្ខណៈសម្បត្តិស្រដៀងគ្នាទៅនឹងស្មាតហ្វូនស៊េរីថ្មី Galaxy S8 និង Galaxy S8+ ផងដែរដូចជាការប្រើប្រាស់បន្ទះឈីប Snapdragon 835 chipset សម្រាប់ទីផ្សារនៅក្នុងសហរដ្ឋអាមេរិច ឬបន្ទះឈីប Exynos 8895 CPU ភ្ជាប់ជាមួយនឹងរ៉េមផ្ទុកទិន្នន័យទំហំ 4GB/6GB រូបរាងស្រោបដោយលោហធាតុ និងប្រព័ន្ធការពារការជ្រាបទឹក ធូលីផងដែរ។ ហ្វាប់ប្លេត Galaxy Note 8 អាចនឹងបំពាក់នូវប្រព័ន្ធកាមេរ៉ាភ្លោះ ការទ្រទ្រង់នូវការប្រើប្រាស់ប៊ិក S-PEN ថាមពលថ្មកម្លាំង 3300mAh និងប្រព័ន្ធភ្លើង Flash ភ្លោះ LED នៅជាប់កាមេរ៉ាខាងក្រោយ ហើយវាក៏អាចទៅរួចផងដែរដែលថាក្រុមហ៊ុន Samsung នឹងទុកប្រព័ន្ធកាមេរ៉ាភ្លោះសម្រាប់ស្មាតហ្វូន Galaxy S9 នោះ។ តើអ្វីដែលលោកអ្នកចង់ដឹងអំពីហ្វាប់ប្លេត Galaxy Note 8 នោះ?