ការអាប់ឌែត: ម៉ូដែលមួយចំនួនទៀតរបស់ស្មាតហ្វូន Galaxy ស៊េរី A ឆ្នាំ 2017 ត្រូវបានគេមើលឃើញយ៉ាងច្បាស់ពីរូបភាពពិតនៃទូរស័ព្ទនេះ ព្រមទាំងព័ត៌មានលម្អិតមួយចំនួនដែលបញ្ជាក់ថាវាមានការរចនាកញ្ចក់អេក្រង់ថ្មី ការប្រើប្រាស់មុខងារការពារទឹកទឹកជ្រាប IP68 និងកម្រិតថាមពលថ្ម 3000 mAh, 3300 mAh និង 3500 mAh រៀងគ្នា។ ជាមួយគ្នានេះផងដែរ កាលបរិច្ឆេទនៃការបង្ហាញវត្តមានរបស់ទូរស័ព្ទនេះប្រហែលជានៅថ្ងៃទី 2 ខែមករាខាងមុខនេះ។
Galaxy A7 2017 ជាទូរស័ព្ទទំនើបរបស់ក្រុមហ៊ុន Samsung ប្រភេទថ្នាក់កណ្តាលតែមានសមត្ថភាពអស្ចារ្យ។ កាលពីឆ្នាំមុន ក្រុមហ៊ុន Samsung បានដាក់បង្ហាញទូរស័ព្ទស៊េរី A របស់ខ្លួននៅក្នុងខែធ្នូ ដូច្នេះសម្រាប់ទូរស័ព្ទ Galaxy A7 (2017) ពិតជាបង្ហាញខ្លួនបន្ទាប់ពីប់ពីការបង្ហាញវត្តមានរបស់ A7 2016 កាលពីឆ្នាំមុន។
ស្មាតហ្វូន A7 ស៊េរីថ្មីនេះត្រូវបានគេរំពឹងថានឹងបំពាក់នូវអេក្រង់ទំហំ 5.7 អ៊ីងប្រភេទ Super AMOLED កម្រិតភាពច្បាស់ 1080p ដែលវាមានទំហំធំជាងស្មាតហ្វូន A7 2016 ដែលមានអេក្រង់ត្រឹមតែ 5.5 អ៊ីងប៉ុណ្ណោះ។ បន្ថែមពីនេះទៀត ទូរស័ព្ទ A7 (2017) នឹងភ្ជាប់មកជាមួយនឹងថាមពលថ្មដែលមានកម្លាំង 3500 mAh ។ ទូរស័ព្ទនេះត្រូវបានរំពឹងថានឹងដំណើរការដោយអង្គប្រតិបត្តិការ Exynos 7880 រ៉េមសម្រាប់ផ្ទុកទិន្នន័យបណ្តោះអាសន្នទំហំ 3 GB ម៉េមូរីក្នុងម៉ាស៊ីនទំហំ 32 GB / 64 GB ហើយថែមទាំងអាចប្រើប្រាស់នូវរន្ធដោតកាត MicroSD ថែមទៀតផង។ កាមេរ៉ាខាងក្រោយមានទំហំ 16 មេហ្គាភិចសែលដែលភ្ជាប់ជាមួយនឹង f/1.9 aperture ។
ប្រព័ន្ធស្កេនក្រយ៉ៅដៃ និងរន្ធផត USB-C ក៏បានបង្ហាញវត្តមានសម្រាប់ទូរស័ព្ទស៊េរីឆ្នាំ 2017 នេះផងដែរ ហើយអ្វីដែលគួរឱ្យចាប់អារម្មណ៍បំផុតទៀតនោះគឺការថតរូប Selfie នៅក្នុងកម្រិតភាពច្បាស់កាន់តែល្អប្រសើរបំផុត។ ទូរស័ព្ទ Galaxy A7 (2017) ត្រូវបានដឹងថានឹងមានភ្ជាប់ជាមួយវិញ្ញាបនប័ត្រ IP68 (មុខងារមិនជ្រាបទឹក) ជាលើកដំបូងសម្រាប់ទូរស័ព្ទ Samsung ស៊េរី A នេះ។
តើលោកអ្នកចង់មើលពីរូបរាងរបស់ទូរស័ព្ទនេះដែរឬទេ? ពេលនេះ រូបភាពរបស់វាត្រូវបានទម្លាយ ហើយវាមើលទៅមានលក្ខណៈដូចច្រើនជាមួយនឹងទូរស័ព្ទ Galaxy S7 ដូច្នេះយើងនឹងរង់ចាំមើលសិនថារូបរាងពិតរបស់វាគឺបែបនេះឬយ៉ាងណា។ យ៉ាងណាមិញ យើងមិនអាចមើលឃើញផ្នែកខាង Power Key នៅឡើយទេ៕
ប្រភពពី phonearena.com
