នៅទីបំផុត ក្រុមហ៊ុន Samsung Electronics បានបញ្ជប់ការស៊ើបអង្កេតរបស់ខ្លួនអំពីមូលហេតុកាលពីឆ្នាំ 2016 កន្លងទៅ ដែលធ្វើអោយទូរស័ព្ទ Samsung Galaxy Note 7 កើនកម្តៅខ្លាំង ហើយនិងបង្ករនូវការផ្ទុះជាបន្តបន្ទាប់។ តាមប្រភពមួយដែលបញ្ជាក់ទៅកាន់សារព័ត៌មាន Reuters កាលពីពលេថ្មីៗនេះ បានឱ្យដឹងថា បញ្ហាធំបំផុតនៃការផ្ទុះនេះ គឺដោយសារតែថាមពលថ្មតែមួយគត់។ ប្រភពមួយនេះ ក៏បានបន្តប្រាប់សារព័ត៌មាននៅក្នុងថ្ងៃច័ន្ទនេះថា ការប្រកាសពីលទ្ធផលនៃការស៊ើបអង្កេតជាផ្លូវការប្រហែលជាចាប់ផ្តើមនៅក្នុងថ្ងៃទី 23 ខែមករាខាងមុខនេះ ហើយវាមានរយៈពេលមួយថ្ងៃមុនការប្រកាសពីលទ្ធផលផ្នែកហិរញ្ញវត្ថុរបស់ខ្លួនសម្រាប់ត្រីមាសទី 4 នេះផងដែរ។
ខណៈពេលដែលបញ្ហារបស់ទូរស័ព្ទ Galaxy Note 7 បានបញ្តាលឱ្យក្រុមហ៊ុន Samsung ខាតបង់ទឹកប្រាក់ជាង 5 ពាន់លានដុល្លារក្តី ប៉ុន្តែកេរ្តិ៍ឈ្មោះ និងការជឿជាក់ទៅលើម៉ាកយីហោនេះនៅតែមានតួរលេខខ្ពស់ដដែល រហូតមកដល់ពេលនេះ អ្នកគាំទ្រ និងអតិថិជនជាច្រើន បាននឹងកំពុងតែរង់ចាំវត្តមានរបស់ស្មាតហ្វូនស៊េរីថ្មីរបស់ក្រុមហ៊ុន Samsung ដែលគ្រប់គ្នាហៅវាថា Galaxy S8 ដែលក្រុមហ៊ុនមួយនេះ គ្រោងនឹងប្រកាសនៅក្នុងឆមាសទី 1 នៅក្នុងឆ្នាំ 2017 នេះតែម្តង។ ក្រុមហ៊ុន Samsung នឹងត្រូវធ្វើការពន្យល់ទៅកាន់អ្នកប្រើប្រាស់ ក៏ដូចជាអ្នកវិនិយោគជាច្រើននាក់ទៀតនៅទូទាំងពិភពលោក អំពីមូលហេតុពិតប្រាកដនៃការផ្ទុះរបស់ទូរស័ព្ទ Galaxy Note 7 នេះ ហើយជាពិសេសក្រុមហ៊ុន Samsung ក៏នឹងត្រូវធ្វើការបកស្រាយឱ្យច្បាស់ទៀតថា បញ្ហាដដែលនេះ គឺនឹងមិនអាចកើតឡើងម្តងទៀតនោះទេ សម្រាប់ទូរស័ព្ទស៊េរីថ្មីរបស់ក្រុមហ៊ុន Samsung នាពេលអនាគត។
លោក Bryan Ma ដែលជាអ្នកវិភាគស្រាវជ្រាវរបស់ក្រុមហ៊ុន IDC ដែលមានមូលដ្ឋាននៅក្នុងប្រទេសសិង្ហបុរី បាននិយាយថា “ក្រុមហ៊ុន Samsung ត្រូវតែបកស្រាយឱ្យបានច្បាស់លាស់ ហើយពួកគេត្រូវតែធានាចំពោះអតិថិជនប្រើប្រាស់ថា បញ្ហានេះ នឹងមិនអាាកើតឡើងសារជាថ្មីម្តងទៀតនោះទេ។ សម្រាប់រូបខ្ញុំ វាពិតជាមានភាពភ្ញាក់ផ្អើលប្រសិនបើក្រុមហ៊ុនបកស្រាយថាបញ្ហានេះ កើតឡើងដោយសារតែអ្នកផ្គត់ផ្គង់នោះ។ ថ្មីៗនេះ ក្រុមហ៊ុនទើបតែបញ្ចេញនូវវីដេអូក្លីបថ្មី ដែលមនុស្សភាគច្រើនគិតថាជា Samsung Galaxy S8 ប៉ុន្តែតាមរយៈវីដេអូនេះបានបង្ហាញពីបច្ចេកវិទ្យាថ្មីសម្រាប់បន្ទះអេក្រង់ AMOLED តែប៉ុណ្ណោះ។
សូមទស្សនាវីដេអូទាំងអស់គ្នា៖
