ថ្មីៗនេះក្រុមហ៊ុន ASUS បានប្រកាសចេញនូវទូរស័ព្ទស្មាតហ្វូនម៉ូដែលថ្មីមួយទៀតគឺ ASUS Zenfone 3 Max ត្រូវបានរចនាឡើងយ៉ាងប្រណិត ប្រកបដោយភាពស៊ីវីល័យ និងទាន់សម័យបំផុត មិនតែប៉ុណ្ណោះ វាក៏ត្រូវបានបំពាក់នូវកម្មវិធីយ៉ាងសំបូរបែប ជាពិសេសគឺកាមេរ៉ាសម្រាប់ផ្តិតយករូបភាពតែម្តងតែម្តង។
ដំបូងយើងក្រឡេកមកមើលរូបរាងរបស់ ASUS Zenfone 3 Max ដែលត្រូវបានក្រុមហ៊ុន ASUS ធ្វើការរចនារូបរាងឡើងកាន់តែមានភាពស្រស់ស្អាត ទាន់សម័យនិងទាកទាញពេលកាន់ក្នុងដៃរបស់លោកអ្នក។ ជាមួយនឹងរូបរាងស្រោបដោយអាលុយមីញ៉ូម និងបន្ថែមនូវពន្លឺចែងចាំង ផ្ទៃខាងមុខរបស់វា មានផ្ទៃអេក្រង់ទំហំ 5.2 អីុង។ ចំពោះការរចនាវ័ន្តជុំវិញរបស់វាវិញ វាមានរចនាបទ Unibody បន្ស៊ីគ្នាខាងមុខខាងក្រោយ យ៉ាងជាប់ល្អ កាន់តែពិសេសត្រង់កន្លែងកាមេរ៉ាមានការចនាយ៉ាងស្រស់ស្អាត និងអំពូល LED ដែលបន្ថែមភាពទាក់ទាញបំផុត មកខាងក្រោមបន្តិចមានអក្សរ ASUS និងរន្ធឧបាល័របំពងសម្លេងតូចៗផងដែរ។
ASUS Zenfone 3 Max ត្រូវបានបំពាក់ដោយកញ្ចក់អេក្រង់ថាច់ស្គ្រីនទំហំ 5.2 អីុង ប្រភេទ IPS 2.5D ដែលមានសមត្ថភាពខ្ពស់អាចបង្ហាញចេញបានភ្លឺច្បាស់ និងអាចការពារចំណាំងផ្លាតពីពន្លឺថ្ងៃខ្លាំងបានយ៉ាងល្អ ដែលអាចបង្ហាញចេញនូវកម្រិតរីសូលូហ្សិន HD 720x1280 ភិចសែល ដែលមានសមត្ថភាពពេញលេញក្នុងការបង្ហាញចេញនូវរូបភាព និងវិដេអូនៅលើកញ្ចក់អេក្រង់បានយ៉ាងច្បាស់ត្រជាក់ភ្នែកតែម្តង។ កាន់តែពិសេសកញ្ចក់អេក្រង់របស់ ASUS Zenfone 3 Max ត្រូវបានស្រោបដោយកញ្ចក់ការពារកកិតឆ្កូត Corning Gorilla Glass បន្ថែមការការពារកកិតបានយ៉ាងល្អឥតខ្ចោះតែម្តង។
និយាយពីកាមេរ៉ាវាជាចំណុចដ៏ពិសេស ដោយសារតែ Zenfone 3 Max ត្រូវបានបំពាក់មកជាមួយកាមេរ៉ាទំហំ 13 មេហ្គាភិចសែល ផ្តល់ជូនលោកអ្នកក្នុងការចាប់យករូបភាពបានកាន់តែច្បាស់។ ចំណែកកាមេរ៉ាខាងមុខរបស់វាមានទំហំ 5 មេហ្គាភិចសែល ដែលមានសមត្ថភាពក្នុងការចាប់យករូបភាពបានយ៉ាងច្បាស់ដូចគ្នា មិនតែប៉ុណ្ណោះវាក៏មានបន្ថែមនូវមុខងារយ៉ាងពិសេសៗបន្ថែមទៀតដូចជា មុខងារ PixelMaster Modes សម្រាប់ការចាប់យករូបភាពបានកាន់តែពេញចិត្តតែម្តង និយាយពីការថតវីដេអូវិញ វាអាចថតវិដេអូបានកម្រិត 1080p@30fps ច្បាស់ និងរហ័សទាន់ចិត្ត។
ASUS Zenfone 3 Max ភ្ជាប់មកជាមួយថ្មខ្នាត Li-Po 4100 mAh ដែលអាចផ្តល់ជូននូវការប្រើប្រាស់បានកាន់តែយូរជាងមុនទ្វេរដង ជាពិសេស វាត្រូវបានភ្ជាប់មកជាមួយបច្ចេកវិទ្យាសាកថ្មឆាប់ពេញរហ័សទាន់ចិត្ត ។ ដោយអាចប្រើប្រាស់បានកាន់តែយូរដូចជា អាចបើកទុកចោលបានន 30 ម៉ោង ការសន្ទនាបាន 20 ម៉ោង ការប្រើប្រាស់ប្រព័ន្ធអិុនធើណិត Wi-Fi បានដល់ 18 ម៉ោង តែបើនិយាយពីការស្តាប់តន្ត្រីវិញ គឺអាចចាក់បានរហូតដល់ 87 ម៉ោង ឯណ្ណោះ។ នៅមិនទាន់អស់ Zenfone 3 Max ក៏មានសមត្ថភាពក្នុងការប្រែក្លាយខ្លួនជា Power Bank ដែលអាចសាកថ្មឧបករណ៍ដ៏ទៃទៀតបានយ៉ាងងាយស្រួលបំផុត។
ងាកមកមើលកំលាំងម៉ាស៊ីន ការដំណើរការទៅបានដោយរលូនរបស់ ASUS Zenfone 3 Max គឺត្រូវពឹងលើបន្ទះឈីប Mediatek MT6737M អមដោយអង្គគណនាបួនគ្រាប់ Quad-core Cortex-A53 ល្បឿន 1.25 GHz និងប្រើប្រាស់អង្គក្រាហ្វិច Mali-T720MP2 ផ្តល់ជូននូវការដំណើរការបានយ៉ាងរលូនល្អឥតខ្ចោះតែម្តង។ ASUS Zenfone 3 Max មានទំហំ RAM ពីប្រភេទទំហំគឺ 2GB និង 3GB និងមានទំហំផ្ទុុកទិន្នន័យក្នុងម៉ាស៊ីនស្រាប់មានពីរទំហំដូចគ្នា 16GB និង 32GB និងអាចដាក់បន្ថែមបានរហូតដល់ 256GB ប្រភេទ microSD ។
ASUS Zenfone 3 Max ត្រូវបានដាក់ឲ្យដំណើរការដោយប្រព័ន្ធប្រតិបត្តិការ Android ជំនាន់ 6.0.1 Marshmallow អមដោយផ្ទៃយួស័រអិុនធើហ្វេសផ្ទាល់ខ្លួន ASUS ZenUI3.0 ផ្តល់ជូននូវផ្ទាំងកម្មវិធីកានតែទាក់ទាញនិងស្រស់ស្អាត។ ពិសេសនោះគឺទូរស័ព្ទស្មាតហ្វូនជំនាន់ថ្មីមួយនេះត្រូវបានភ្ជាប់មកជាមួយទ្រនាប់ស្គ៊ែនក្រយ៉ៅដៃ Finger Print ដែលមានសមត្ថភាពសំគាល់ក្រយ៉ៅដៃបានយ៉ាងរហ័សទាន់ចិត្ត ជាពិសេសវាមាននាទីអាចបញ្ជាកម្មវិធី និងមុខងារមួយចំនួនផ្ទាល់បានថែមទៀងផង ដោយចំណាយពេលត្រឹមតែ 0.3 វិនាទី តែប៉ុណ្ណោះ។
សរុបមក ASUS Zenfone 3 Max ជាទូរស័ព្ទស្មាតហ្វូនស៊េរីថ្មីដ៏ល្អវិចិត្រសម្រាប់ការប្រើប្រាស់ ព្រោះថា វាល្អទាំងរូបរាង ល្អទាំងកម្មវិធីក៏ដូចជាមុខងារសម្រាប់ប្រើប្រាស់ ដែលផ្តល់ជូនលោកអ្នកនៅគ្រប់កិច្ចការងារទាំងអស់ ក៏ដូចជាតម្លៃក៏សមល្មមក្នុងការជាវយកទៅប្រើប្រាស់ផងដែរ៕