កាលពីថ្ងៃទី 24 ខែធ្នូ ឆ្នាំ2016 កន្លងទៅនេះ នៅនៅក្នុងពិធីដាក់តាំងបង្ហាញរថយន្តស៊េរីថ្មីនៅផ្សារទំនើបអ៊ីអនម៉ល ក្រុមហ៊ុន United Auto Trading ដែលជាក្រុមហ៊ុននាំចូល និងចែកចាយរថយន្ត Chevrolet មកកាន់ប្រទេសកម្ពុជា បានបង្ហាញនូវរថយន្តស៊េរីថ្មី Chevrolet Trailblazer ឆ្នាំ 2017 ដែលជាប្រភេទរថយន្ត SUV នៅក្នុងទីផ្សារប្រទេសកម្ពុជា។
តាមប្រសាសន៍របស់ លោក ប៉ែន ពិសិដ្ឋ ដែលជានាយកគ្រប់គ្រងក្រុមហ៊ុនលក់រថយន្ត Chevrolet បានអោយដឹងថា ដោយសារតែសេដ្ឋកិច្ចនៅក្នុងប្រទេសកម្ពុជា មានការរីកចម្រើនជារៀងរាល់ឆ្នាំ ទីផ្សារលក់រថយន្តនៅកម្ពុជាក៏មានកំណើនជាបន្តបន្ទាប់ដែរ ដោយក្នុងនោះ ក្រុមហ៊ុនលក់រថយន្តផ្សេងៗ ក៏បាននាំចូលរថយន្តស៊េរីថ្មីៗ និងមានបច្ចេកវិទ្យាទំនើបៗ មកកាន់ប្រទេសកម្ពុជា។
លោកបានបញ្ជាក់ថា ដោយសារតែកំណើនទីផ្សារថយន្តនៅក្នុងប្រទេសកម្ពុជា កាន់តែមានសន្ទុះកើនឡើងជាបន្តបន្ទាប់នោះ ទើប Chevrolet បាននាំចូលរថយន្តម៉ូដែលថ្មីៗបន្ថែមទៀតជាច្រើន ដូចជា Chevrolet Trailblazer ឆ្នាំ 2017 នេះជាដើម ដើម្បីបង្ហាញជូនអតិថិជនរបស់យើង និងដើម្បីបំពេញតម្រូវការអតិថិជនរបស់យើងផងដែរ ។
Chevrolet Trailblazer 2017 គឺជាប្រភេទរថយន្ត SUV ដែលមានរូបរាងស្អាត ទាក់ទាញ និងមានភាពទាន់សម័យ ហើយនិងមានកម្លាំងម៉ាស៊ីន Duramax 2.8L ប្រភេទ(ម៉ាស៊ីនម៉ាស៊ូត) ដែលមានកំលាំងខ្លាំង និងមានសមត្ថភាពអាចឲ្យការធ្វើដំណើរកាន់តែល្អប្រសើរជាងមុន ពិសេស គឺវាជួយសន្សំសំចៃប្រេងឥន្ធនៈបានច្រើនជាងម៉ូដែលផ្សេងៗ។ នៅលើរថយន្តថ្មីនេះ ត្រូវបានក្រុមហ៊ុន បំពាក់នូវបច្ចេកវិទ្យាឈានមុខគេ និងរួមបញ្ចូលប្រព័ន្ធ MyLink infotainment ដែលជាបច្ចេកវិទ្យាថ្មីបំផុតរបស់ក្រុមហ៊ុន Chevrolet ផងដែរ។
បន្ថែមពីលើនេះ Chevrolet Trailblazer 2017 ក៏មានភ្ជាប់នូវសិនស័រសំរាប់រំលឹកអ្នកបើកបរ ដូចជាប្រកាសអាសន្ន ពីការបើកបរចេញពីគន្លងផ្លូវ ការជូនដំណឹងពីឧបសគ្គនៅខាងមុខដែលកំពុតែបើកបរនៅស្របជាមួយគ្នា រួមនឹងការជូនដំណឹងពីតំបន់ងងឹតគ្មានពន្លឺ ហើយនឹងសិនស័រជូនដំណឹងពីគំលាត និងការបើកបររបស់រថយន្តនៅខាងក្រោយផងដែរ។
លោកបានបន្តថា នៅក្នុងឆ្នាំ 2017 ខាងមុខនេះ ក្រុមហ៊ុន United Auto Trading រំពឹងថា ការលក់រថយន្ត Chevrolet នៅក្នុងប្រទេសកម្ពុជា នឹងមានការកើនឡើងខ្ពស់ជាមិនខាន។ ជាមួយគ្នានេះ ក្រុមហ៊ុន ក៏បានកំណត់គោលដៅរបស់ខ្លួនថា 2017 ក្រុមហ៊ុន នឹងជំរុញការលក់អោយបាន 500 គ្រឿងនៅក្នុងប្រទេសកម្ពុជា និងបានរៀបចំយុទ្ធសាស្ត្រមួយចំនួនសម្រាប់គាំទ្រការជំរុញការក់រថយន្តប្រភេទនេះថែមទៀតផង។
លោកបន្ថែមថា ដោយសារតែ រថយន្តម៉ាក Chevrolet ទើបតែបានចូលមកកាន់ទីផ្សារប្រទេសកម្ពុជា ហេតុដូចនេះ នៅមានបញ្ហាជាច្រើន សម្រាប់ការពង្រីកទីផ្សារ ហើយអតិថិជន ក៏មិនសូវស្គាល់ច្បាស់ពីម៉ាករថយន្តនីមួយៗ ច្បាស់លាស់របស់ Chevrolet ។
ក្រុមហ៊ុន United Auto Trading បានចាប់ផ្ដើមពង្រឹងនូវយុទ្ធសាស្ត្រមួយចំនួន ដើម្បីអោយអតិថិជនស្គាល់ Brand Chevrolet របស់យើង នៅក្នុងនោះ ក្រុមហ៊ុន United Auto Trading នឹងធ្វើការផ្សព្វផ្សាយតាមបណ្ដាញសារព័ត៌មាន និងពង្រឹងសេវាកម្មរបស់យើង អោយបានល្អថែមទៀត ដើម្បីផ្ដល់ជូនអតិថិនទាំងអស់ ហើយ ក្រុមហ៊ុន ក៏បានត្រៀមបង្កើតអគារតាំងបង្ហាញនៅតាមបណ្ដាខេត្តមួយចំនួនដែលមានសក្ដានុពលផងដែរ។