ថ្មីៗនេះ ក្រុមហ៊ុន Canon បានប្រកាសចេញនូវម៉ាស៊ីនព្រីនរូបភាពខ្នាតតូចបំផុតដែលមិនប្រើប្រាស់នូវទឹកខ្មៅនោះទេសម្រាប់ការព្រីនរូបភាពនោះ។ ម៉ាស៊ីនព្រីនរូបភាព Canon Mini Photo Printer ខ្នាតតូចនេះ អាចរក្សានូវការចងចាំគ្រប់ពេលវេលាដែលអ្នកបានផ្តិតយកជាមួយនឹងស្មាតហ្វូនរបស់អ្នក។ អ្នកអាចធ្វើការផ្តិតរូបភាពដ៏ស្រស់ស្អាត និងស្ទាយ៍ប្លែកៗរបស់អ្នកចេញពីស្មាតហ្វូននេះបានយ៉ាងងាយស្រួលទៅតាមចិត្តរបស់អ្នកជាមួយនឹងម៉ាស៊ីនព្រីនខ្នាតតូចមួយនេះ។
បច្ចេកវិទ្យាព្រីនស្ងួត (Dry Printing Technology) ៖ ម៉ាស៊ីនព្រីនខ្នាតតូច Canon Mini Photo printer នេះ ប្រើប្រាស់នូវបច្ចេកវិទ្យាថ្មី ZINK Zero Ink Technology របស់ក្រុមហ៊ុន ZINKដែលជាបច្ចេកវិទ្យានៃការព្រីនស្ងួតដែលអាចធ្វើការព្រីនពណ៌កូល័រដោយមិនប្រើប្រាស់នូវប្រអប់ទឹកថ្នាំនោះទេ។ ម៉ាស៊ីននេះអាចធ្វើការព្រីនរូបភាពនៅក្នុងទំហំ 2x3-inch យ៉ាងស្រស់ស្អាតហើយវាមិនមានស្នាមកោសឆ្កូតនោះទេ។ ម៉ាស៊ីននេះ មានរូបរាងតូចដែលងាយស្រួលទុកដាក់ និងងាយក្នុងការចល័តថែមទៀតផង។
ការព្រីនរូបភាពពីចម្ងាយចេញពីស្មាតហ្វូន (Wireless Print) ៖ ម៉ាស៊ីនព្រីនរូបភាពនេះមានទម្ងន់ត្រឹមតែ 160 ក្រាម ជាមួយនឹងរូបរាងស្តើង និងទំហំតូចដែលធ្វើឱ្យម៉ាស៊ីនព្រីន Mini Photo printer អាចដាក់នៅក្នុងហោប៉ាវ កាបូបស្រី កាបូបដៃវែង និងអាវក្រៅថែមទៀត។ ម៉ាស៊ីនព្រីនរូបភាពនេះភ្ជាប់ជាមួយនឹងថាមពលថ្មស្រាប់ដែលអ្នកមិនចាំបាច់ត្រូវការភ្ជាប់ទៅកាន់ព្រីភ្លើងនោះទេ។ សម្រាប់ការតភ្ជាប់តាមរយៈប្រព័ន្ធ Bluetooth គឺពិតជាមានភាពងាយស្រួលណាស់ដោយគ្រាន់តែចុចនៅលើប៊ូតុងមួយដែលនៅគែមខាងរបស់ម៉ាស៊ីនព្រីនខ្នាតតូចនេះ។
កម្មវិធីសម្រាប់តភ្ជាប់ម៉ាស៊ីនព្រីន Canon Mini Print Mobile App៖ ម៉ាស៊ីនព្រីនរូបភាពខ្នាតតូចនេះ មានរូបរាងតូចច្រឡឹងដែលផ្នែកម្ខាងរបស់វាគឺមានពណ៌ស ហើយវាក៏អាចដំណើរការបានតាមរយៈកម្មវិធី Canon Mini Print app ដែលអាចប្រើប្រាស់បាននៅលើឧបករណ៍ដែលប្រើប្រាស់នូវ iOS និងAndroid OS បាន។ អ្នកប្រើប្រាស់ជាច្រើនអាចធ្វើការថតរូបភាពតាមរយៈកម្មវិធីកាមេរ៉ា ឬក៏អាចទាញយករូបភាពជាច្រើនបានចេញពីអនឡាញបានដូចជាកម្មវិធី Facebook, Instagram, Google Drive និង Dropbox ថែមទៀត។
សម្រាប់កម្មវិធីនេះភ្ជាប់ជាមួយនឹងបណ្តាល័យសម្រាប់ការកែប្រែរូបភាពជាមួយនឹងមុខងារដូចជាកន្លែងកែប្រែរូបភាព photo-editing tools, ការបង្កើតនូវ filters, ការបង្កើតនូវស៊ុមរូបភាព photo frames, ការបង្កើតនូវតែម stamps និងប្រអប់សរសេរ text boxes ដែលអាចធ្វើការបន្ថែមនូវស្រទាប់ Layers ទៅលើរូបភាពដែលអ្នកថតបាន។ វាក៏មានការពង្រឹងទៅលើមុខងារ augmented reality (AR) និងការបន្ថែមនូវ Artwork មុនពេលដែលធ្វើការព្រីនថែមទៀតផង។ ម៉ាស៊ីនព្រីនខ្នាតតូច Canon Mini Photo Printer គឹមាន 3 ពណ៌គឺ Slate Grey, Rose Gold និង Mint Green ហើយនៅក្នុងប្រអប់របស់ម៉ាស៊ីនព្រីននេះគឺមានម៉ាស៊ីនព្រីនខ្នាតតូចមួយ ក្រដាសព្រីនរូបភាព 10 សន្លឹក និងខ្សែបញ្ចូលថាមពលថ្មថែមទៀត។
