ការរីករាលដាលនៃជំងឺកូវីដ 19 បាននឹងកំពុងបន្តជះឥទ្ធិពលយ៉ាងធ្ងន់ធ្ងរដល់អាជីវកម្មជាច្រើននៅទូទាំងពិភពលោកដោយក្នុងនោះរាប់បញ្ចូលទាំងគ្រឿងបរិក្ខាអេឡិចត្រូនិចដែលមានតម្លៃថ្លៃៗផងដែរ។ ប៉ុន្តែទោះជាយ៉ាងណាសម្រាប់អាជីវកម្មស្មាតធីវីរបស់ Samsung វិញត្រូវបានគេមើលឃើញថាមានប្រតិបត្តិការទីផ្សារល្អគួរអោយកត់សំគាល់នេះបើតាមក្រុមអ្នកវិភាគទីផ្សារមកពីស្ថាប័ន Omdia។ ក្រុមហ៊ុនបច្ចេកវិទ្យាយក្សរបស់កូរ៉េខាងត្បូងមួយនេះលក់ទូរទស្សន៍ស្មាតធីវីបានច្រើនជាងឆ្នាំមុនទោះបីជាតម្រូវការទីផ្សារពិភពលោកមានការធ្លាក់ចុះក៏ដោយ។
យោងតាមរបាយការណ៍ចុងក្រោយនេះបានអោយដឹងថា “ក្រុមហ៊ុនសាមសុងទទួលបានចំណែកទីផ្សារទូរទស្សន៍នៅទូទាំងពិភពលោកចំនួន 31,3% គិតត្រឹមឆមាសទីមួយក្នុងឆ្នាំ 2020 ដែលមានកំណើនកើនឡើង 1,3% បើធៀបនឹងឆមាសទី 1 ក្នុងឆ្នាំ 2019។ ក្នុងរបាយការណ៍ដដែលបានបញ្ជាក់ថាការនាំចេញស្មាតធីវីរបស់ Samsung ទៅកាន់ទីផ្សារពិភពលោកគឺមានចំនួន 20,7% និងលក់ចេញបានចំនួន 19.07 លានគ្រឿងនៅកំឡុងឆមាសទី 1 ឆ្នាំនេះ ដោយកាលពីកំឡុងពេលដូចគ្នានេះកាលពីឆ្នាំ 2019 ការលក់ស្មាតធីវីរបស់ Samsung គឺមានចំនួន 19.02 លានគ្រឿង។
នៅក្នុងចំណោមស្មាតធីវី Samsung ដែលបានលក់ចេញគឺម៉ូដែល QLED TV មានទីផ្សារល្អជាងគេដោយលក់បានចំនួន 1.4 លានគ្រឿងកើនឡើង 28% ពីមួយឆ្នាំទៅមួយឆ្នាំកាលពីត្រីមាសមុនក្នុងឆ្នាំនេះ។ ចំនែកទីផ្សារស្មាតធីវី Samsung ដែលមានអេក្រង់ទំហំ 75” ឡើងទៅបានក្តោបក្តាប់ចំនែកទីផ្សារនៅអាមេរិកខាងជើងចំនួន 65.5% និងទីផ្សារប៉ែកអឺរ៉ុបចំនួន 54%។
ក្រុមអ្នកវិភាគបានព្យាករណ៍ទៀតថា ការលក់ស្មាតធីវីរបស់ Samsung នឹងមានការកើនឡើងជាបន្តទៀតនៅឆមាសទី 2 ឆ្នាំនេះដោយសារជារដូវកាលវិស្សមកាល។ គិតត្រឹមពាក់កណ្តាលឆ្នាំ 2020 នេះការលក់ស្មាតធីវីសរុបនៅលើទីផ្សារទូទាំងពិភពមានចំនួន 91.87 លានគ្រឿងធ្លាក់ចុះ 7.7% បើធៀបនឹងរយៈពេលដូចគ្នាកាលពីឆ្នាំ 2019 នោះក៏ដោយសារតែអតិថិជនបានកាត់បន្ថយការចំនាយរបស់ពួកគេព្រោះថាសេដ្ឋកិច្ចពិភពលោកកំពុងជូបវិបត្តិយ៉ាងធ្ងន់ធ្ងរដោយសារការរីករាលដាលនៃជំងឺកូវីដ 19។
ជាមួយគ្នានេះដែរចំនែកទីផ្សារស្មាតធីវីរបស់ក្រុមហ៊ុន LG ក៏ទទួលបានចំនួន 11.7% ផងដែរនៅទីផ្សារស្មាតធីវីទូទាំងពិភពលោកនៅឆមាសទី 1 ឆ្នាំ 2020 ដែលកើនឡើង 1% ធៀបនឹងឆ្នាំមុន។ ក្រុមហ៊ុននេះបាននាំចេញស្មាតធីវីទៅកាន់ទីផ្សារពិភពលោកបានចំនួន 10,79 លានគ្រឿងដែលមានចំនែកទីផ្សារនាំចេញចំនួន 17% នៅកំឡុងពេលដូចគ្នានេះ៕