XPS15-2020 គឺជាម៉ាស៊ីនកុំព្យូទ័រប្រភេទ 2-in-1 Laptop របស់ក្រុមហ៊ុន Dell ដែលផលិតចេញមកប្រកបដោយភាពស្រស់ស្អាតប្រណិតមានតួរខ្លួនបែប Premium ព្រមទាំងបំពាក់មកជាមួយនឹងគ្រឿងបង្គុំខាងក្នុងដែលមានខ្លាំងក្លាជំនាន់ចុងក្រោយបំផុតសម្រាប់តម្រូវទៅតាមទំហំនៃការប្រើប្រាស់សក្នុងកិច្ចការងារប្រចាំថ្ងៃរបស់យើង។ ដូច្នេះចង់ដឹងថា Dell XPS 15 ស៊េរីថ្មីឆ្នាំ 2020 នេះមានចំនុចខ្លាំងអ្វីខ្លះ? ខាងក្រោមនេះគឺជាចម្លើយដែលក្រុមការងារគេហទំព័រ និងទស្សនាវដ្តីពិភពអេឡិចត្រូវនិកអាចឆ្លើយប្រាប់ទៅប្រិយមិត្តបានក្នុងពេលនេះ។
ការរចនារូបរាងឡើងយ៉ាងប្រណិត
ចំនុចដែលទាក់ភ្នែកដំបូងរបស់យើងសម្រាប់ម៉ាស៊ីនកុំព្យូទ័រស៊េរីថ្មីមួយនេះគឺការរចនារូបរាងខាងក្រៅរបស់វាតែម្តង។ ម៉ាស៊ីនកុំព្យូទ័រ Dell XPS15 ស៊េរីថ្មីនេះត្រូវបានក្រុមហ៊ុនបង្គុំតួរខ្លួនឡើងពីលោហៈធាតុប្រភេទ Carbon Fiber ដែលមានការដុសខាតបានយ៉ាងភ្លឺរលោងមើលទៅពិតជាស្អាតប្រណិតមែនទែន។ ម៉ាស៊ីនកុំព្យូទ័រយួរដៃនេះមានកម្រាស់ 18 ម.ម ជាមួយទំងន់សរុបទាំងថ្មគឺ 1.83 គីឡូក្រាម។
បន្ទះអេក្រង់ធំទូលាយល្អផ្តល់ភាពងាយស្រួលក្នុងការបំពេញកិច្ចការងារ
Dell XPS 15 ស៊េរីថ្មីនេះបំពាក់មកជាមួយនឹងអេក្រង់ទំហំ 15.6” ខ្នាត 16:10 ratio ជាប្រភេទបន្ទះបង្ហាញ IPS LCD Infinity Edge ជាមួយនឹងការរចនាអេក្រង់បានយ៉ាងស្រស់ស្អាតមានកម្រាស់ស្តើង។ អេក្រង់របស់វាមានស្រោបដោយកញ្ចក់ការពារចំណាំង Anti-Glare និងមានកម្រិតពន្លឺ 500 nits ហើយវាមានសមត្ថភាពទ្រទ្រង់ការបង្ហាញចេញបានក្នុងកម្រិត Ultra-HD+ ជាមួយទំហំរីសូលូហ្ស៊ិន 1920 x 1200 ភិចសែល និងទ្រទ្រង់បច្ចេកវិទ្យាចាក់ពណ៌ sRGB 100% ដូចនេះវាជួយអោយគុណភាពនៃការចាក់ពណ៌ចេញពីផ្ទៃអេក្រង់របស់វាបានច្បាស់ដិតស្រស់ត្រជាក់ភ្នែក។
កំលាំងម៉ាស៊ីនខ្លាំងជំនាន់ចុងក្រោយ
Dell XPS 15-2020 ប្រើប្រាស់ CPU ជំនាន់ទី 10 របស់ Intel ស៊េរី Core i5 លេខ 10300H មានអង្គគណនាចំនួន 4-Core- 8MB Cache រត់បានក្នុងល្បឿន 4.5GHz និងមានអង្គក្រាហ្វិចស៊េរី Intel UHD។ បន្ថែមពីនេះវាក៏មានជំនួយល្បឿនប្រតិបត្តិការពីបច្ចេកវិទ្យា Intel Turbo Boost Technology 2.0 ជាមួយរ៉េមទំហំ 8GB ប្រភេទ DDR4-2933MHz ថែមទៀតផង។
ដូចនេះ រាល់កិច្ចការងារដែលយើងធ្វើប្រតិបត្តិការនៅលើម៉ាស៊ីនកុំព្យូទ័រមួយនេះគឺពិតជាមានភាពរលូនលឿនរហ័សទាន់ចិត្តតែម្តង។ សម្រាប់ថាសរឹងទុកដាក់ឯកសារសំខាន់ៗ និងទិន្នន័យផ្សេងៗនៅលើ XPS 15 គឺជាប្រភេទ M.2 PCIe NVMe Solid State Drive មានទំហំ 256GB។ Dell XPS 15 -2020 ទ្រទ្រង់ការដំឡើងបានជាមួយប្រព័ន្ធប្រតិបត្តិការ Windows 10 Home 64bit។
កំលាំងថ្ម និងគុណសម្បត្តិផ្សេងៗមួយចំនួនទៀត
Dell XPS 15-2020 មានថ្មខ្នាត 3-Cell កំលាំងផ្ទុកថាមពល 56Whr ដែលការសាកថ្មពេញម្តងវាអាចកំដរការប្រើប្រាស់សម្រាប់បំពេញកិច្ចការងារទូទៅដូចជាប្រើជាមួយកម្មវិធី World ឬ Excel ជាដើមបានពេញមួយថ្ងៃ និងការស្រ្ទីមវីដេអូមើលនៅលើ Netflix បានរហូតដល់ទៅជាង 16 ម៉ោងឯណោះ។
ក្រៅពីនេះ Dell XPS 15-2020 មានភ្ជាប់មកនូវបច្ចេកវិទ្យា Bluetooth 5.0 និង Killer Wi-Fi 6 AX1650 (2x2) ដែលជួយធ្វើអោយការតភ្ជាប់ចែករំលែកទិន្នន័យ និងការប្រើប្រាស់ទិន្នន័យលើប្រព័ន្ធអ៊ីនធ័រណិតបានលឿនរហ័សបំផុត។ សម្រាប់រន្ធដោតសំខាន់ៗនៅលើ Dell XPS 15 នេះមានដូចជា រន្ធ USB-C v3.1 ឬ Thunderbolt 3 ចំនួន 3 ដែលដើរតួរធ្វើជារន្ធចម្លងទិន្នន័យចេញចូលផង ជារន្ធសាកថ្មផង និងរន្ធ DisplayPort ផង, រន្ធ HDMI 2.0, រន្ធដោតកាស 3.5mm Combo Jack និងរន្ធអានម៉េមូរីកាតជាដើម។
Dell XPS 15-2020 ត្រូវបាន Dell ដាក់លក់នៅលើវ៉ិបសាយផ្លូវការណ៍របស់ក្រុមហ៊ុនជាមួយតម្លៃខ្ទង់ជិត $1,200៕
