ស្មាតហ្វូនស៊េរីថ្មីរបស់ក្រុមហ៊ុន Samsung ដែលមានការរចនារូបរាងកាន់តែប្លែកជាប្រភេទស្មាតហ្វូនថ្នាក់កណ្តាលនោះគឺ Galaxy A series 2018។ យោងតាមព័តមានដែលេចេញផ្សាយនានា បានបញ្ជាក់ថា ស្មាតហ្វូនត្រកូល Galaxy A ជំនាន់ថ្មីនេះ មានការរចនារូបរាងសារជាថ្មី ដែលមើលទៅពិតជាស្រស់ស្អាតទាក់ទាញចិត្តអ្នកប្រើប្រាស់បំផុត។ សម្រាប់ស្មាតហ្វូន Galaxy A5 2018 ត្រូវបាន SamMobile ទម្លាយចេញតាមរយៈក្រុមហ៊ុនផលិតស្រោមទូរស័ព្ទរបស់ស្មាតហ្វូននេះ។ នៅក្នុងរូបភាព Renders នេះ គឺបានបង្ហាញអំពីជម្រើសនៃពណ៌ថ្មីជាច្រើនដែលនឹងមានឱ្យជ្រើសរើសសម្រាប់ស្មាតហ្វូន Galaxy A5 2018។ អ្វីដែលសំខាន់នោះ វាបង្ហាញអំពីការបែកធ្លាយរូបរាងពិតរបស់ស្មាតហ្វូននេះផងដែរ។
ដូចគ្នាទៅនឹងស្មាតហ្វូន Galaxy S8, Galaxy S8+, Galaxy Note 8 ស្មាតហ្វូន Galaxy A5 2018 នឹងបំពាក់មកជាមួយនូវអេក្រង់ប្រភេទ Infinity Display ដែលគ្រាន់តែមិនមានគែមកោងប៉ុណ្ណោះ។ សម្រាប់ស្មាតហ្វូន Galaxy A5 2018 នេះ គឺមានស៊ុមព័ទ្ធអេក្រង់ស្តើងផងដែរ។ ចាប់តាំងពីស្មាតហ្វូន Galaxy A5 2018 នេះប្រើប្រាស់នូវស៊ុមព័ទ្ធអេក្រង់ស្តើងនោះ ប្រព័ន្ធស្កេនក្រយ៉ៅដៃរបស់ស្មាតហ្វូននេះក៏ត្រូវគេដឹងថាបំពាក់នៅផ្នែកខាងក្រោយរបស់វាវិញផងដែរគឺនៅពីក្រោមប្រព័ន្ធកាមេរ៉ាផងដែរ។ នេះគឺជាស្មាតហ្វូនត្រកូល Galaxy A Series ដំបូងបំផុតដែលប្រើប្រាស់ប្រព័ន្ធស្កេនក្រយ៉ៅដៃនៅផ្នែកខាងក្រោយនោះ។
ក្រៅពីការដឹងអំពីទីតាំងនៃប្រព័ន្ធស្កេនក្រយ៉ៅដៃ នៅគែមផ្នែកខាងឆ្វេងរបស់ស្មាតហ្វូនស៊េរីថ្មីនេះ នឹងប្រើប្រាស់នូវប៊ូតុង Bixby ខណៈពេលដែលនៅគែមខាងស្តាំគេសង្កេតឃើញមាន ប៊ូតុង Power ។ សម្រាប់លក្ខណៈសម្បត្តិរបស់ស្មាតហ្វូន Galaxy A5 2018 ភ្ជាប់ជាមួយនឹងអេក្រង់ Full HD+ 2160x1080 ទំហំ 5.5 អ៊ីង Infinity Display បន្ទះឈីប Exynos 7885 processor ជាមួយនឹងរ៉េមទំហំ 4GB និងម៉េមូរីក្នុងម៉ាស៊ីនទំហំ 32GB ។ ស្មាតហ្វូននេះ ក៏នឹងប្រើប្រាស់នូវប្រព័ន្ធមុខងារ Always On Display បច្ចេកវិទ្យា IP68 សម្រាប់ការពារការជ្រាបទឹក និងធូលីផងដែរ, Samsung Pay និងរន្ធ USB Type-C port ផងដែរ។ ស្មាតហ្វូននេះប្រើប្រាស់រន្ធដោតកាសស្តាប់ 3.5mm Headphone ផងដែរ។ ស្មាតហ្វូន Galaxy A5 នឹងប្រកាសបង្ហាញខ្លួននៅក្នុងពេលណាមួយនៅក្នុងខែមករាឆ្នាំ 2018 ជាមួយនឹងស្មាតហ្វូន Galaxy A7។ ស្មាតហ្វូន Galaxy A5 និង Galaxy A7 នឹងមានលក្ខណៈសម្បត្តិដូចគ្នាខុសប្លែកតែ Galaxy A7 មានអេក្រង់ 6 អ៊ីង Infinity Display តែប៉ុណ្ណោះ៕