យើងនៅសល់រយៈពេលជិតមួយខែទៀតនៅពេលដែលក្រុមហ៊ុនបច្ចេកវិទ្យាយក្ស Samsung នឹងបង្ហាញចេញនូវស្មាតហ្វូនស៊េរីថ្មីរបស់ខ្លួនម៉ូដែល Galaxy Note 9។ ក្រុមហ៊ុនមានការបញ្ជាក់ត្រឹមតែកាលបរិច្ឆេទ សម្រាប់ព្រឹត្តិការណ៍នេះ ប៉ុណ្ណោះ ហើយសម្រាប់តម្លៃ និងព័ត៌មានជាច្រើនទៀតរបស់ស្មាតហ្វូននេះ នឹងបញ្ជាក់នៅថ្ងៃទី 9 ខែសីហានេះផងដែរ។ នៅក្នុងរបាយការណ៍ថ្មីមួយចេញពីប្រទេសកូរ៉េខាងត្បូង បានបញ្ជាក់ថា ការកម្មង់ទិញមុនស្មាតហ្វូន Galaxy Note 9 នឹងចាប់ផ្តើមនៅពាក់កណ្តាលខែសីហានេះ។
ស្មាតហ្វូនស៊េរីថ្មី Galaxy Note 9 នឹងបង្ហាញជាផ្លូវការនៅក្នុងរយៈពេលពីរសប្តាហ៍លឿនជាងស្មាតហ្វូនជំនាន់មុន។ ក្រុមហ៊ុន Samsung ប្រកាសចេញស្មាតហ្វូន Galaxy Note 8 នៅថ្ងៃទី 23 ខែសីហាឆ្នាំមុននេះ ហើយស្មាតហ្វូននេះ ដាក់លក់នៅក្នុងថ្ងៃទី 15 ខែកញ្ញា។ ក្រុមហ៊ុន Samsung នៅមិនទាន់បញ្ជាក់អំពីថ្ងៃកាលបរិច្ឆេទនៃការលក់នៅឡើយទេ ប៉ុន្តែយើងដឹងថាកាលបរិច្ឆេទនៃការប្រកាសបង្ហាញស្មាតហ្វូននេះ គឺនៅថ្ងៃទី 9 ខែសីហានេះ។
មានរបាយការណ៍ជាច្រើនដែលបញ្ជាក់អំពីកាលបរិច្ឆេទនៃការលក់ស្មាតហ្វូនស៊េរីថ្មី Galaxy Note 9 គឺនៅថ្ងៃទី 24 ខែសីហានេះ ហើយនៅថ្ងៃនេះ ក៏មានរបាយការណ៍ថ្មីមួយទៀតចុងក្រោយ បានអះអាងថា ការកម្មង់ទិញស្មាតហ្វូន Galaxy Note 9 នឹងចាប់ផ្តើមពីពាក់កណ្តាលខែសីហានេះនៅក្នុងប្រទេសកូរ៉េខាងត្បូងវិញម្តង។ នេះមិនមែនជារឿងដែលថ្មីនោះទេ។ និយាយទៅនេះ គឺជារឿងធម្មតាទៅហើយដែលស្មាតហ្វូនស៊េរីថ្មី បង្ហាញខ្លួនរួចហើយ ប៉ុន្មានថ្ងៃក្រោយមកនឹងចាប់ផ្តើមការកម្មង់ទិញមុននោះ។ ការកម្មង់ទិញមុនសម្រាប់ក្រុមហ៊ុនចែកចាយរបស់ក្រុមហ៊ុន Samsung និងដៃគូសហការសម្រាប់ស្មាតហ្វូន Galaxy Note 9 នឹងចាប់ផ្តើមរយៈពេលមួយសប្តាហ៍ក្រោយស្មាតហ្វូននេះប្រកាសបង្ហាញវត្តមានផងដែរ។
ស្មាតហ្វូនស៊េរីថ្មីនេះប្រហែលជាបង្ហាញខ្លួនយឺតនៅក្នុងទីផ្សារជាច្រើនផងដែរ ប៉ុន្តែយើងរំពឹងថាសម្រាប់ទីផ្សារធំៗជាច្រើននោះនឹងដាក់លក់ស្មាតហ្វូន Galaxy Note 9 ក្រោយថ្ងៃប្រកាសបង្ហាញយ៉ាងលឿនបំផុត។ ស្មាតហ្វូន Galaxy Note 8 អាចរកទិញបាននៅលើប្រទេសចំនួន 42 នៅលើពិភពលោកដែលមានដូចជាសហរដ្ឋអាមេរិក កូរ៉េខាងត្បូង សិង្ហបុរី និងទីផ្សារជាច្រើនទៀតនៅអ៊ឺរ៉ុប៕
