អ្នកសរសេប្លុកបច្ចេកវិទ្យាដ៏ល្បីល្បាញម្នាក់ មកពីប្រទេសចិន បានធ្វើការចែករំលែកនូវរូបភាព Screenshot នៃការសន្ទនាជាមួយនឹងជំនួយការឆ្លាតវៃ Jovi voice assistant នៅលើស្មាតហ្វូនស៊េរីថ្មី vivo NEX ។ សម្រាប់ការសន្ទនានេះទម្លាយថា ក្រុមហ៊ុនបច្ចេកវិទ្យា vivo នឹងប្រកាសបង្ហាញនូវស្មាតហ្វូន vivo X23 នៅថ្ងៃទី 20 ខែសីហាខាងមុខនេះ។ នៅក្នុងរូបភាពខាងក្រោមនេះ អ្នកទម្លាយរបស់ចិននេះ បានសួរពីរសំណួរទៅកាន់ជំនួយការ Jovi។ សំណួរទីមួយ បាននិយាយថា តើវាអាចដឹងអំពីអ្វីគ្រប់យ៉ាងរបស់ស្មាតផលិតផលស៊េរីថ្មីរបស់ក្រុមហ៊ុន vivo។
ជំនួយការ Jovi នេះ អាចធ្វើការឆ្លើយតបទៅនឹងសំណួរដែលគាត់សួរអំពីស្មាតហ្វូន vivo X23 ។ អ្នកសរសេរប្លុកបច្ចេកវិទ្យានេះបន្ទាប់មកក៏សួរអំពីកាលបរិច្ឆេទនៃការសម្ភោធន៍ស្មាតហ្វូន vivo X23 ហើយវាក៏ឆ្លើយថា នៅថ្ងៃទី 20 ខែសីហានេះ នឹងមានអ្វីដែលអស្ចារ្យកើតឡើង។ ទោះបីជាស្មាតហ្វូន Vivo នៅមិនទាន់បញ្ចេញនូវព័ត៌មានរបស់ស្មាតហ្វូនស៊េរីថ្មី vivo X23 នេះក៏ដោយ ប៉ុន្តែជំនួយការឆ្លាតវៃ Jovi assistant ក៏ធ្វើការទម្លាយនូវកាលបរិច្ឆេទរបស់ស្មាតហ្វូននេះផងដែរ។ វាហាក់ដូចជា ក្រុមហ៊ុននេះប្រហែលជាបោះបង់ចោលនូវឈ្មោះស្មាតហ្វូន X22 សម្រាប់ស្មាតហ្វូនត្រកូល X Series ហើយពេលនេះវាហាក់ដូចជាក្រុមហ៊ុនត្រៀមសម្ភោធន៍ស្មាតហ្វូន X23 ផងដែរ។
ថ្មីៗនេះ ក្រុមហ៊ុន OPPO ដែលជាបងប្អូនរបស់ក្រុមហ៊ុន vivo នោះក៏ប្រកាសបង្ហាញនូវស្មាតហ្វូន OPPO R17។ ដូចនេះវាពិតជាអាចទៅរួចដែលវាមានការប្រកាសបង្ហាញនូវស្មាតហ្វូន vivo X23 នឹងធ្វើឡើងនៅក្នុងពេលឆាប់ៗនេះ។ សម្រាប់លក្ខណៈសម្បត្តិរបស់ស្មាតហ្វូន vivo X23 នៅមិនទាន់បញ្ចេញនៅឡើយទេ។ ស្មាតហ្វូននេះមានការរចនារូបរាងស្រដៀងគ្នាទៅនឹងស្មាតហ្វូន R17 ។ ស្មាតហ្វូន vivo X23 នឹងបង្ហាញខ្លួនជាមួយនឹងពីរម៉ូដែលប្រើប្រាស់បន្ទះឈីប Snapdragon 670 និង Snapdragon 710 ។
ស្មាតហ្វូននេះ អាចក្លាយជាស្មាតហ្វូនដំបូងបំផុត ដែលមានរ៉េមទំហំ 10GB ហើយវាក៏មានម៉ូដែលប្រើប្រាស់នូវរ៉េមទំហំ 6GB+4GB ផងដែរ។ នៅក្នុងក៏មានការទម្លាយថា ក្រុមហ៊ុន vivo អាចនឹងក្លាយជាក្រុមហ៊ុនបច្ចេកវិទ្យាដំបូងគេបំផុតដែលប្រកាសបង្ហាញស្មាតហ្វូនដែលមានរ៉េមទំហំ 10GB ។ ស្មាតហ្វូនជំនាន់មុនរបស់វាប្រើប្រាស់នូវបច្ចេកវិទ្យាស្កេនក្រយ៉ៅដៃក្រោមអេក្រង់ in-display fingerprint scanner ។ កាលពីពេលមុននេះ ក្រុមហ៊ុន vivo ក៏ប្រកាសបង្ហាញម៉ូដែលពីរស៊េរីគឺ V1809A និង V1809T ដែលទទួលស្គាល់ពី 3C នៅក្នុងប្រទេសចិន។ ស្មាតហ្វូននេះក៏ទ្រទ្រង់នូវបច្ចេកវិទ្យា 22.5W fast charging ផងដែរ៕
