ថ្មីៗនេះ លោក ផាន់ តាំ ដែលជាអនុរដ្ឋមន្រ្តីក្រសួងព័ត៌មានវៀតណាម និងទំនាក់ទំនង (MIC) បានថ្លែងសុន្ទរកថា នៅក្នុងអំឡុងពេលកិច្ចប្រជុំជាមួយនឹងលោកអគ្គនាយកកាសែត Digitimes បាននអោយដឹងថា “បច្ចុប្បន្នប្រទេសវៀតណាមមានប្រជាជនជិត 100 លាននាក់ ដែលប្រជាជនចំនួនជាង 70 លាននាក់ គឺជាអ្នកប្រើទូរស័ព្ទ និងជាអ្នកប្រើអ៊ិនធឺណិត ដែលជាមូលដ្ឋានគ្រឹះដ៏រឹងមាំសម្រាប់ការអភិវឌ្ឍស្ថេរភាពនៃប្រព័ន្ធបច្ចេកវិទ្យាព័ត៌មាន និងទូរគមនាគមន៍ (ICT) ក្នុងប្រទេស។
យោងតាមស្ថិតិរបស់ MIC បានបង្ហាញថា ផលិតកម្មឧស្សាហកម្ម ICT របស់វៀតណាម មានចំនួនទឹកប្រាក់សរុប 91,59 ពាន់លានដុល្លារអាមេរិកនៅក្នុងឆ្នាំ 2017 ដោយបានកើនឡើង 35,3% ពី 67,69 ពាន់លានដុល្លារនៅក្នុងឆ្នាំ 2016 ជាមួយនឹងចំនួនកំណើនដែលបង្ហាញពីការរីកចម្រើននៃឧស្សាហកម្មអេឡិចត្រូនិករបស់ប្រទេស។ ផលិត ផល គ្រឿងអេឡិចត្រូនិចរបស់ក្រុមហ៊ុនអេឡិចត្រូនិក Samsung នៅក្នុងប្រទេសវៀតណាម គឺជាប្រភពដ៏សំខាន់នៃការនាំចេញរបស់ ICT ក្នុងប្រទេសវៀតណាម ប៉ុន្តែក្រុមហ៊ុននេះ ទើបតែដាក់បង្ហាញរោងចក្ររបស់ខ្លួននៅក្នុងប្រទេសឥណ្ឌាហើយក៏ទំនងជាប្រឈមនឹងការប្រកួតប្រជែងកាន់តែខ្លាំងផងដែរ។
ពេលនេះ ឧស្សាហកម្មអេឡិចត្រូនិក របស់វៀតណាម គឺពឹងផ្អែកយ៉ាងខ្លាំងទៅលើការនាំចេញ និងការរួមចំណែក របស់ក្រុមហ៊ុន Samsung។ ដូច្នេះហើយ MIC សង្ឃឹមថា នឹងមានការវិនិយោគបន្ថែមទៀតក្នុងការអភិវឌ្ឍបច្ចេកវិទ្យា IC និងប្រព័ន្ធបច្ចេកវិទ្យា 5G ដើម្បីបង្កើនភាពចម្រុះនៃឧស្សាហកម្មហើយក៏បង្ហាញពីកង្វល់ដ៏ធំធេងអំពីថាតើកម្មវិធីទីក្រុងទំនើបអាចនាំមកនូវឱកាសកាន់តែច្រើនសម្រាប់ឧស្សាហកម្មក្នុងស្រុកដែរ ឬយ៉ាងណា។ លោក ផាន តាំ បានសង្កត់ធ្ងន់ថា “ប្រទេសវៀតណាមមិនអាចអភិវឌ្ឍន៍មូលដ្ឋានរឹងមាំនៅលើទីផ្សារបានទេ ប្រសិនបើបច្ចេកវិទ្យារបស់ខ្លួនបរាជ័យក្នុងការបំពេញតាមស្តង់ដារលើឆាកទីផ្សារអន្តរជាតិ”។
MIC បានប៉ាន់ស្មានថា តម្លៃផលិតកម្មប្រចាំឆ្នាំនៃឧស្សាហកម្មផលិត Software របស់វៀតណាម នឹងមានចំនួន 3,8 ពាន់លានដុល្លារសម្រាប់ឆ្នាំ 2017 កើនឡើង 24% ពីឆ្នាំ 2016។ ក្នុងនោះការប្រើប្រាស់កម្មវិធីរបស់ ICT សម្រាប់សាលាបឋមសិក្សាមានចំនួនប្រមាណ 60% និង 80% សម្រាប់ថ្នាក់សិក្សានៅវិទ្យាល័យ ដែលបានផ្តល់កុំព្យូទ័រ និងបង្រៀនតាមប្រព័ន្ធអ៊ិនធ័រណេត។
ចំពោះកម្មវិធីធនាគារពាណិជ្ជទាំងអស់ បានផ្តល់សេវាទូទាត់តាមប្រព័ន្ធអេឡិចត្រូនិច គឺមានចំនួនប្រមាណជា 96% នៃប្រតិបត្តិការហិរញ្ញវត្ថុ និងអត្រាការប្រាក់ធនាគារចល័តមាន 34,5% ខណៈពេលដែលសហគ្រាសមានរហូតដល់ 99% អាចបង់ពន្ធតាមបណ្តាញអេឡិចត្រូនិច។ឧស្សាហកម្មសេវាកម្មព័ត៌មានវៀតណាមបានរក្សាកំណើននៃការនាំចេញប្រចាំឆ្នាំខ្ពស់ចាប់ពី 30% ទៅ 40% ក្នុងអំឡុងឆ្នាំ 2013 ដល់ 2017 ស្របពេលដែលមានបំណងផ្តល់ជូនសេវាកម្ម BPO សម្រាប់កម្មវិធី software ជាមួយនឹងប្រទេសជប៉ុនដែលជាអ្នកនាំចេញ និងអ្នកទទួលសេវាកម្មធំបំផុត។
បច្ចុប្បន្ននេះ ប្រទេសវៀតណាម គឺជាអ្នកផ្គត់ផ្គង់សេវាកម្មព័ត៌មានធំបំផុតទី 2 របស់ជប៉ុន និងជាដៃគូដ៏ល្អបំផុតសម្រាប់សហគ្រាសជប៉ុន។ ក្នុងប៉ុន្មានឆ្នាំថ្មីៗនេះ ប្រទេសវៀតណាម បានចូលរួមយ៉ាងសកម្មក្នុងការអភិវឌ្ឍន៍វិស័យហ្គេមឌីជីថល និងល្បែងស៊ីសងដោយតម្លៃផលិតកម្មឆ្នាំ 2017 កើនឡើង 8% ស្មើនឹង 800 លានដុល្លារអាមេរិក និងកើនឡើង 27% ដល់ 370 លានដុល្លារអាមេរិក។ បច្ចុប្បន្នប្រទេសវៀតណាម មានសាកលវិទ្យាល័យ និងមហាវិទ្យាល័យសរុបចំនួន 250 ដែលអាចជួយលើកកម្ពស់បុគ្គលិករបស់ ICT ជាង 50.000 នាក់ក្នុងមួយឆ្នាំ។
ហើយវិស័យ ICT របស់ប្រទេសនេះ បច្ចុប្បន្ន គឺមាននិយោជិកប្រហែលជា 9 សែននាក់ហើយចំនួននេះ ដែលមានការកើនឡើងពី 7% ទៅ 10% ក្នុងមួយឆ្នាំ។ ស្ថិតិខាងលើ បានបង្ហាញថា ប្រាក់ខែប្រចាំខែសម្រាប់បុគ្គលិក ICT នៅវៀតណាមមានចំនួនជាមធ្យម 288 ដុល្លារអាមេរិក ហើយប្រាក់ចំណូលប្រចាំឆ្នាំជាមធ្យម 7000 ដុល្លារអាមេរិក។ វៀតណាម នឹងបន្តសហការជាមួយប្រទេសក្រៅ ដើម្បីជម្រុញក្នុងការបណ្តុះបណ្តាលលើជំនាញ ICT ដើម្បីផ្តល់ឱ្យក្មេងជំនាន់ក្រោយក្នុងប្រទេសរបស់ខ្លួនទទួលបានការអភិវឌ្ឍបច្ចេកវិទ្យា និងឧស្សាហកម្មចុងក្រោយបំផុត៕