សមាគមបច្ចេកវិទ្យានៃអ្នកប្រើប្រាស់ The Consumer Technology Association ហៅកាត់ថា CTA បានទទួលស្គាល់ថាក្រុមហ៊ុន LG Electronics គឺជាក្រុមហ៊ុន ដែលតែងតែបង្ហាញពីរបកគំហើញថ្មីជាមួយនឹងការច្នៃប្រឌិតថ្មីក្នុងវិស័យបច្ចេកវិទ្យា និងការរចនាថ្មីក្នុងវិស័យនៃឧបករណ៍ប្រើប្រាស់។ ហើយពេលនេះក្រុមហ៊ុន LG ត្រូវបានគេដឹងថាទើបទទួលបានពានរង្វាន់លើភាពច្នៃប្រឌិតល្អបំផុត “CES 2019 Innovation Awards” និងពានកិត្តិយសជាច្រើនទៀតសម្រាប់ស្មាតហ្វូន ឧបករណ៍អេឡិចត្រូនិក ទូរទស្សន៍ស្មាតធីវី LG OLED TVs ឧបករណ៍បំពងសំឡេង Soundbar និងគ្រឿងបរិក្ខាប្រើប្រាស់ក្នុងផ្ទះជាច្រើនទៀត ដែលនឹងបង្ហាញក្នុងព្រឹត្តិការណ៍តាំងពិពណ៌ផលិតផលបច្ចេកវិទ្យានៃអ្នកប្រើប្រាស់ឆ្នាំ 2019 (CES2019)។
ក្រុមហ៊ុន LG ទទួលបានពានរង្វាន់ CES Innovation Awards នេះរយះពេល 7 ឆ្នាំជាប់ៗគ្នាសម្រាប់ស្មាតហ្វូន ទូរទស្សន៍ស្មាតធីវី និងគ្រឿងប្រើប្រាស់ក្នុងផ្ទះដែលជាផលិតផលបច្ចេកវិទ្យាដែលមានការច្នៃប្រឌិតថ្មីបំផុតដែលក្រុមហ៊ុនបានពាំនាំទៅដាក់តាំងបង្ហាញនៅក្នុងកម្មវិធីពិពណ៌ផលិតផលបច្ចេកវិទ្យាប្រចាំឆ្នាំ (CES)។ បន្ថែមពីនេះ LG ក៏ទទួលបានពានកិត្តិយសដ៏ខ្ពង់ខ្ពស់បំផុត “CES Best of Innovation Awards” ដែលផ្តល់អោយដោយស្ថាប័ន CTA ដែលជាពានរង្វាន់ល្អបំផុតសម្រាប់ការច្នៃប្រឌិតលើស្មាតហ្វូន LG V40 ThinQ និងផលិតផលបំពងសំឡេងថ្មី (Soundbar) ដែលនឹងត្រូវដាក់បង្ហាញនៅឆ្នាំ 2019 ក្នុងព្រឹតិ្តការណ៍ CES2019។
សម្រាប់សមទ្ធិផលជាច្រើនទៀតរបស់ LG ដែលទទួលបានពានរង្វាន់ CES 2019 Innovation Award មានដូចជាទូរស័ព្ទស្មាតហ្វូន LG V40ThinQ, LG G7 ThinQ និងនាឡិកាដៃឆ្លាតវៃ LG Watch W7។ ក្រៅពីនេះនៅមានផលិតមួយចំនួនទៀតដែលឈ្នះពាន CES 2019 Innovation Award នេះដែររួមមានម៉ាស៊ីនបោកគក់ដ៏ទំនើបស៊េរីថ្មី, ទូរទស្សន៍ស្មាតធីវី OLED TVs ស៊េរីថ្មី, ឧបករណ៍បំពងសំឡេង Sound System, ម៉ាស៊ីនកុំព្យូទ័រ និងផលិតផលជាច្រើនទៀតដែលក្រុមហ៊ុននឹងនាំទៅដាក់តាំងបង្ហាញក្នុងព្រឹតិ្តការណ៍ CES2019។ គួរបញ្ជាក់ផលដែរថាពានរង្វាន់ CES Innovation Awards នេះត្រូវបានរៀបចំឡើងដោយស្ថាប័ន CTA ដែលគាំទ្រដោយសមាគមន៍ Industrial Designers Society of America សម្រាប់ផ្តល់ជូនដល់ផលិតផលបច្ចេកវិទ្យាទាំងឡាយណាដែលបង្កើតឡើងថ្មីជាមួយគំនិតច្នៃប្រឌិតខ្ពស់ និងការរចនាប្រកបដោយភាពល្អឥតខ្ជោះ។
ពានរង្វាន់នេះត្រូវបានជ្រើសរើសជារៀងរាល់ឆ្នាំដោយក្រុមអ្នករចនាម៉ូដ ក្រុមវិស្វករអេឡិចត្រូនិច និងអ្នកសារព័ត៌មានដែលជាអ្នកសន្មត់ក្នុងការវាយតម្លៃទៅលើលក្ខណៈវិនិច្ឆ័យជាច្រើនដូចជាការកំណត់តម្លៃចំពោះអ្នកប្រើប្រាស់ សោភ័ណ្ឌភាពនៃការរចនា មានភាពច្នៃប្រឌិតខ្ពស់ មានគុណភាពខ្ពស់សម្រាប់ប្រើប្រាស់ និងបង្ហាញពីការចូលរួមចំណែកដល់គុណភាពនៃការរស់នៅប្រចាំថ្ងៃរបស់អ្នកប្រើប្រាស់។ ចំពោះបញ្ចីផលិតផលដែលទទួលបានពាន់ CES 2019 Innovation Awards រួមទាំងពានរង្វាន់ Best of Innovation Awards ផ្សេងទៀតក្រុមហ៊ុន LG នឹងប្រកាសបង្ហាញនៅក្នុងសន្និសីទសារព័ត៌មានផ្ទាល់របស់ក្រុមហ៊ុននៅក្នុងព្រឹត្តិការណ៍ CES 2019 វេលាម៉ោង 8:00 PST ក្នុងថ្ងៃទី 07 ខែមករា ឆ្នាំ 2019 នៅទីក្រុងឡាវេហ្គាសសហរដ្ឋអាមេរិក៕
