នៅក្នុងរបាយការណ៍ថ្មីៗនេះ បានអះអាងថា ស្មាតហ្វូនស៊េរីថ្មី Huawei P30 Pro នឹងបង្ហាញខ្លួននៅក្នុងត្រីមាសទី 1 ឆ្នាំ 2019 ខាងមុខនេះហើយវានឹងបំពាក់ជាមួយនឹងកាមេរ៉ា 4 គ្រាប់ថែមទៀតផង។ ពាក្យចចាមអារ៉ាមមួយចំនួន បានអះអាងថា ក្រុមហ៊ុន Huawei ប្រហែលជាប្រើប្រាស់នូវការរចនាអេក្រង់ដែលមានរន្ធប្រហោងនៅលើអេក្រង់ផងដែរ។ ទោះជាយ៉ាងណាក៏ដោយ ពាក្យចចាមអារ៉ាមថ្មីដែលចែករំលែកដោយ Ice Universe បានអះអាងថា ស្មាតហ្វូន P30 Pro នេះមានមានភ្ជាប់ជាមួយនឹង Notch ដែលមានទំហំវែង ឬប្រភេទតំនក់ទឹកភ្លៀងផងដែរ។
ស្មាតហ្វូនស៊េរីថ្មី Huawei Nova 4 នឹងបង្ហាញខ្លួននៅថ្ងៃទី 17 ខែធ្នូខាងមុខនេះ ហើយស្មាតហ្វូន Honor V20 ក៏ត្រៀមខ្លួនប្រកាសជាផ្លូវការនៅថ្ងៃទី 26 ខែធ្នូខាងមុខនេះផងដែរដែលមានការរចនារូបរាងភ្ជាប់ជាមួយនឹងកាមេរ៉ាក្រោមអេក្រង់។ តាមការបញ្ជាក់របស់អ្នកទម្លាយដ៏ល្បីនេះ ស្មាតហ្វូន P30 Pro នឹងមានអេក្រង់កោងដែលផលិតដោយក្រុមហ៊ុន BOE របស់ចិន ឬក្រុមហ៊ុន LG របស់ប្រទេសកូរ៉េខាងត្បូងនោះ។ អ្នកទម្លាយព័ត៌មាននេះ បានបញ្ជាក់ថា ក្រុមហ៊ុន Samsung គឺមិនត្រឹមតែជាក្រុមហ៊ុនផលិតអេក្រង់ OLED ប៉ុណ្ណោះទេ ប៉ុន្តែក្រុមហ៊ុននេះ ក៏ផលិតនូវអេក្រង់ដែលមានកាមេរ៉ានៅខាងក្រោមអេក្រង់ដែលគេហៅថា Infinity-O។
រូបភាពជាច្រើននៃសម្បកការពាររបស់ស្មាតហ្វូនស៊េរីថ្មី Huawei P30 Pro ទម្លាយថា ស្មាតហ្វូននេះនឹងមាន Waterdrop Notch ដ៏ស្រស់ស្អាត។ អ្នករចនាម៉ូដដ៏ល្បីឈ្មោះ និងជាអ្នកទម្លាយព័ត៌មានថ្មីៗគឺ Benjamin Geskin ក៏បញ្ចេញនូវរូបភាព Renders ជាច្រើនដែលផ្អែកទៅលើពាក្យចចាមអារ៉ាមរបស់ស្មាតហ្វូន Huawei P30 Pro នេះ។ រូបភាព Render ទាំងនេះបង្ហាញអំពីការរចនា Waterdrop Notch សម្រាប់អេក្រង់នៃស្មាតហ្វូន P30 Pro។ ផ្នែកខាងក្រោយរបស់ស្មាតហ្វូននេះ នឹងភ្ជាប់ជាមួយនឹងកាមេរ៉ា Leica ដល់ទៅ 4 គ្រាប់ថែមទៀត។ វាក៏មានភ្ជាប់ជាមួយនឹងភ្លើង Dual-LED Flash ផងដែរ។
សម្រាប់ប្រហោងពីរតូចមួយនៅលើភ្លើង LED Flash នេះអាចជា laser និង Autofocus។ ស្មាតហ្វូននេះ នឹងប្រើប្រាស់ពណ៌ Aurora Blue Gradient ដ៏ស្រស់ស្អាត។ ពាក្យចចាមអារ៉ាមកាលពីពេលមុននេះបញ្ជាក់ថា ស្មាតហ្វូននេះនឹងមានសេនស័រ 38MP Sony IMX607 Sensor សម្រាប់ការថតរូបភាពនៅកន្លែងដែលមានពន្លឺទាបផងដែរ។ បន្ទះឈីប Kirin 980 រ៉េមទំហំ 12GB នឹងប្រើប្រាស់នៅលើស្មាតហ្វូននេះផងដែរ។ វាមានពាក្យចចាមអារ៉ាមមួយចំនួនដែលបញ្ជាក់ថា ក្រុមហ៊ុន Huawei ប្រហែលជាបញ្ចេញនូវស្មាតហ្វូន 5G Version របស់ខ្លួនផងដែរ៕
