កូរ៉េខាងត្បូង៖ ក្រុមហ៊ុន Samsung Electronics បានឱ្យដឹងកាលពីថ្ងៃទី 7 ខែមីនាម្សិលមិញនេះ ថា កាសស្តាប់ត្រចៀកឥតខ្សែរបស់ខ្លួន នឹងត្រូវដាក់លក់តាមហាងក្នុងពេលឆាប់ៗនេះ ដើម្បីអបអរដល់ការចាប់ផ្តើមបង្ហាញចេញស្មាតហ្វូនថ្មីរបស់ខ្លួន គឺ Galaxy S10 នៅលើទីផ្សារ។ កាស Galaxy Buds នឹងមានវត្តមាននៅពេល Galaxy S10 ត្រូវបានដាក់ឱ្យដំណើរការជាផ្លូវការ នៅថ្ងៃទី 8 ខែមីនានេះ។ កាសស្តាប់ត្រចៀក earbuds របស់ក្រុមហ៊ុន Samsung ត្រូវបានគេមើលឃើញថា បង្ហាញវត្តមាន ដើម្បីឆ្លើយតបទៅនឹង AirPods របស់ក្រុមហ៊ុន Apple ដែលជាគ្រឿងអេឡិចត្រូនិក ដ៏ល្បីបំផុតមួយ របស់សហរដ្ឋអាមេរិក។
កាសស្តាប់ត្រចៀកមួយនេះ អាចចាក់ចម្រៀងរហូតដល់ 6 ម៉ោង និងភ្ជាប់ទូរស័ព្ទរហូតដល់ 5 ម៉ោង ជាមួយនឹងការសាកថ្មតែម្តង។ សម្រាប់សំឡេងនៅលើ Galaxy Buds ត្រូវបានទ្រទ្រង់ដោយបច្ចេកវិទ្យាថ្មីរបស់ក្រុមហ៊ុន AKG ដែលជាក្រុមហ៊ុនផលិតឧបករណ៍អូឌីយ៉ូដ៏ល្បីល្បាញ ដែលទទួលបានដោយក្រុមហ៊ុន Samsung។ កាសស្តាប់ត្រចៀកស៊េរីថ្មីនេះ អាចសាកថ្ម ដោយឥតខ្សែបាន ដោយដាក់វានៅខាងក្នុងប្រអប់ Case របស់ពួកវា និងនៅផ្នែកខាងក្រោយ នៃ Galaxy S10។ ប្រអប់ Case នេះ មានថ្ម ដែលអាចត្រូវបានប្រើ ដើម្បីសាក Buds ដោយគ្មានថាមពលខាងក្រៅ។ ផលិតផលនេះ មានតម្លៃ 159,500 វ៉ុន (140 ដុល្លារអាមេរិក) នៅក្នុងទីផ្សារក្នុងស្រុក ដោយបង្ហាញខ្លួនជាមួយ ពណ៌ខ្មៅ ស ឬលឿងផងដែរ៕
