នៅពេលដែលស្មាតហ្វូនស៊េរីថ្មីមួយបង្ហាញខ្លួនជាផ្លូវការនោះ យើងតែងតែសម្លឹងមើលនូវជំនាន់ថ្មីរបស់វាទៀតថា នឹងមានអ្វីដែលកាន់តែអស្ចារ្យក្នុងការប្រើប្រាស់។ ពេលនេះ យើងបានឃើញនូវវត្តមានរបស់ស្មាតហ្វូន Galaxy S10 ហើយអ្វីដែលកាន់តែអស្ចារ្យជាងនេះទៀតនោះ គឺយើងកំពុងតែរង់ចាំនូវវត្តមានរបស់ស្មាតហ្វូនជំនាន់ក្រោយមួយទៀតរបស់ក្រុមហ៊ុន Samsung នោះគឺ Galaxy Note 10 ។
ខណៈពេលដែលស្មាតហ្វូន Galaxy Note 10 នៅសល់រយៈពេលដល់ទៅ 5 ខែទៀតនោះ ព័ត៌មានជាច្រើនរបស់ស្មាតហ្វូនស៊េរីថ្មីនេះ ក៏បានបង្ហាញនៅលើអនឡាញផងដែរ។ នៅក្នុងការទម្លាយព័ត៌មាននៅថ្ងៃនេះចេញពី XDAdevelopers បង្ហាញអំពីការពាក់ព័ន្ធកាន់តែស៊ីជម្រៅនៅលើផ្នែក Software របស់វា។ នៅពេលដែលវិភាគទៅលើប្រភពកូដចេញពី kernel source code របស់ស្មាតហ្វូន Galaxy S10 វាក៏មានកូដមួយដែលភ្ជាប់ជាមួយនឹងឈ្មោះថា DAVINCI5G ។
បើនិយាយអំពី “Da Vinci” នេះគឺយើងធ្លាប់មានព័ត៌មានរបស់វាផងដែរ។ នៅក្នុងខែកញ្ញា ឆ្នាំ 2018 នោះ អ្នកទម្លាយព័ត៌មាន Ice Universe ចែករំលែកនៅលើបណ្តាញសង្គម Twitter របស់ខ្លួនថា ស្មាតហ្វូន Galaxy Note 10 នឹងមានកូដឈ្មោះថា “Da Vinci” ។ បើធ្វើការពន្យល់ទៅលើរឿង 5G នោះ មានន័យថា ស្មាតហ្វូន Galaxy Note 10 នឹងប្រើប្រាស់នូវបច្ចេកវិទ្យា 5G ។ នេះពិតជារឿងដ៏ល្អមែនទែន!
កូដនេះត្រូវបានរកឃើញនៅលើស្មាតហ្វូន Galaxy S10 ដែលប្រើប្រាស់នូវបន្ទះឈីប Exynos របស់ក្រុមហ៊ុនបច្ចេកវិទ្យា Samsung ហើយស្មាតហ្វូន 5G Galaxy Note អាចនឹងប្រើប្រាស់នូវបន្ទះឈីប Exynos 9820 chipset ជាមួយនឹងម៉ូដឹម Exynos 5100 5G modem ។ វាប្រហែលជាមិនមានប្រភេទបន្ទះឈីប Snapdragon 855 ជាមួយនឹងម៉ូដឹម X50 modem នោះទេ ប៉ុន្តែរឿងនេះនៅមិនទាន់មានការបញ្ជាក់នៅឡើយទេ។
សម្រាប់ឈ្មោះកូដដ៏អាថ៌កំបាំងនេះ ត្រូវបានរកឃើញនៅលើ Kernel ។ នៅខាងស្តាំខាងក្រោម “DAVINCI” គឺជា “LUGE” ។ យើងនៅមិនទាន់ដឹងថា វាចង់សំដៅទៅលើអ្វីនៅឡើយទេ។ ស្មាតហ្វូន Galaxy Note 10 ត្រូវគេរំពឹងថាអាចនឹងបង្ហាញខ្លួននៅក្នុងពេលណាមួយនៅក្នុងខែសីហាខាងមុខនេះនៅក្នុងឆ្នាំនេះ ខណៈពេលដែលស្មាតហ្វូន 5G Galaxy S10 អាចនឹងបង្ហាញខ្លួនមុន Galaxy Note 10 នេះផងដែរ៕
