ក្រុមហ៊ុន HTC ទើបតែប្រកាសចេញនូវស្មាតហ្វូនស៊េរីថ្មី Desire 12 និង 12+ ដែលជាស្មាតហ្វូនស៊េរីថ្មីមួយស្ថិក្នុងតម្លៃសមរម្យ អាចនិយាយថា គឺជាស្មាតហ្វូន ដែលមានឥទ្ធិពលបំផុតសម្រាប់ក្រុមហ៊ុនដែលមានបំណងចង់ពង្រីកឥទ្ធិពលរបស់ខ្លួនចូលទៅក្នុងទីផ្សារកម្រិតទាបនោះ។ ស្មាតហ្វូនទាំងពីរនេះ គឺមានការរចនារូបរាងស្រស់ស្អាតបំផុតជាមួយនឹងការប្រើប្រាស់នូវកញ្ចក់ 3D Glass ហើយវាមានគែមស្រោបដោយលោហធាតុដែលពិតជាទាក់ទាញខ្លាំងមែនទែន។
ស្មាតហ្វូនស៊េរីថ្មី HTC Desire 12 មានវិមាត្រ 148.5 x 70.8 x 8.2m និងមានទំងន់ 137 ក្រាមតែប៉ុណ្ណោះ។ ស្មាតហ្វូននេះ មានអេក្រង់ទំហំ 5.5 អ៊ីង កម្រិតអេក្រង់ IPS LCD display ជាមួយនឹងកម្រិត 720x1440 ភិចសែល។ ស្មាតហ្វូននេះប្រើប្រាស់នូវបន្ទះឈីប MediaTek MT6739 64-bit ជាមួយនឹងរ៉េមទំហំ 3GB។ ស្មាតហ្វូននេះ មានម៉េមូរីទំហំ 32GB និងរន្ធដោត microSD កាត។ នៅផ្នែកខាងក្រោយរបស់ស្មាតហ្វូននេះ គេសង្កេតមើលឃើញកាមេរ៉ា 13MP f/2.2 ភ្ជាប់ជាមួយនឹងមុខងារ phase-detection autofocus និង auto-HDR ខណៈពេលដែលកាមេរ៉ា Selfies គឺមានទំហំ 5MP f/2.4 ។ ស្មាតហ្វូននេះមានថាមពលថ្ម 2,730mAh ខណៈពេលដែលរន្ធដោតបញ្ចូលថាមពលគឺ microUSB ដដែល។ វានៅតែរក្សាទុកនូវរន្ធដោតកាសស្តាប់ 3.5mm audio jack ផងដែរ។
ស្មាតហ្វូន Desire 12+ គឺមានអេក្រង់ធំជាងស្មាតហ្វូន Desire 12 ហើយនិងមានលក្ខណៈសម្បត្តិខុសប្លែកគ្នាជាច្រើនផងដែរ។ ស្មាតហ្វូននេះមានអេក្រង់ទំហំ 6 អ៊ីញកម្រិតអេក្រង់ IPS LCD display ជាមួយនឹង 720x1440 ភិចសែល។ ស្មាតហ្វូននេះ ប្រើប្រាស់នូវបន្ទះឈីប Snapdragon 450 រ៉េមទំហំ 3GB ម៉េមូរីក្នុងម៉ាស៊ីនទំហំ 32GB ថាមពលថ្ម 2,965mAh និងប្រព័ន្ធកាមេរ៉ាភ្លោះទំហំ 2MP+13MP f/2.2 ដែលមានន័យថាអ្នកអាចថតរូបដែលមាន Bokeh បាន។ កាមេរ៉ាខាងមុខរបស់ស្មាតហ្វូននេះគឺមានទំហំ8MP ភ្ជាប់ជាមួយនឹងមុខងារ f/2.0 aperture ដែលអាចថតរូបភាពកាន់តែប្រសើរនៅកន្លែងដែលមានពន្លឺតិចនោះ។
ស្មាតហ្វូន Desire 12+ ដំណើរការនូវប្រព័ន្ធប្រតិបត្តិការ Android Oreo ដែលមានន័យថាវាទ្រទ្រង់ជាមួយនឹងគម្រោង Project Treble ។ ចំនែកស្មាតហ្វូន Desire 12 គឺប្រើប្រាស់នូវប្រព័ន្ធប្រតិបត្តិការ Android Nougat តែប៉ុណ្ណោះ។ HTC Desire 12 នឹងអាចរកទិញបាននៅចុងខែមេសាជាមួយនឹងពណ៌ខ្មៅ និងពណ៌ទឹកប្រាក់។ តម្លៃរបស់ស្មាតហ្វូន HTC Desire 12+ គឺមានតម្លៃចន្លោះពី €235 - €249 (~$288 - $305) ខណៈពេលដែលស្មាតហ្វូន Desire 12 គឺមានតម្លៃ €185 - €199 (~$226 - $244) ថែមទៀត៕
