ក្រោយពីទទួលបានទីផ្សាររីកចម្រើនខ្លាំងគួរអោយកត់សំគាល់នៅរយះពេលមួយឆ្នាំចុងក្រោយនេះក្រុមហ៊ុនផលិតស្មាតហ្វូនរបស់ចិន Realme បានធ្វើការបញ្ចេញស្មាតហ្វូនស៊េរីថ្មីរបស់ខ្លួនជាបន្តបន្ទាប់ដើម្បីតម្រូវការទីផ្សារនៃអ្នកប្រើប្រាស់ក៏ដូចជាដើម្បីធ្វើការប្រកូតប្រជែងលើទីផ្សារផងដែរ។ យ៉ាងណាមិញក្នុងពេលថ្មីៗនេះក្រុមហ៊ុន Realme ត្រូវបានគេដឹងថាត្រៀមបញ្ចេញស្មាតហ្វូនស៊េរីថ្មីដែលជាកំពូលស្មាតហ្វូនដំបូងរបស់ខ្លួនដែលបំពាក់មកជាមួយនឹងបន្ទះឈីបជំនាន់ថ្មីរបស់ Qualcomm គឺ Snapdragon 865។
ហើយអ្វីដែលកាន់តែជាក់ច្បាស់ក្នុងពេលនេះគឺថាស្មាតហ្វូនស៊េរីថ្មីរបស់ Realme មួយនេះត្រូវបានគេប្រទះឃើញនៅលើបណ្តាញតេស្តសមត្ថភាព Antutu ថែមទៀតផងដែលវាប្រើប្រាស់លេខកូដសំគាល់ម៉ូដែលគឺ “Realme RMX2071” ដោយកំលាំងម៉ាស៊ីនរបស់វាទទួលបានពិន្ទុខ្ពស់ដល់ទៅ 574,985 ដែលជាពិន្ទុខ្ពស់បំផុតមិនធ្លាប់មាននៅលើស្មាតហ្វូនកំពូលណាមួយឡើយ។ ប៉ុន្តែបើតាមប្រភពព័ត៌មានចចាមអារ៉ាមមួយចំនួនទៀតបាននិយាយថា កំពូលស្មាតហ្វូនជំនាន់ថ្មីរបស់ Realme អាចជាម៉ូដែល Realme X50 Pro ដែលជាកំនែប្រែថ្មីចេញពីម៉ូដែល X50 5G ដែលបំពាក់បន្ទះឈីប Snapdragon 765G។
គួរអោយស្តាយដោយសារតែនៅលើបណ្តាញ Antutu គឺមិនបានបង្ហាញចេញព័ត៌មានច្រើនទាក់ទងនឹងគុណសម្បត្តិនៃកំពូលស្មាតហ្វូនជំនាន់ថ្មីរបស់ Realme ឡើយ ប៉ុន្តែបើយើងពិនិត្យទៅលើពិន្ទុដែលបានបង្ហាញ រួចធ្វើការប្រៀបធៀបនឹងពិន្ទុរបស់ម៉ូដែល Realme X2 Pro ដែលទទួលបាន 467,653 តាមរយះការតេស្តនៅលើ Antutu 8 ឃើញថាកំលំាងម៉ាស៊ីនរបស់កំពូលស្មាតហ្វូនជំនាន់ថ្មីរបស់ Realme មានកំលាំងខ្លាំងជាងប្រមាណ 20%។
បើតាមរយះផ្ទាំងរូបភាព tipster របស់កម្មវិធី Antutu ដែលមានប្រភពចេញពីប្រទេសចិនគេបានទស្សន៍បានថាកំពូលស្មាតហ្វូនជំនាន់ថ្មីរបស់ Realme ដែលបំពាក់ជាមួយកំពូលឈីបជំនាន់ថ្មី Snapdragon 865 នឹងមានកាមេរ៉ាសែលហ្វីមួយគ្រាប់ដែលរចនាឡើងជារន្ធទំលុះអេក្រង់ Punch-Hole Display។ កំពូលស្មាតហ្វូនស៊េរីថ្មីរបស់ Realme មួយនេះត្រូវបានគេព្យាករណ៍ថានឹងបង្ហាញខ្លួននៅក្នុងព្រឹត្តិការណ៍សមាជពិភពស្មាតហ្វូន2020 ឬ Mobile World Congress (MWC2020) នៅថ្ងៃទី 24 ក្នុងខែកុម្ភះខាងមុខនេះ៕