មួយរយះពេលចុងក្រោយនេះមានការបែកធ្លាយនូវព័ត៌មានចចាមអារ៉ាមជាច្រើនអំពីស្មាតហ្វូនជំនាន់ថ្មីរបស់ក្រុមហ៊ុន Xiaomi ម៉ូដែល Redmi K20។ យ៉ាងណាមិញនៅថ្ងៃនេះមានប្រភពព័ត៌មានជាក់លាក់មួយបានបញ្ជាក់នៅលើបណ្តាញទំនាក់ទំនងសង្គម Weibo អោយដឹងថា Redmi K20 នឹងត្រូវដាក់សម្ភោធន៍ផ្លូវការណ៍នៅថ្ងៃទី 28 នាជិតដំណាច់ខែឧសភានេះ។
ហើយបើយោងតាមស្ថាបនិក Xiaomi លោក Lei Jun បានបង្ហោះសារនៅលើ Weibo របស់លោកកាលពីម្សិលមិញបានបង្ហើបអោយដឹងថាស្មាតហ្វូនជំនាន់ថ្មីនេះនឹងបំពាក់នូវប្រព័ន្ធកាមេរ៉ាក្រោយទំហំ 48MP ហើយនឹងប្រើប្រាស់សែនស័រ SONY IMX 586។ ស្មាតហ្វូននេះ នឹងបំពាក់បន្ទះឈីប Snapdragon 855 និងដំឡើងមកជាមួយនូវប្រព័ន្ធកាមេរ៉ាកម្រិតខ្ពស់ដែលវាជាផ្លូវដ៏ល្អមួយក្នុងការយិតយោងស្មាតហ្វូនម៉ាក Redmi ចូលទៅក្នុងទីផ្សារស្មាតហ្វូនថ្នាក់កំពូល។
សម្រាប់កំលាំងម៉ាស៊ីនរបស់ K20 ត្រូវបានគេប្រទះឃើញនៅលើបណ្តាញតេស្តសមត្ថភាព AnTuTu រួចទៅហើយដែលទទួលបានពិន្ទុខ្ពស់កប់ឈរនៅកំពូលតារាងថែមទៀតផងដូចនេះអាចសបញ្ជាក់បានថា Redmi K20 នឹងជា “Flagship Killer Phone” ដ៏មានឥទ្ធិពលបំផុតក្នុងទីផ្សារស្មាតហ្វូនថ្នាក់កំពូលនៅពេលវាបង្ហាញវត្តមានលើទីផ្សារ។ Redmi K20 ត្រូវបានគេដឹងទៀតថានឹងបំពាក់នូវបន្ទះអេក្រង់ AMOLED Display ស្រោបការពារដោយកញ្ចក់ Corning Gorilla Glass 6 និងប្រើប្រាស់បច្ចេកវិទ្យាស្កែនក្រយ៉ៅម្រាមដៃលើអេក្រង់ (Under-Display Scanner)។
ស្មាតហ្វូននេះក៏នឹងបង្ហាញវត្តមានចំនួនពីរម៉ូដែលថែមទៀតផងគឺម៉ូដែលស្តង់ដារ និងម៉ូដែល Pro ហើយម៉ូដែល Pro នឹងមានភ្ជាប់មកជាមួយនូវមុខងារប្រើប្រាស់គាប់ប្រសើរជាងម៉ូដែលស្តង់ដារមានដូចជាប្រើប្រាស់ថ្មធំកំលាំង 4,000mAh ទ្រទ្រង់បច្ចេកវិទ្យាសាកភ្លើងចូលល្បឿនលឿនកំលាំង 27 វ៉ាត់, ប្រើប្រាស់លែន Ultra-wide នៅលើលែនកាមេរ៉ាគ្រាប់ទីពីរ និងមានកាមេរ៉ាសែលហ្វីប្រភេទ Pop Up Selfie ទំហំ 20MP។
សរុបមកវិញទាំងអស់នេះគឺជាគុណសម្បត្តិបឋមរបស់កំពូលស្មាតហ្វូនជំនាន់ថ្មី Redmi K20 តែប៉ុណ្ណោះ ហើយសម្រាប់គុណសម្បត្តិជាក់លាក់ពិតប្រាកដរបស់វានឹងត្រូវបើកផ្ទាំងក្រណាត់ក្រហមនាថ្ងៃទី 28 នៅជិតដំណាច់ខែឧសភានេះ ដូច្នេះសូមរងចាំតាមដាននៅលើគេហទំព័រទស្សនាវដ្តីពិភពអេឡិចត្រូនិកទាំងអស់គ្នា៕
