យោងតាមទិន្នន័យឧស្សាហកម្មបច្ចេកវិទ្យានៅកូរ៉េខាងត្បូង បានបង្ហាញនៅថ្ងៃទី 6 ខែមិថុនាកន្លងទៅនេះថា នៅក្នុងរយៈពេល 7 ខែ ក្រុមហ៊ុន Samsung Electronics បានលក់ទូរទស្សន៍កម្រិតខ្ពស់ QLED 8K TV របស់ខ្លួនបានចំនួន 8 ពាន់គ្រឿងនៅក្នុងប្រទេសកូរ៉េខាងត្បូង ចាប់តាំងពីខ្លួនដាក់លក់វានៅលើទីផ្សារ ។ តួរលេខនេះ គឺមានការបង្ហាញថា គឺមានការកើនឡើង 1% ទៅលើចំណែកទីផ្សារទូរទស្សន៍នៅក្នុងប្រទេសកូរ៉េ នេះបើតាមអ្នកឃ្លាំមើលនិយាយ។
សូមជំរាបថា ក្រុមហ៊ុន Samsung ទើបតែបញ្ចេញនូវទូរទស្សន៍ QLED 8K TV នេះនៅក្នុងខែវិច្ឆិកាឆ្នាំមុននេះ។ សម្រាប់ ទូរទស្សន៍កម្រិតខ្ពស់នេះ គឺមានការកើនឡើងនៅក្នុងប្រទេសកូរ៉េ បន្ទាប់ពីមានការកើនឡើងនៃការពេញនិយមទៅលើទូរទស្សន៍ដែលមានអេក្រង់ទំហំធំនោះ។ ក្រុមហ៊ុន Samsung បាននិយាយថា អ្នកប្រើប្រាស់ប្រមាណជា 70% ដែលបានទិញទូរទស្សន៍ QLED 8K TVs គឺមានការផ្លាស់ប្តូរពីអេក្រង់ 75-inch ទៅកាន់ទំហំ 82-inch ។
បុគ្គលិកម្នាក់របស់ក្រុមហ៊ុន Samsung បាននិយាយថា “មនុស្សកាន់តែច្រើនរីករាយជាមួយនឹង Contents ដែលមានកម្រិតភាពច្បាស់ខ្ពស់ដែលផ្តល់ដោយអ្នកផ្គត់ផ្គង់ទៅលើសេវាកម្មស្ទ្រីមនៅលើទូរទស្សន៍អេក្រង់ធំនេះ។ តម្រូវការនេះគឺមានការកើនឡើងជាបន្តបន្ទាប់។” ក្រុមហ៊ុនបច្ចេកវិទ្យាយក្សផ្សេងទៀតជាច្រើន នៅលើពិភពលោក ក៏នឹងចូលរួមនៅក្នុងការប្រកួតប្រជែងនេះផងដែរ ជាមួយនឹងក្រុមហ៊ុន Sony របស់ជប៉ុន និងក្រុមហ៊ុន LG Electronics ដែលមានគម្រោងក្នុងការប្រកាសបង្ហាញនូវទូរទស្សន៍ 8K TVs របស់ខ្លួននៅក្នុងពេលដ៏ខ្លីខាងមុខនេះផងដែរ៕