ក្រុមហ៊ុន Anker ដែលជាក្រុមហ៊ុនផលិតគ្រឿងបរិក្ខាស្មាតហ្វូនដ៏ល្បីមួយរបស់អាមេរិកទើបតែបានប្រកាសចេញនូវឧបករណ៍ផ្ទុកថាមពលស៊េរីថ្មីរបស់ខ្លួនម៉ូដែល PowerCore Magnetic 5K Wireless Power Bank ដែលមានភ្ជាប់នូវដុំឆក់ដូចគ្នាទៅនឹងឧបករណ៍សាកថ្ម MagSafe របស់ Apple ដែរ ដែលអាចនិយាយបានថាឧបករណ៍សាកថ្មស៊េរីថ្មីគឺជា MagSafe Power Bank ដំបូងរបស់ក្រុមហ៊ុន Anker ក៏បាន។
Anker PowerCore Magnetic 5K Power Bank ផលិតឡើងយ៉ាងពិសេសសម្រាប់ប្រើប្រាស់ជាមួយនឹងទូរស័ព្ទ iPhone 12 Series តែម្តង ដោយវាមានភ្ជាប់នូវដុំឆកដែលអាចឆក់ជាប់ជាមួយផ្ទៃខ្នងខាងក្រោយរបស់ទូរស័ព្ទ iOS ជំនាន់ចុងក្រោយនេះ។ ឧបករណ៍ផ្ទុកថាមពលស៊េរីថ្មីនេះមានថ្មផ្ទុកថាមពល ទំហំ 5,000mAh និងអាចសាកថ្មដោយប្រើមុខងារ MagSafe Wireless Charging បានត្រឹមកំលាំង 5W។
នៅលើឧបករណ៍សាកថ្មស៊េរីថ្មីនេះ មាននូវរន្ធដោត USB-C ដែលអាចសាកថ្មទៅកាន់ទូរស័ព្ទតាមរយះខ្សែចម្លងក្នុងកំលាំង 10W (Output) និងសាកភ្លើងអោយខ្លួនវាវិញបានកំលាំង 11W (Input)។ Anker MagSafe Power Bank មានទំហំតូចល្មមជាមួយវិមាត្ររួមគឺ 92.9 x 62.5 x 16mm និងទំងន់ស្រាលត្រឹមតែ 131.5 ក្រាមប៉ុណ្ណោះ។ ជាងនេះទៅទៀតវាក៏មាននូវអំពូលភ្លើង LED សម្រាប់បង្ហាញពីកម្រិតភាករយថាមពលថ្មផងដែរ។
Anker PowerCore Magnetic 5K Power Bank ត្រូវបានក្រុមហ៊ុនប្រកាសដាក់លក់ក្នុងទីផ្សារសហរដ្ឋអាមេរិកក្នុងតម្លៃខ្ទង់ $39.99 ដែលមានការធានារយះពេល 18 ខែ និងមានជម្រើសពណ៌ខ្មៅតែមួយប៉ុណ្ណោះ ហើយក្នុងប្រអប់របស់វា Anker ក៏បានដាក់ខ្សែសាកប្រភេទ USB-C to USB-C មួយផងដែរ៕