ជាថ្មីម្តងទៀតក្រុមហ៊ុន OPPO នឹងប្រកាសចេញទូរស័ព្ទឆ្លាតវៃជំនាន់ថ្មីរបស់ខ្លួនក្នុងគ្រួសារ Find X3 Series នៅថ្ងៃទី 11 ខែមិនា ខែក្រោយនេះ នេះបើតាមការបញ្ជាក់ពីអ្នកទម្លាយព័ត៌មានលោក Jon Prosser កាលពីដើមសប្តាហ៍នេះ។ ដោយឡែកក្នុងថ្ងៃនេះវិញ មានប្រភពមួយបានបញ្ចេញតារាងតម្លៃរបស់ទូរស័ព្ទឆ្លាតវៃជំនាន់ថ្មី Find X3 Series ដែលនឹងត្រូវចេញលក់នៅទីផ្សារអឺរ៉ុបរួមជាមួយម៉ូដែល OPPO A-Series ជំនាន់ថ្មីផងដែរ។ នៅក្នុងតារាងតម្លៃដែលប្រភពបានបង្ហាញចេញមកនោះគឺយើងឃើញមាន Find X3 ចំនួន 3 ម៉ូដែលគឺ Find X3 Pro, Find X3 Neo និង Find X3 Lite។
ងាកមកតម្លៃវិញ បើយើងមើលនៅលើតារាងតម្លៃដែលប្រភពបានរាយមកនេះគឺប្រាប់អោយដឹងថា OPPO Find X3 Pro មានរ៉េមទំហំ 12GB/អង្គផ្ទុកទំហំ 256GB តម្លៃខ្ទង់ 1,000 អឺរ៉ូ និងខ្ទង់ 1,200 អឺរ៉ូសម្រាប់ម៉ូដែលមានរ៉េមទំហំ 12GB/អង្គផ្ទុកទំហំ 512GB។ ចំនែក Find X3 Neo មានតម្លៃចន្លោះពី 700 ទៅ 800 អឺរ៉ូ និងម៉ូដែល Find X3 Lite មានតម្លៃចន្លោះពី 400 ទៅ 500 អឺរ៉ូ។ នៅលើតារាងក៏បានបង្ហាញពីតម្លៃរបស់ស្មាតហ្វូន mid-rang ជំនាន់ថ្មីរបស់ OPPO ចំនួនពីរម៉ូដែលផងដែរគឺ OPPO A94 5G និង A54 5G ដែលទូរស័ព្ទឆ្លាតវៃទាំងពីរម៉ូដែលនេះមានតម្លៃចន្លោះពី 300 ទៅ 400 អឺរូ និង 200 ទៅ 300 អឺរូ។
យ៉ាងណាមិញបើតាមការបញ្ជាក់ក្នុងរបាយការណ៍របស់លោក Jon Prosser កន្លងទៅ បានអោយដឹងថា Find X3 Lite គឺប្តូរឈ្មោះថ្មីចេញពី Reno 5 5G និង Find X3 Neo ប្តូរឈ្មោះថ្មីចេញពី Reno 5 Pro 5G ដែលពួកវាក៏នឹងត្រូវធ្វើការ Upgrade មកប្រើបន្ទះឈីបថ្មី Snapdragon 870។ ចំនែកឯម៉ូដែល Find X3 Pro វិញត្រូវបានគេជឿជាក់ថាប្រើបន្ទះឈីប Snapdragon 888 និងប្រើប្រាស់សែនស័រកាមេរ៉ា SONY IMX766 ទំហំ 50MP ខ្នាត 1/1.56” ចំនួនពីរគ្រាប់នៅលើលែនគោល និងលែនទូលាយ។
ប្រភពបានបញ្ជាក់ទៀតថា Find X3 Pro នឹងមិនប្រើលែន Periscope ដូចជំនាន់មុនរបស់វានោះទេគឺប្តូរមកប្រើលែន Macro Zoom ជំនួសវិញដែលគេដឹងថាមានសមត្ថភាពអាចពង្រីកប្លង់ថតបានដល់ 25x ហើយក៏មានភ្លើង LED រត់ជុំវិញលែនរបស់វាផងដែរ។ ជាមួយគ្នានេះដែរ Find X3 Pro ក៏នឹងមានលែន 2x Telephoto មកជាមួយផងដែរ។ បន្ថែមពីនេះ Find X3 Pro នឹងបំពាក់នូវអេក្រង់ OLED Display ទំហំ 6.7 អ៊ីញ ទ្រទ្រង់នូវមុខងារ Adaptive refresh rate 10Hz-120Hz មានថ្មទំហំ 4,500mAh ទ្រទ្រង់បច្ចេកវិទ្យាភ្លើងល្បឿនលឿនកំលាំង 65W តាមរន្ធ USB-C និងសាកឥតប្រើខែ្សជាមួយបច្ចេកវិទ្យា Wireless Charge 30W ថែមទៀតផង៕