តាមដំណឹងដែលមានប្រភពចេញពីប្រទេសចិន បានបង្ហាញថា ស្មាតហ្វូនស៊េរីថ្មី Samsung Galaxy Z Flip3 នឹងបង្ហាញវត្តមានជាមួយនឹងស្មាតហ្វូន Galaxy Fold3 នៅក្នុងខែកក្កដានេះហើយ។ ការបែកធ្លាយថ្មីនេះ ក៏មានការបង្ហាញអំពីអេក្រង់ និងការឌីស្សាញទៅលើរូបរាងរបស់ស្មាតហ្វូន Z Flip3 នេះផងដែរ។ រូបភាព Screenshots នេះ ក៏មានការបង្ហាញអំពីរូបរាងរបស់ស្មាតហ្វូននេះជាច្រើនសន្លឹកផងដែរ។
បើមើលទៅលើរូបភាពនេះ គឺមានការបង្ហាញថា ស្មាតហ្វូន Galaxy Z Flip3 នេះ នឹងប្រើប្រាស់នូវកាមេរ៉ាភ្លោះ ហើយនឹងមានអេក្រង់ទី 2 ដែលមានទំហំធំងាយស្រួលក្នុងការមើលទៅលើសារ និង Notifications ផងដែរ។ ប្រភពដដែលនេះ បានបន្ថែមថា កញ្ចក់ Gorilla Glass Victus នេះ គឺមានភាពធន់ខ្លាំងណាស់នៅក្នុងការប្រើប្រាស់ ជាពិសេសគឺវាបានភ្ជាប់ជាមួយនិងត្រចៀក Hinge ថ្មី ដែលកាន់តែរឹងមាំក្នុងការប្រើប្រាស់ថែមទៀតផង។
អ្វីដែលខកចិត្តនោះ គឺនៅក្នុងការបែកធ្លាយនេះ មិនមានការបង្ហាញអំពីការឌីស្សាញខាងក្នុងរបស់ស្មាតហ្វូន Galaxy Z Flip3 នេះទេ។ តាមការបញ្ជាក់នៅក្នុងពាក្យចចាមអារ៉ាមជាច្រើន គឺបាបអះអាងថា ស្មាតហ្វូន Galaxy Z Flip3 នេះ គឺមានអេក្រង់ខាងក្នុងទំហំ 6.9 អ៊ីង ជាមួយនឹងរន្ធប្រហោង Punch-Hole រួមនិងកញ្ចក់ UTC ។ ស្មាតហ្វូននេះ គឺនឹងមានថាមពលថ្មទំហំ 3,300mAh។ បន្ថែមពីនេះ ស្មាតហ្វូននេះ ក៏នឹងមានប្រភេទ 4G LTE និង 5G Version ផងដែរ។ ស្មាតហ្វូន Z Flip3 នឹងមានតម្លៃប្រហែលជា $1,449 ៕
