គិតមកត្រឹថ្ងៃនេះ គឺមានរយៈពេលជាង 4 ខែហើយចាប់តាំងពីក្រុមហ៊ុន OPPO បង្ហាញវត្តមានរបស់ស្មាតហ្វូន Reno5 Series នៅក្នុងប្រទេសចិន។ នៅ ពេលនេះ មានព័ត៌មានថា ស្មាតហ្វូន Reno6 Series នឹងបង្ហាញខ្លួននៅក្នុងខែនេះហើយខណៈពេលដែលព័ត៌មានស្មាតហ្ចូននេះ គឺមានការបែកធ្លាយតាំង តែពីខែមីនាមកម្លេះ។ តាមការបញ្ជាក់នៅក្នុងរបាយការណ៍មួយដែលចេញពីប្រទេសចិន គឺបានបង្ហាញថា ក្រុមហ៊ុន OPPO គឺគ្រោងនឹងរៀបចំនូវព្រឹត្តិការណ៍មួយនៅថ្ងៃទី 22 ខែឧសភានេះហើយ។
ព្រឹត្តិការណ៍នេះ ត្រួវបានគេនិយាយថា គឺនឹងមានអ្នកចូលរួមជាច្រើន ហើយព្រឹត្តិការណ៍នេះ អាចនឹងមានការបង្ហាញវត្តមានរបស់ស្មាតហ្វូន Reno6 series ផងដែរ។ ក្រុមហ៊ុន OPPO តែងតែប្រើប្រាស់នូវព្រឹត្តិការណ៍ពាក់កណ្តាលឆ្នាំនេះ ដើម្បី បង្ហាញនូវស្មាតហ្វូនថ្មីៗរបស់ខ្លួន។ ជាក់ស្តែងនៅក្នុងឆ្នាំ 2018 កន្លងទៅនេះ ស្មាតហ្វូន OPPO R15 បានបង្ហាញខ្លួនជាផ្លូវការណ៍ ខណៈពេលដែលស្មាតហ្វូន Reno series ប្រកាសបង្ហាញខ្លួននៅក្នុងឆ្នាំ 2019 ។
ព័ត៌មានខាងលើនេះ បានបញ្ជាក់ថា ស្មាតហ្វូននេះ នឹងមានចំនួន 3 ដែលនឹង បង្ហាញខ្លួននោះគឺស្មាតហ្វូន Reno6 ដែលមានបន្ទះឈីប Dimensity 1200 និងមានអេក្រង់ 90Hz ខណៈពេលស្មាតហ្វូន Reno6 Pro មានបន្ទះឈីប Snapdragon 870 Processor និងមានអេក្រង់ 90Hz ដូចគ្នា រួមជាមួយនឹងស្មាតហ្វូន Reno6 Pro+ គឺមានបន្ទះឈីប Snapdragon 888 Processor និងមានអេក្រង់ដល់ 120Hz refresh rate ។ ស្មាតហ្វូនទាំង 3 នេះ គឺមានថាមពលថ្មទំហំ 4500mAh ជាមួយនឹងបច្ចេកវិទ្យាសាកថ្ម 65W Fast Wired Charging និង 30W Wireless Fast Charging ។ ស្មាតហ្វូន Reno6 Series នឹងបង្ហាញខ្លួននៅក្រៅប្រទេសចិនផងដែរ៕