ថ្មីៗនេះ ក្រុមហ៊ុន Samsung បានរកឃើញនូវចន្លោះប្រហោងនៅលើស្មាតហ្វូនរបស់ខ្លួន ដែលគេដឹងថា វាអាចនឹងនាំអោយអ្នកវាយប្រហារ អាចចូលទៅលុកលុយទៅលើស្មាតហ្វូនទាំងនោះបាន។ ចន្លោះប្រហោងសុវត្ថិភាពនេះ ត្រូវបានរកឃើញដោយស្ថាបនិករបស់ក្រុមហ៊ុន Oversecured គឺលោក Sergey Toshin។ នៅពេលនេះ ក្រុមហ៊ុនស្មាតហ្វូនរបស់ប្រទេសកូរ៉េខាងត្បូងមួយនេះ ក៏បានធ្វើការក្នុងការលុបបំបាត់នូវកន្លែងដែលមានប្រហោងទាំងនោះផងដែរ ដូច្នេះ គេជឿជាក់ថា ស្មាតហ្វូននឹងមានសុវត្ថិភាពដូចដើម ហើយចារកម្មក៏មិនអាចធ្វើទៅលើអ្នកប្រើប្រាស់ស្មាតហ្វូនស្រួលបានទេ។ ប៉ុន្តែមានមតិលើកឡើងថា នៅក្នុងករណីខ្លះហេគឃ័រ ក៏អាចធ្វើការគ្រប់គ្រងទៅលើស្មាតហ្វូននេះបានដែរ។
តាមការបញ្ជាក់របស់លោក Sergey Toshin បានអោយដឹងថា ស្មាតហ្វូន Samsung គឺមានចន្លោះប្រហោងជាច្រើន ដែលក្រុមការងារគាត់បានរកឃើញ។ ចន្លោះប្រហោងជាច្រើនទាំងអស់នេះ គឺនឹងអនុញ្ញាតអោយហេគឃ័រ អាចធ្វើការវាយប្រហារតាមរយៈសារ SMS ហើយហេគឃ័រ ក៏អាចធ្វើការសុំការអនុញ្ញាតក្នុងការ read/write files នៅលើស្មាតហ្វូននេះបានថែមទៀតផង។ សម្រាប់ចន្លោះប្រហោងទាំងនេះ ក្រុមហ៊ុន Samsung អាចនឹងចំណាយពេលដល់ទៅ 2 ខែឯណោះ នៅក្នុងការដោះស្រាយទៅលើបញ្ហាទាំងអស់នេះ។ យើងនៅមិនទាន់ដឹងនៅឡើយទេថា តើនឹងមានឧបករណ៍ណាខ្លះ ឬ ប្រព័ន្ធប្រតិបត្តិការណាខ្លះទេ ដែលទទួលរងនូវការវាយប្រហារនេះទេ។
បើតាមការបញ្ជាក់នៅក្នុងរបាយការណ៍ជាច្រើន គឺបាននិយាយថា ចន្លោះប្រហោងមួយចំនួន គឺមាននៅក្នុងកម្មវិធីជាច្រើន ដែលបានតម្លើងមកជាស្រេចជាមួយនឹងស្មាតហ្វូននេះ។ នៅក្នុងករណីខ្លះ កម្មវិធីជាច្រើន ក៏មានសិទ្ធិជា Admin ក្នុងការគ្រប់គ្រងទៅលើឧបករណ៍នេះបានផងដែរ។ ចន្លោះប្រហោងនេះ គឺមានលេខកូដ CVE-2021-25356 ដែលចន្លោះប្រហោងនេះ ត្រូវបានក្រុមហ៊ុនជួសជុលនៅក្នុងខែមេសាកន្លងទៅនេះរួចហើយផងដែរ។ ដើម្បីសុវត្ថិភាពនោះ អ្នកប្រើប្រាស់ជាច្រើន អាចធ្វើការអាប់ដេតទៅលើស្មាតហ្វូនជាច្រើនរបស់ពួកគេតាមរយៈ Firmware នៅក្នុង settings របស់ស្មាតហ្វូនរបស់ខ្លួន៕