កាលពីប៉ុន្មានថ្ងៃមុននេះ ក្រុមហ៊ុន Huawei បានប្រកាសជាផ្លូវការនូវប្រព័ន្ធប្រតិបត្តិការ HarmonyOS 2.0 ដើម្បីដំណើរការលើផលិតផលជាច្រើនរបស់ខ្លួន។ អ្វីដែលគួរអោយចាប់អារម្មណ៍ទៅលើប្រព័ន្ធប្រតិបត្តិការ HarmonyOS 2.0 នេះ គឺថា វាអាចប្រើប្រាស់បានជាមួយនឹងស្មាតហ្វូន និងថេប្លេត។ ក្រុមហ៊ុន Huawei បានប្រកាសថា ឧបករណ៍ជាង 100 របស់ Huawei និងឧបករណ៍ជាង 35 របស់ Honor បានប្រើប្រាស់នូវប្រព័ន្ធប្រតិបត្តិការនេះហើយ។
សម្រាប់ស្មាតហ្វូនដំបូងរបស់ Huawei ដែលទទួលបាននូវប្រព័ន្ធប្រតិបត្តិការ HarmonyOS 2.0 នេះ គឺមានដូចជា ស្មាតហ្វូន Mate 40 series, Mate 30 series, P40 series, Mate X2, nova 8 series, MatePad Pro series ហើយនិងផលិតផលជាច្រើនទៀត។ ថ្មីៗនេះ ក្រុមហ៊ុន Huawei ក៏បានឆ្លើយតបទៅនឹងសំណួរជាច្រើនដែលពាក់ព័ន្ធទៅនឹងប្រព័ន្ធប្រតិបត្តិការ HarmonyOS 2 នេះផងដែរ។
ជាមួយនឹងគ្នានេះ ផ្នែកសេវាកម្មអតិថិជនផ្លូវការរបស់ក្រុមហ៊ុន Huawei ក៏បានបង្ហាញនូវចំណុចមួយចំនួនដើម្បីអោយអ្នកប្រើប្រាស់អាចធ្វើការ Upgrade បានផងដែរ។ ជាដំបូងអ្នកត្រូវធ្វើការចុះឈ្មោះសម្រាប់ Beta សិន ដើម្បីអាចទទួលបាននូវការ Upgrade Package នៅលើប្រព័ន្ធប្រតិបត្តិការ HarmonyOS 2 នេះ។ បន្ថែមពីនេះ ផ្នែកសេវាកម្មរបស់ Huawei ក៏បានបញ្ជាក់ទៀត បើទោះបីជាលោកអ្នកធ្វើការអាប់ដែតពី EMUI មកកាន់ប្រព័ន្ធប្រតិបត្តិការ HarmonyOS 2.0 រួចហើយក៏ដោយ ក៏គណនី Huawei ID, លេខទូរស័ព្ទ ហើយនិងគណនីបណ្តាញសង្គមជាច្រើនដូចជា WeChat ID, QQ ក៏៏ដូចជា Game ដែលលោកអ្នកបានតំឡើងកាលពីមុននោះ គឺមិនមានបញ្ហានោះទេ។ លោកអ្នកនៅតែអាចបន្តការប្រើប្រាស់បណ្តាញសង្គមទាំងនេះជាមួយនិង EMUI បានដដែល៕
