រហូតមកដល់ថ្ងៃនេះ ការរង់ចាំវត្តមានរបស់ស្មាតហ្វូនស៊េរីថ្មីនៅក្នុងត្រកូល Galaxy Note 20 Series គឺនៅតែបន្ត ហើយព្រឹត្តិការណ៍ឆ្នាំនេះ ត្រូវបានគេដឹងថា គឺជាលើកដំបូងនៅក្នុងប្រវត្តិសាស្រ្តហើយ ដែលក្រុមហ៊ុននេះ រៀបចំជាលក្ខណៈអនឡាញ ហើយនេះ គឺជាវិធានការណ៍សម្រាប់ទប់ទល់ទៅនឹងកូរ៉ូណាវីរុស។ ព្រឹត្តិការណ៍នេះ នឹងធ្វើឡើងនៅថ្ងៃទី 5 ខែសីហាខាងមុខនេះ ប៉ុន្តែវានៅមិនទាន់មានការបញ្ជាក់ជាផ្លូវការនៅឡើយទេ។ ពេលនេះ មានការបែកធ្លាយថ្មីទៀតហើយអំពីស្មាតហ្វូន Galaxy Note 20 នេះ។
យោងតាមព័ត៌មានថ្មីនៅពេលនេះ បានអោយដឹងថា ស្មាតហ្វូន Samsung Galaxy Note 20 series ទទួលបាននូវវិញ្ញាបនបត្រពី NFC Forum ហើយក្នុងនោះក៏មានការបង្ហាញអំពីលេខម៉ូឌែលផងដែរ មានដូចជា SM-981U និង SM-986ដែលត្រូវបានគេ វាអាចជាស្មាតហ្វូន Galaxy Note 20 និង Note 20 Plus/Ultra។ នៅលើវេបសាយរបស់ NFC Forum នេះគឺមិនមានការបង្ហាញនូវលក្ខណៈសម្បត្តិរបស់ស្មាតហ្វូនទាំងពីរនេះនៅឡើយទេ ប៉ុន្តែស្មាតហ្វូន ‘Galaxy Note 20 Ultra’ ក៏បង្ហាញខ្លួននៅលើឯកសារវិញ្ញាបនបត្រ Bluetooth SIG ថ្មីដែលមានការបែកធ្លាយកាលពីដើមខែនេះផងដែរ។
Ice Universe បាននិយាយថា ក្រុមហ៊ុនបច្ចេកវិទ្យានេះ អាចនឹងផ្លាស់ប្តូរគំនិតក្នុងការដូរឈ្មោះពី ‘Ultra’ ទៅជា ‘Plus’ វិញផងដែរ។ Ice Universe បានបញ្ជាក់បន្ថែមថា ស្មាតហ្វូន Galaxy Note 20 Ultra នឹងក្លាយជា Top Model របស់ស្មាតហ្វូនត្រកូល Galaxy Note 20 ។ ស្មាតហ្វូននេះ នឹងប្រើប្រាស់នូវបន្ទះឈីប Qualcomm’s Snapdragon 865+ និងមានអេក្រង់ 120Hz refresh rate ជាមួយនឹងកម្រិតភាពច្បាស់ QHD + ថែមទៀតផង៕