របាយការណ៍ថ្មីចេញពីកំពូលអ្នកវិភាគឧបករណ៍ Apple iOS គឺលោក Ming-Chi Kuo បានឲ្យដឹងថា ទូរស័ព្ទ iOS ជំនាន់ថ្មីគឺ iPhone 13 Series នឹងបំពាក់នូវមុខងារថ្មីមួយហៅថា LEOs ឬ Low Earth Orbit Satellite ដែលមានភ្ជាប់មកជាមួយនឹងឈីបសេវា Qualcomm X60 ស្រាប់ ដែលមុខងារថ្មីនេះ គឺអនុញ្ញាតិឲ្យអ្នកប្រើ iPhone 13 Series អាចធ្វើការហៅទូរស័ព្ទចេញ ឬផ្ញើសារ និងប្រើប្រាស់អ៊ីនធ័រណិតបានដោយមិនចាំបាច់ពឹងលើប្រព័ន្ធសេវាស៊ីមកាត ឬក៏ស្ថិតនៅតំបន់ដែលគ្មានសេវា។
លោក Kuo បានពន្យល់បន្ថែមថា ប្រតិបត្តិករបណ្តាញនឹងត្រូវធ្វើការជាមួយអ្នកផ្តល់សេវាកម្មទំនាក់ទំនងប្រព័ន្ធផ្កាយរណបដូចជាក្រុមហ៊ុន Globalstar ជាដើម ដើម្បីភ្ជាប់ទូរស័ព្ទ iPhone ទៅកាន់បណ្តាញផ្កាយរណប LEOs របស់ពួកគេដោយមិនចាំបាច់មានកិច្ចសន្យាបន្ថែម ឬថ្លៃចំណាយផ្សេងនោះទេ។
ក្រុមហ៊ុនផ្តាយរណប Globalstar ក៏មានប្រេកង់សេវាកម្រិត n53 របស់ខ្លួនផងដែរ ដែលនឹងត្រូវបានគាំទ្រដោយម៉ូឌឹមសេវា X65 5G ជំនាន់ថ្មីរបស់ Qualcomm ដែលនឹងបង្ហាញវត្តមាននាពេលខាងមុខនេះ។ ចំនែកក្រុមហ៊ុន SpaceX គឺជាក្រុមហ៊ុនផ្កាយរណប LEO ផ្សេងទៀតដែលបាននឹងកំពុងប្រើនូវបច្ចេកវិទ្យាផ្តល់សេវាអ៊ីនធ័រណិតតាមប្រព័ន្ធ Satellite Broadband ទៅកាន់អតិថិជនរបស់ខ្លួនផងដែរ។
លោក Ming-Chi Kuo បានបញ្ជាក់ទៀតថា Apple មានសុទិដ្ឋិនិយមចំពោះការធ្វើទំនាក់ទំនងឧបករណ៍ជាមួយនឹងប្រព័ន្ធផ្កាយរណប ដើម្បីបង្កើតឱកាសក្នុងការពង្រឹងមូលដ្ឋានទីផ្សាររបស់ខ្លួនឲ្យកាន់តែមានភាពរឹងមាំជាងដៃគូប្រគូត។ ជាងនេះទៅទៀត Apple ត្រូវបានគេរាយការណ៍ថា បានបង្កើតក្រុមការងារផ្ទាល់ខ្លួន ដើម្បីបង្កើតឱកាសក្នុងការអភិវឌ្ឍន៍បច្ចេកវិទ្យាតភ្ជាប់ផ្កាយរណបទៅកាន់ឧបករណ៍របស់ខ្លួននាពេលអនាគតថែមទៀតផង។