មានរយៈពេលជាច្រើនសប្តាហ៍ហើយចាប់តាំងពីក្រុមហ៊ុន Apple ចាប់ផ្តើមដាក់លក់នូវស្មាតហ្វូន iPhone 13 Series នៅក្នុងទីផ្សារជាច្រើននៅជុំវិញពិភពលោក។ ក្រុមហ៊ុនបច្ចេកវិទ្យានេះប្រឈមមុខទៅនឹងបញ្ហាជាច្រើនជាមួយនឹងផលិតកម្មរបស់ខ្លួនទៅលើផលិតផលថ្មីៗដោយសារតែខ្វះទៅលើបន្ទះឈីប ហើយពេលនេះ គឺហាក់ដូចជាមានបញ្ហាជាច្រើនបានកើតឡើងផងដែរ។
តាមការរាយការណ៍ចុងក្រោយបំផុតនោះ ក្រុមហ៊ុន Apple នឹងធ្វើការកាត់បន្ថយទៅលើការផលិតស្មាតហ្វូន iPhone 13 រហូតដល់ទៅ 10 លានគ្រឿងដោយសារតែកង្វះខាតទៅលើបន្ទះឈីប។ ក្រុមហ៊ុនបច្ចេកវិទ្យាយក្សនេះគ្រោងនឹងធ្វើការផលិតនូវស្មាតហ្វូនដល់ទៅ 90 លានគ្រឿងនៅក្នុងត្រីមាសទី 4 នៅក្នុងឆ្នាំនេះ ប៉ុន្តែក្រុមហ៊ុនដៃគូជាច្រើនរបស់ក្រុមហ៊ុន Apple បានជូនដំនឹងទៅកាន់ក្រុមហ៊ុននេះថាការផលិតនឹងមានចំនួនតិចជាងនេះដោយសារតែកង្វះខាតទៅលើសមាសភាគក្នុងការផលិត នេះបើតាមការរាយការណ៍របស់ក្រុមហ៊ុន Broadcom និងTexas Instruments ។
បញ្ហានេះកើតឡើងនៅចំពេលដែលតម្រូវការទៅលើស្មាតហ្វូន Apple iPhone 13 series គឺមានការកើនឡើងខ្លាំង ហើយជាពិសេសវាដល់ពេលរដូវកាលនៃការឈប់សម្រាកនាពេលខាងមុខនេះ។ ស្មាតហ្វូន Apple iPhone 13 ប្រើប្រាស់នូវ Broadcom AFEM-8215 front-end module និង Broadcom BCM59365 wireless power receiver ជាមួយនឹង display power management IC, array driver, flash LED driver និង dual repeater ដែលជាសមាសភាគសម្រាប់ធ្វើការផ្គត់ផ្គង់ដោយក្រុមហ៊ុន Texas Instruments ។
គួរបញ្ជាក់ផងដែរថា កង្វះខាតទៅលើការផ្គត់ផ្គង់ទៅលើបន្ទះឈីបនេះនឹងមានការជះឥទ្ធិពលទៅលើម៉ូឌែល MacBook Pro ដែលនឹងប្រើប្រាស់នូវបន្ទះឈីប Apple M1X ហើយវាគ្រោងនឹងបង្ហាញខ្លួនជាផ្លូវការនៅសប្តាហ៍ក្រោយនេះ៕