យើងបានដឹងរួចហើយថា ព្រឹត្តិការណ៍ដ៏ធំមួយរបស់ក្រុមហ៊ុន Xiaomi អាចនឹងធ្វើឡើងនៅក្នុងខែធ្នូខាងមុខនេះ ដែលក្រុមហ៊ុននេះ នឹងមានការបង្ហាញនូវវត្តមានរបស់ស្មាតហ្វូនXiaomi 12 Series របស់ខ្លួន។ នៅពេលនេះ មានពាក្យចចាមអារ៉ាមជាច្រើន បានបញ្ជាក់បន្ថែមថា ការប្រកាសបង្ហាញវត្តមានរបស់ស្មាតហ្វូន Flagship នេះគឺនៅថ្ងៃទី 16 ខែធ្នូខាងមុខនេះ ហើយអ្វីដែលគួរអោយចាប់អារម្មណ៍នោះ ព្រឹត្តិការណ៍នេះ នឹងមានរយៈពេលដល់ទៅ 4 ម៉ោងេណោះ ដែលពិតជាមានរយៈពេលយូរមែនទែនក្នុងការប្រកាសបង្ហាញនូវស្មាតហ្វូនតែមួយនោះ។
មានការព្យករណ៍ថា ក្រុមហ៊ុននេះ នឹងប្រកាសចេញនូវផលិតផលជាច្រើនទៀតផងដែរ។ ក្រៅពីស្មាតហ្វូន Xiaomi 12 ក្រុមហ៊ុននេះអាចនឹងបង្ហាញចេញនូវវត្តមានរបស់ MIUI 13 និង version ថ្មីនៃស្មាតហ្វូនដែលអាចបត់បាន Xiaomi Mix Fold។ នេះយើងមិនទាន់រាប់នូវវត្តមានរបស់ស្មាតហ្វូន Xiaomi 12 Pro និង Xiaomi 12 Ultra នោះទេ។ ក្រុមហ៊ុននេះអាចនឹង បង្ហាញនូវស្មាតហ្វូនទាំងនេះនៅក្នុងឆ្នាំ 2022 ។
បើតាមការបញ្ជាក់ចេញពីព័ត៌មាននេះ គឺបាននិយាយថា ស្មាតហ្វូន Xiaomi 12 នឹងមានអេក្រង់ AMOLED ជាមួយនឹងកម្រិត refresh rate ខ្ពស់ និងកម្រិតភាពច្បាស់ 2K បន្ទះឈីប Snapdragon 8 Gen1 platform, 120W wired charging និងកាមេរ៉ាខាងក្រោយ 3 គ្រាប់ជាមួយនឹងកាមេរ៉ាគោល 50MP។ ក្រុមហ៊ុននេះ អាចនឹងទម្លាយនូវព័ត៌មានជាច្រើនទៀតមុនការប្រកាសជាផ្លូវការនេះ៕
