Huawei ក្នុងប្រទេសកម្ពុជាយើងបាននឹងកំពុងត្រៀមប្រកាសចេញស្មាតហ្វូនជំនាន់ថ្មីម៉ូដែល Nova 8i នៅដើមខែក្រោយនេះ។ ដោយឡែកនៅឯប្រទេសចិនដែលជាប្រទេសកំណើត Huawei វិញ កាលពីម្សិលមិញនេះបានប្រកាសចេញសមាជិកថ្មីមួយទៀតក្នុងគ្រួសារ Nova 8 ម៉ូដែល Nova 8 SE មួយបន្ថែមទៀត។
សមាជិកថ្មី Nova 8 SE ត្រូវបានក្រុមហ៊ុនបំពាក់នូវបន្ទះឈីប Kirin 710A ដែលជាឈីប 4G ផ្ទាល់របស់ក្រុមហ៊ុន Huawei។ ស្មាតហ្វូនស៊េរីថ្មីនេះគាំទ្រនូវបច្ចេកវិទ្យាសាកភ្លើងល្បឿនលឿនកំលាំង 66W និងមានថ្មទំហំ 3,800mAh។ Nova 8 SE 4G ភ្ជាប់ជាមួយរ៉េមទំហំ 8GB និងម៉េមូរីក្នុងម៉ាស៊ីនស្រាប់ទំហំ 128GB ព្រមទាំងប្រតិបត្តិការដោយ HarmonyOS 2 ចេញពីប្រអប់តែម្តង។
Huawei Nova 8 SE 4G បំពាក់នូវបន្ទះអេក្រង់ Waterdrop-OLED Display ទំហំ 6.5 អ៊ីញដែលគាំទ្រកម្រិតបង្ហាញ Full-HD និងមានបច្ចេកវិទ្យាស្កែនក្រយ៉ៅម្រាមដៃដោះសោរក្រោមអេក្រង់ផងដែរ។ សម្រាប់ប្រព័ន្ធកាមេរ៉ាវិញ Nova 8 SE 4G ត្រូវបាន Huawei ដំឡើងនូវកាមេរ៉ាក្រោយចំនួន 4 គ្រាប់ស្ថិតនៅលើកញ្ចប់លែនរាងការ៉េដោយមានសែនស័រមេទំហំ 64MP ជាមួយសែនស័រ Ultra-wide ទំហំ 8MP រួមនឹងសែនស័រ Macro និង Depth Sensor ទំហំ 2MP ដូចគ្នា ព្រមទាំងមានអំពូលភ្លើង LED Flash មួយគ្រាប់ស្ថិតនៅកណ្តាលលែនកាមេរ៉ាទាំង 4 គ្រាប់។ ហើយសម្រាប់សែនស័រសែលហ្វីស្ថិតក្នុងឆកដំណក់ទឹករបស់អេក្រង់មានទំហំ 16MP។
Huawei បានប្រកាសចេញលក់ Nova 8 SE 4G នៅទីផ្សារប្រទេសចិនជាមួយតម្លៃខ្ទង់ CNY 2,099 ឬប្រហែល $330 ជាមួយជម្រើសពណ៌ប្រដេញ Sky Gradient, ទឹកប្រាក់ Silver, ខ្មៅ Black និងខៀវ Blue៕