ទីផ្សារស្មាតហ្វូនអេក្រង់បត់ គឺនៅតែជាទីផ្សារថ្មីបំផុតមួយសម្រាប់ឧស្សាហកម្មស្មាតហ្វូន។ ជាការពិតណាស់ Samsung គឺជាក្រុមហ៊ុនដំបូងគេដែលបាន
ណែនាំបង្ហាញស្មាតហ្វូនអេក្រង់បត់ដំបូងរបស់ខ្លួនកាលពីអំឡុងឆ្នាំ 2019។ រហូតមកទល់នឹងពេលបច្ចុប្បន្ននេះក្រុមហ៊ុនបច្ចេកវិទ្យាខ្នាតយក្សលំដាប់ថ្នាក់ពិភពលោករបស់កូរ៉េខាងត្បូងមួយនេះ នៅតែជាក្រុមហ៊ុនដែលឈានមុខគេក្នុងឧស្សាហកម្មស្មាតហ្វូនមួយនេះដោយកាន់កាប់ចំនែកទីផ្សារស្ទើតែទាំងស្រុង បើទោះបីជា មានក្រុមហ៊ុនដៃគូប្រជែងធំៗមួយចំនួនបានប្រកាសចេញស្មាតហ្វូនអេក្រង់បត់បានដូចគ្នា ក្នុងនោះរួមមាន Huawei, Xiaomi, vivo និង OPPO ជាដើម។
ថ្មីៗនេះបើតាមរបាយការណ៍ស្រាវជ្រាវទីផ្សាររបស់ស្ថាប័ន IDC បានបង្ហាញថា មានស្មាតហ្វូនអេក្រង់បត់ចំនួន 13.5 លានគ្រឿងនឹងត្រូវបានលក់នៅទូទាំងទីផ្សារសកលនៅក្នុងឆ្នាំ 2022។ តាមតួរលេខនេះ បង្ហាញថា ស្មាតហ្វូនអេក្រង់បត់មានចំនែកទីផ្សារសរុប 1.1% ក្នុងចំនួនស្មាតហ្វូនលក់បានសរុប 1,352 ពាន់លានគ្រឿងនៅទូទាំងទីផ្សារសកលលោក។ IDC បានផ្តល់ការធ្វើព្យាករណ៍ក្នុងចន្លោះឆ្នាំ 2021 ទៅ 2026 គឺនៅត្រឹមឆ្នាំ 2026 ចំនែកទីផ្សារស្មាតហ្វូនអេក្រង់បត់នឹងកើនឡើងដល់ 38.7%។
ដោយបច្ចុប្បន្ននេះ ទីផ្សារស្មាតហ្វូនអេក្រង់បត់នឹងក្តោបបានចំនែកទីផ្សារ 2.8% នៃស្មាតហ្វូនទាំងអស់ដែលលក់បានទូទាំងពិភពលោក ដូចនេះចំនែកទីផ្សារស្មាតហ្វូនអេក្រង់បត់នឹងបន្តកើនឡើងជាលំដាប់ចាប់ពីអំឡុងពេលនេះ។ យោងទៅលើរបាយការណ៍របស់ IDC បានបញ្ជាក់ថា ប្រសិនបើតម្លៃរបស់ស្មាតហ្វូនអេក្រង់បត់ជាមធ្យមធ្លាក់មកនៅត្រឹម $400 ឡើងទៅ នោះទីផ្សារស្មាតហ្វូនប្រភេទនឹងមានទីផ្សាររីកចម្រើនកាន់តែខ្លាំង និងមានចំនែកទីផ្សារកាន់តែខ្ពស់។
ទោះបីជាយ៉ាងណាក៏ដោយ យោងទៅតាម IDC ទូរស័ព្ទអេក្រង់បត់បាននឹងនៅតែជាផលិតផលដែលមានលក្ខណៈពិសេស និងមានតម្លៃថ្លៃបំផុត។ សរុបសេចក្តីមក វាច្បាស់ណាស់ថាទូរស័ព្ទអេក្រង់បត់នឹងមិនក្លាយជាទីផ្សារភាគច្រើនសម្រាប់អ្នកប្រើប្រាស់នៅឆ្នាំ 2026 នោះទេ។ ផ្ទុយទៅវិញ ពួកស្មាតហ្វូនប្រភេទនេះនឹងបន្តស្ថិតនៅក្នុងកម្រិតទីផ្សារបែប Premium Products ដែលមានថ្លៃៗជាមួយនឹងបច្ចេកវិទ្យាទំនើបបំផុត។ ក្នុងនោះ Samsung នៅតែត្រូវបានគេមើលឃើញថា សម្រេចបានផលិតផលអេក្រង់បត់ដែលបំពាក់នូវបច្ចេកវិទ្យាដ៏អស្ចារ្យ និងឈានមុខគេ។
ជាឧទាហរណ៍ស្រាប់ ក្រុមហ៊ុនកូរ៉េខាងត្បូងនេះបានលក់ទូរស័ព្ទអេក្រង់បត់បានរាប់សិបលានគ្រឿងក្នុងតម្លៃជាងមួយពាន់ដុល្លារឡើង ដែលក្តោបបានចំនែកទីផ្សារសរុប 1% នៃការលក់ស្មាតហ្វូនទាំងអស់នៅទូទាំងពិភពលោក បើទោះបីជាស្ថិតក្នុងបរិបទជំងឺរាតត្បាត Covid-19 សង្គ្រាមវាទីរវាងរុស្ស៊ីទៅលើអ៊ុយក្រែន និងកើតមានវិបត្តិអតិផរណាសកលលោកក៏ដោយ៕