ថ្មីៗនេះក្រុមហ៊ុន HMD បានប្រកាសពីគម្រោងក្នុងការប្រកាសចេញស្មាតហ្វូនដែលប្រើប្រាស់ស្លាកយីហោផ្ទាល់ខ្លួនតែម្តង ក្រោយពីការប្រកាសចេញស្មាតហ្វូនដែលជ្រកក្រោមស្លាកយីហោ Nokia អស់រយះពេលជាច្រើនឆ្នាំកន្លងមកនេះ។ សម្រាប់ស្មាតហ្វូនដំបូងរបស់ HMD ផ្ទាល់ត្រូវបានគេដឹងថាមានឈ្មោះថា Pulse។ ហើយស្មាតហ្វូនដំបូងរបស់ HMD នេះ ទើបតែបានលេចធ្លាយកាលពីដើមខែនេះ ហើយត្រូវបានគេដឹងថា អាចនឹងបង្ហាញវត្តមានផ្លូវការណ៍នៅក្នុងខែកក្តដា ក្នុងឆ្នាំនេះ។ ប៉ុន្តែ អ្វីៗអាចនឹងប្រែប្រួលព្រោះថា ការបង្ហាញវត្តមានរបស់ HMD Pulse គឺនឹងធ្វើឡើងឆាប់ៗជាងការរំពឹងទុក។
បើផ្អែកទៅលើការចុះបញ្ចីលក់របស់បណ្តាញលក់រាយ Gigantti របស់ប្រទេសហ្វ្រាំងឡង់ បង្ហាញថា ស្មាតហ្វូន HMD Pulse គឺមានតម្លៃខ្ទង់ €179 ហើយនៅលើបញ្ចីក៏បានបញ្ជាក់ផងដែរថា ស្មាតហ្វូននេះនឹងបង្ហាញវត្តមាននៅថ្ងៃទី 24 ខែមេសា ត្រូវនឹងថ្ងៃពុធ សប្តាហ៍នេះ។ HMD Pulse គឺជាស្មាតហ្វូនកម្រិតថវិកាដែលនឹងមានអេក្រង់ទំហំ 6.56-inch ប្រភេទ LCD Display គាំទ្រកម្រិតបង្ហាញ HD+ (720x1480px) ជាមួយល្បឿន 90Hz។ ស្មាតហ្វូននេះ នឹងបំពាក់បន្ទះឈីប Unisoc T606 SoC ភ្ជាប់ជាមួយរ៉េមទំហំ 6GB និងអង្គផ្ទុកទិន្នន័យទំហំ 128GB។ HMD Pulse នឹងមានថ្មទំហំ 5,000mAh រួមនឹងមានលែនកាមេរ៉ាក្រោយពីរគ្រាប់ទំហំ 50MP Main + 2MP (Macro)និងកាមេរ៉ាសែលហ្វីទំហំ 50MP ជាលែនទំលុះថ្ងាសអេក្រង់។
សម្រាប់ប្រព័ន្ធសុវត្ថិភាពវិញ គឺមានសែនស័រស្កែនក្រយ៉ៅមម្រាមដៃស្ថិតនៅលើប៊ូតុងចាក់សោរផ្ទាល់តែម្តងស្ថិតនៅលើគែមខាងស្តាំ។ HMD Pulse អាចនឹងដំឡើងមកជាមួយប្រតិបត្តិការ Android 14 ចេញពីប្រអប់តែម្តង។ ដោយក្រុមហ៊ុនទំនងជានឹងផ្តល់ជូនការធ្វើបច្ចុប្បន្នភាពប្រតិបត្តិការ Android រយះពេល 2 ឆ្នាំ និងប្រព័ន្ធសុវត្ថិភាពរយះពេល 3 ឆ្នាំ។ HMD Pulse គឺមានទំហំវិមាត្រ 163.19 x 75.02 x 8.55 mm ជាមួយទំងន់ 196 ក្រាម ព្រមទាំងមានប្រព័ន្ធការពារធូលី និងទឹកកម្រិតស្រាល IP52 dust and splash resistance ថែមទៀតផង។ HMD ក៏បានអះអាងថា Pulse ក៏នឹងផ្តល់នូវភាពងាយស្រួលក្នុងការដោះជួសជុលផងដែរ៕