កំពូលឈីបជំនាន់ថ្មី Snapdragon 8 Gen 3 បានបង្ហាញវត្តមាននៅក្នុងព្រឹត្តិការណ៍ Qualcomm Snapdragon Summit ដែលធ្វើឡើងនៅថ្ងៃទី 25 ខែតុលា ឆ្នាំ 2023។ នៅថ្ងៃបន្ទាប់ក្រុមហ៊ុនផលិតស្មាតហ្វូន Xiaomi បានធ្វើការប្រកាសចេញស្មាតហ្វូនជំនាន់ Xiaomi 14 Series ដែលបំពាក់កំពូលឈីប Snapdragon 8 Gen 3 ដំបូងគេនៅក្នុងទីផ្សារប្រទេសចិន និងមានលក់នៅប៉ុន្មានថ្ងៃបន្ទាប់។ ហើយនៅក្នុងពេលនេះបើតាមការបង្ហើបនៅលើគណនី Yogesh Brar បានបញ្ជាក់ថា Xiaomi នឹងប្រើប្រាស់បន្ទះឈីបជំនាន់ថ្មីរបស់ Qualcomm គឺ Snapdragon 8 Gen 4 ដំបូងគេសម្រាប់ស្មាតហ្វូនជំនាន់ថ្មីរបស់ខ្លួនផងដែរ។
តាមការបញ្ជាក់នៅលើគណនីដដែលបានឲ្យដឹងថា Xiaomi នឹងធ្វើការប្រកាសចេញស្មាតហ្វូនកំពូលជំនាន់ថ្មីរបស់ខ្លួនដំបូងគេដែលប្រើបន្ទះឈីបកំពូលជំនាន់ថ្មី Snapdragon 8 Gen 4។ ហើយក្រុមហ៊ុនបន្ទាប់ពី Xiaomi គឺ OnePlus និង iQOO។ សម្រាប់កំពូលស្មាតហ្វូនជំនាន់ថ្មី Xiaomi ដែលនឹងបំពាក់កំពូលឈីបជំនាន់ថ្មី Snapdragon 8 Gen 4 គឺ Xiaomi 15 Series ដែលមានដូចជា Xiaomi 15 និង 15 Pro។
ចំនែកកំពូលស្មាតហ្វូនពីរម៉ូដែលបន្ទាប់ដែលបំពាក់បន្ទះឈីបកំពូលជំនាន់ថ្មីនេះដែរ នឹងមានដូចជា OnePlus 13 និង iQOO 13 Series។ ចំនែកកំពូលស្មាតហ្វូន Galaxy S25 Series របស់ Samsung ដែលនឹងបំពាក់កំពូលឈីប Oryon CPU ជំនាន់ថ្មីនៅលើ Snapdragon 8 Gen 4 គឺនឹងបង្ហាញវត្តមាននៅខែមករា ឬកុម្ភៈ ឆ្នាំ 2025។
ហើយសម្រាប់ Snapdragon 8 Gen 4 ដែលត្រូវប្រើនៅលើ Galaxy S-Phone ឆ្នាំ 2025 នឹងមានការបង្កើនសមត្ថភាពលើល្បឿន Over-clock ដូចអ្វីដែល Samsung បានធ្វើសម្រាប់រយះពេល 2 ឆ្នាំ ឬពីជំនាន់ចាបតាំងពី Galaxy S23 និង Galaxy S24 Series ដូច្នេះដែរ។ សម្រាប់កំពូលឈីបជំនាន់ថ្មី Snapdragon 8 Gen 4 ត្រូវបានលោក Don McGuire ដែលជា CMO របស់ Qualcomm បានបញ្ជាក់ថា នឹងបង្ហាញវត្តមាននៅក្នុងខែតុលា ឆ្នាំ 2024 នៅក្នុងព្រឹត្តិការណ៍ Snapdragon Summit 2024។
បន្ទះឈីបជំនាន់ថ្មី Snapdragon 8 Gen 4 នឹងដំណើរការលើប្រព័ន្ធ Oryon-core CPU ជំនាន់ថ្មី ហើយក៏ជាឈីបកំពូលដំបូងគេដែលដំណើរការជាមួយប្រព័ន្ធ Custom-core ថ្មីពី Qualcomm។ សម្រាប់ប្រព័ន្ធOryon-core CPU ត្រូវបានប្រើនៅលើឈីប Snapdragon X Elite CPU ដែលប្រើសម្រាប់ម៉ាស៊ីនកុំព្យូទ័រ Desktop ដែលផ្តល់នូវប្រសិទ្ធិភាពល្បឿនដ៏ប្រសើរបំផុត និងប្រើប្រាស់ថាមពលថ្មតិចបំផុត៕