ស្មាតហ្វូន Hi Nova 12 SE ត្រូវបានគេទម្លាយថា គ្រោងនឹងមានការប្រកាសជាផ្លូវការនៅក្នុងពេលឆាប់ៗនេះ ដោយការលក់មុន (pre-sale) ទៅលើស្មាតហ្វូននេះ គឺនឹងធ្វើថ្ងៃទី 25 ខែមេសានេះ។ ថ្មីៗនេះ ក្រុមហ៊ុននេះ ទើបតែទម្លាយជាផ្លូវការអំពីស្មាតហ្វូននេះ នៅលើបណ្តាញ Weibo ដែលមានការបង្ហាញអំពីការឌីស្សាញទាំងស្រុង និងមុខងារជាច្រើនទៀតផងដែរ។ បើមើលទៅលើនៅក្នុងរូបភាព Poster ផ្សព្វផ្សាយថ្មីនេះមានការបង្ហាញអំពីការឌីស្សាញរូបរាងរបស់ស្មាតហ្វូន Hi Nova 12 SE នេះដែលមានភាពស្រដៀងគ្នាទៅនឹងរូបភាព render ដែលបែកធ្លាយកាលពីប៉ុន្មានសប្តាហ៍មុននេះ។
ស្មាតហ្វូនជំនាន់ថ្មី Hi Nova 12 SE នេះ គឺមានប្រើប្រាស់នូវគែម ovated-rectangular frame ជាមួយនឹងការឌីស្សាញរង្វង់ធំមួយនៅផ្នែកខាងលើយ៉ាងទាក់ទាញ។ គេសង្កេតឃើញនៅលើរង្វង់នេះ មានកាមេរ៉ាគោល និងក្រោម lens មានភ្លើង LED Flash ផងដែរ។ ភាគច្រើនឧបករណ៍របស់ក្រុមហ៊ុន China Post Communication គឺមានភាពស្រដៀងគ្នាច្រើនទៅនឹងស្មាតហ្វូន Huawei Nova។ ប៉ុន្តែសម្រាប់ពេលនេះ អតិថិជនជាច្រើន នឹងបានឃើញនូវការឌីស្សាញទម្រង់ថ្មីនៅផ្នែកខាងក្រោយរបស់ស្មាតហ្វូននេះ ជាមួយនឹងឡូហ្គោពណ៌ទឹកប្រាក់ផងដែរ។ ចំពោះផ្នែកខាងមុខរបស់ស្មាតហ្វូននេះគឺមាន punch-hole នៅកណ្តាលសម្រាប់កាមេរ៉ា Selfie ។ ស្មាតហ្វូននេះនឹងមាន ២ ពណ៌គឺពណ៌ខ្មៅ និងពណ៌ស។
ស្មាតហ្វូន Hi Nova 12 SE នេះនឹងមានកាមេរ៉ាគោលទំហំ 100MP នៅផ្នែកខាងក្រោយជាមួយនឹងមុខងារដ៏អស្ចារ្យជាច្រើន។ សម្រាប់ព័ត៌មានលម្អិតជាច្រើនទៀតនៅលើ Poster នេះ ក៏មានការបង្ហាញថា ស្មាតហ្វូនថ្មីនេះនឹងមានការទ្រទ្រង់ទៅលើ 5G dual-mode ដែលផ្តល់នូវការទំនាក់ទំនងកាន់តែអសា្ចរ្យសម្រាប់អ្នកប្រប្រាស់ថែមទៀតផង។ ស្មាតហ្វូន Hi Nova 12 SE នឹងទម្លាយនូវមុខងារជាច្រើនទៀតនៅពេលខាងមុខទំរាំដល់ពេលដែលចាប់ផ្តើមលក់មុន (pre-sale) នៅថ្ងៃទី 25 ខែមេសាខាងមុខនេះ៕
