ក្រុមហ៊ុន Hyundai Motor និងក្រុមហ៊ុន Kia Motors នៅតែរក្សានូវដំណែងជាក្រុមហ៊ុនផលិតរថយន្តចំណាត់ថ្នាក់លេខរៀងទី 5 នៅក្នុងពិភពលោកនៅក្នុងឆមាសទី 1 នៅក្នុងឆ្នាំ 2018 នេះ នេះបើតាមប្រភពទិន្នន័យបញ្ជាក់នៅថ្ងៃទី 5 ខែសីហានេះ។ ទិន្នន័យនេះ គឺផ្អែកទៅលើរបាយការណ៍ដែលចុះផ្សាយថា ក្រុមហ៊ុន Hyundai Motor Group ដែលមានក្រុមហ៊ុនផលិតរថយន្តចំនួនពីរស្ថិតនៅក្រោមចំណុះរបស់ខ្លួននោះ លក់រថយន្តបានចំនួន 3.59 លានគ្រឿង នៅក្នុងខែមករាដល់ខែមិថុនានេះ ហើយវានៅតែបន្តក្នុងការគ្រប់គ្រងទីផ្សារបរទេសផងដែរ។
ក្រុមហ៊ុន Hyundai និង Kia ទាំងពីរនេះ មានការតស៊ូនៅក្នុងប៉ុន្មានឆ្នាំនេះ បន្ទាប់ពីការលក់របស់ក្រុមហ៊ុននេះ មានការថយចុះខ្លាំងនៅក្នុងប្រទេសចិន ដែលជាទីផ្សាររថយន្តធំបំផុតនៅក្នុងពិភពលោក និងដោយសាតែការធ្លាក់ចុះនៃរថយន្ត SUV នៅក្នុងប្រទេសនេះ។ សម្រាប់សហព័ន្ធនៃក្រុមហ៊ុន Nissan-Mitsubishi Alliance ឈរនៅចំណាត់ថ្នាក់កំពូលនៅក្នុងឆ្នាំ 2017 នេះជាមួយនឹងការលក់នូវរថយន្តច្រើនបំផុតនៅក្នុងរយៈពេល 6 ខែនេះ។
ក្រុមហ៊ុន Volkswagen Group របស់អាល្លឺម៉ង់ ក្រុមហ៊ុន Toyota Motor Corp របស់ជប៉ុន និងក្រុមហ៊ុន General Motors នៅក្នុងសហរដ្ឋអាមេរិក ក៏ឈរនៅចំណាត់ថ្នាក់កំពូលទាំង 4 ផងដែរ។ សម្ព័ន្ធមិត្តរបស់បារាំង និងជប៉ុនលក់រថយន្តបានចំនួន 5.53 លានគ្រឿង ស្របពេលដែលក្រុមហ៊ុន Volkswage លក់បានចំនួន 5.51 លានគ្រឿង និងក្រុមហ៊ុន Toyota លក់រថយន្តក្រោម 5.21 លានគ្រឿងនោះ។
តួរលេខនៃក្រុមហ៊ុននេះ បានទម្លាយថា ការលក់សរុបសម្រាប់ក្រុមហ៊ុនសម្ព័ន្ធមិត្តនេះ គឺមានការធ្លាក់ចុះដំបូងបំផុតនៅក្នុងរយៈពេល 5 ឆ្នាំដោយសារតែវាមានការលក់ទាបនៅក្នុងទីផ្សារនៃអាមេរិកខាងជើង បើទោះបីជាក្រុមហ៊ុនផលិតរថយន្តទាំងនេះដំណើរការបានយ៉ាងល្អនៅក្នុងប្រទេសចិនក៏ដោយ។ ក្រុមហ៊ុន VW បានបញ្ជាក់ថា ខ្លួនលក់រថយន្តបាន 7.1% កើនឡើងនៅក្នុងឆ្នាំនេះ ស្របពេលដែលក្រុមហ៊ុន Toyota មានការកើនឡើង 1.6% ។ ក្រុមហ៊ុន GM វិញ គឺមានការលក់ធ្លាក់ចុះ 11.3% ប្រហែលជា 4.15 លានគ្រឿងនៅក្នុងទីផ្សារនៃប្រទេសរបស់ខ្លួននោះ៕