ថ្មីៗនេះ លោក Michael J. Weirsky វ័យ 54 ឆ្នាំ គឺប្រជាពលរដ្ឋម្នាក់រស់នៅក្នុងទីក្រុង New Jersey សហរដ្ឋអាមេរិក មានសំណាងបានឈ្នះឆ្នោត Mega Millions ដែលមានទឹកប្រាក់ចំនួនដល់ទៅ 273 លានដុល្លារអាមេរិក។ ជាមួយនឹងទឹកប្រាក់យ៉ាងច្រើននេះ លោកពិតជាមានភាពត្រេកអរជាខ្លាំង ពីព្រោះថា នេះគឺជាទឹកប្រាក់ច្រើនបំផុតដែលលោកមិនដែលនឹកស្មានថា នឹងបានប៉ះផង។ លោក Weirsky គឺជាបុរសកំសត់ម្នាក់ ដែលបានលែងលះអស់រយៈពេលជាង 15 ឆ្នាំហើយ។ មានរឿងមួយ ដែលមិនគួរអោយជឿ ដោយលោកមិនបានយកប្រាក់ជាច្រើននេះ ទៅទិញរថយន្តស៊េរីទំនើប Ferrari, Lamborghini ឬ Bugatti ដូចបណ្តាអ្នកដែលធ្លាប់មានលុយកន្លងមកនោះទេ លោក Weirsky បែជាសម្រេចចិត្តមកទិញរថយន្តស៊េរីថ្មី Ford F-150 Raptor ទៅវិញ ដែលរថយន្តនេះ មានតម្លៃត្រឹមតែ $60,000 ប៉ុណ្ណោះ។
គាត់និយាយថា “រឿងដំបូងដែលខ្ញុំធ្វើនោះ គឺការជ្រើសរើសនូវរថយន្ត Pickup ស៊េរីថ្មីរបស់ខ្ញុំនោះ គឺរថយន្ត Ford Raptor ដែលនេះគឺជារថយន្តដែលខ្ញុំធ្វើការរង់ចាំជាយូរមកហើយ ហើយនៅពេលនេះ ខ្ញុំអាចទិញវាបានហើយ។”កន្លងមក លោកបានប្រាប់ថា ស្ថិតនៅក្នុងស្ថានភាពដ៏លំបាកជាច្រើន លោកតែងតែមានក្តីស្រម៉ៃចង់ក្លាយជាម្ចាស់របស់រថយន្ត Ford Raptor នៅថ្ងៃណាមួយ ដែលនេះគឺជាសម្ពាធមួយទៀតនៅក្នុងជីវភាពនៃការរស់នៅប្រចាំថ្ងៃរបស់លោកកាលគ្រានោះ។
ប៉ុន្តែនៅពេលនេះ អ្វីគ្រប់យ៉ាងមានការផ្លាស់ប្តូរហើយ។ លោក Weirsky ដែលមានការលំបាកទៀតហើយ ពេលនេះគាត់អាចទិញរថយន្តក្នុងក្តីស្រម៉ៃរបស់គាត់បានហើយ។ រថយន្តស៊េរីថ្មី Ford Raptor នេះ អាចមានតម្លៃរហូតដល់ទៅប្រហែលជា $80,000 សម្រាប់ការបំពាក់នូវ SuperCrew។ ផ្អែកទៅលើតម្លៃរបស់ម៉ូដែល CrewCab គឺប្រហែលជា $55,000 ហើយពេលនេះ គាត់មានលទ្ធភាពទិញរថយន្តដែលគាត់ប្រាថ្នានេះហើយ។
សរុបមកនេះគឺជាពិតជារឿងមួយដ៏ល្អមែនទែនសម្រាប់គាត់ ហើយក៏ជាការចាប់ផ្តើមនូវជីវិតថ្មីរបស់គាត់ នៅពេលដែលគាត់បានឈ្នះឆ្នោតដ៏មហាសាលនៅពេលនេះ ដែលគ្មានអ្នកណាម្នាក់ ធ្លាប់បានគិតស្រម៉ៃថា នឹងមានសំណាងឈ្នះទឹកប្រាក់ជាច្រើននេះទេ។ ហើយនៅពេលដែលឈ្នះ តើត្រូវរៀបចំលុយទាំងនោះដោយរបៀបណាទៅ? សម្រាប់លោក Weirsky នៅពេលនេះ គឺលោក អាចរីករាយជាមួយនឹងរថយន្តថ្មីនេះដែលជារថយន្តក្នុងក្តីស្រមៃរបស់គាត់ហើយ។ រថយន្តនេះ នាំគាត់ទៅកាន់ដំណើរផ្សងព្រេងដ៏អស្ចារ្យក្នុងជីវិតរបស់គាត់ជាក់ជាមិនខាន៕