ក្រុមហ៊ុន Cadillac បានបង្ហាញនូវរថយន្ត SUV របស់ខ្លួន ម៉ូដែលថ្មី Cadillac XT4 2019 មានការរចនាថ្មី គឺពិតជាស្រស់ស្អាតបំផុត។ រថយន្តនេះ មានកៅអីចំនួន 5 ដែលអាចផ្ទុកមនុស្សបានច្រើនជាងរថយន្ត XT5 ដែលលក់ដាច់ខ្លាំងជាងគេបំផុត។ សម្រាប់ការរចនារូបរាងរបស់រថយន្តស៊េរីថ្មីរបស់ក្រុមហ៊ុន Cadillac នេះ ត្រូវបានគេមើលឃើញថា រថយន្ត 2019 XT4 គឺជាបងប្អូនជាមួយនឹងរថយន្ត XT5 ប៉ុន្តែរថយន្តនេះ ក៏មានលក្ខណៈខុសប្លែកគ្នាជាច្រើនផងដែរ។
នៅផ្នែកខាងមុខរបស់រថយន្តស៊េរីថ្មីនេះ គឺមានការរចនាថ្មី យ៉ាងប្រណិត ដែលបានធ្វើឱ្យរថយន្ត XT4 នេះ មានរូបរាងថ្មី កាន់តែស្អាត និងទាក់ទាញយ៉ាងខ្លាំង ។ សម្រាប់ភ្លើងចង្កៀងរបស់រថយន្តនេះ គឺភ្លឺច្បាស់ រួមជាមួយនឹងម៉ូតថ្មី។ បើធៀបជាមួយនឹងរថយន្ត XT5 នោះ ផ្នែកខាងក្រោយរបស់រថយន្តស៊េរី XT4 គឺមានរូបរាងតូចស្រាលជាង។ រថយន្តថ្មីនេះ មានរូបរាងតូច ប៉ុន្តែមិនចង្អៀតនោះទេ។ សម្រាប់ដំបូលរបស់រថយន្តនេះគឺជាប្រភេទ Panoramic sunroofs ។
នៅផ្នែកខាងក្នុង ក្រុមហ៊ុន Cadillac ក៏បានប្រើប្រាស់នូវ 8-inch touchscreen សម្រាប់ការផ្តល់ព័ត៌មានជាមួយនឹងមុខងារជាច្រើនដូចជា Cadillac User Experience ភ្ជាប់ជាមួយនឹង CarPlay និង Android Auto ផងដែរ។ នៅលើរថយន្តនេះ គឺមានភ្ជាប់ជាមួយនឹង wireless charging pad ដែលមានភ្លើង 15W សម្រាប់ប្រើប្រាស់ជាមួយនឹងរថយន្តជាច្រើនស៊េរី ជាពិសេសនោះ ក្រុមហ៊ុន ក៏បានដាក់អោយមានការប្រើប្រាស់ជាមួយនឹង NFC ទៅកាន់ស្មាតហ្វូនផងដែរ។
រថយន្ត 2019 XT4 ប្រើប្រាស់ម៉ាស៊ីន 4 ស៊ីឡាំង 2.0L ដែលមានកម្លាំងម៉ាស៊ីន 237 សេះ និងកម្លាំងរមួល 258 lb-ft ហើយនិងមានចង្កឹះលេខ 9 វគ្គ ប៉ុន្តែមិនប្រើប្រាស់នូវ Hybrid នោះទេ ។ ក្រុមហ៊ុន Cadillac បានសម្រេចប្រើប្រាស់ថាមពលប្រេង 30mpg នៅលើផ្លូវ Highway, 25mpg នៅក្នុងក្រុង និង 27 mpg សម្រាប់ការរួមបញ្ចូលគ្នានោះ។ ក្រុមហ៊ុន Cadillac ក៏ដាក់តម្លៃរបស់រថយន្តស៊េរីថ្មី 2019 XT4 Luxury ចាប់ផ្តើមពី $35,790 ហើយសម្រាប់រថយន្ត XT4 Sport គឺមានតម្លៃខ្ពស់ជាងនេះទៀត៕
