ថ្មីៗនេះក្រុមហ៊ុនផលិតរថយន្តម៉ាក Tank ដែលជាបុត្រសម្ព័ន្ធរបស់ក្រុមហ៊ុន Great Wall Motor បានធ្វើការប្រកាសចេញលក់រថយន្តស៊េរីថ្មីដែលជាប្រភេទរថយន្ត Off-road SUV ម៉ូដែល Tank 300 Hi4-T ក្នុងចំនួនមានកំណត់ត្រឹមតែ 3,000 គ្រឿងតែប៉ុណ្ណោះសម្រាប់ឆ្នាំ 2024 នេះ។ រថយន្ត Off-road SUV ស៊េរីថ្មីនេះ នឹងបង្ហាញខ្លួននៅក្នុងព្រឹត្តិការណ៍ពិព័រណ៌រថយន្តប្រចាំឆ្នាំ 2024 Beijing Auto Show ដែលនឹងធ្វើឡើងនៅចុងខែមេសានេះ។
បើធ្វើការប្រៀបធៀបទៅនឹងម៉ូដែល Tank 300 ICE តម្លៃក្នុងការផលិតរបស់ Tank 300 Hi4-T គឺខ្ពស់ជាងប្រមាណជា $8,300 នេះបើតាមការបញ្ជាក់ពីក្រុមហ៊ុនផ្ទាល់។ បច្ចុប្បន្នរថយន្ត Off-road SUV ម៉ូដែល Tank 300 Series ត្រូវបានដាក់លក់ក្នុងតម្លៃចាប់ពីខ្ទង់ប្រហែល $27,600 នៅទីផ្សារប្រទេសចិន។ សម្រាប់ការឌីស្សាញរូបរាងខាងក្រៅរបស់ Tank 300 Hi4-T គឺដូចគ្នាទៅនឹងម៉ូដែល Tank 300 ស៊េរីដែលជាមួយការរចនាបែបជ្រុង ជាមួយចង្កៀងខាងមុខរចនារាងមូលជាមួយភ្លើង Daytime running light កាត់ត្រង់កណ្តាលចង្កៀង និងមានកង់សាគូនៅផ្នែកខាងក្រោយ។ Tank 300 Hi4-T មានប្រវែងបណ្តោយ 4,760 mm X ទទឹង 1,930 mm x កម្ពស់ 1,903 mm និងគម្លាតរវាងកង់មុខទៅកង់ក្រោយ 2,750 mm រួមនឹងកម្ពស់ពីដីទៅបាតរថយន្ត 222mm។
Tank 300 Hi4-T មានទំងន់ 2,645 គីឡូក្រាម និងអាចអូសសណ្តោនទំងន់បាន 2,000 គីឡូក្រាម និងអាចផ្ទុកទំងន់នៅឃ្លប់ខាងក្រោយបាន 750 គីឡូក្រាម។ នៅលើផ្នែកដំបូល គឺមានបង្កាន់ដៃសម្រាប់ភ្ជាប់ដាក់អីវ៉ាន “luggage racks” ដឹងរឹងមាំ។ រថយន្តនេះ ប្រើប្រាស់យ៉ាន់កង់ទំហំ 18-inch ជាមួយសម្បកកង់បន្ទាលធំរចនាបែបស្ព័រ។
Tank 300 Hi4-T បំពាក់នូវប្រព័ន្ធម៉ាស៊ីន Hi4-T plug-in hybrid system របស់ GWM ដំណើរការជាមួយម៉ាស៊ីនចំនុះ 2.0T កំលាំង 185kW រួមជាមួយប្រព័ន្ធម៉ូទ័រអគ្គិសនីប្រភេទ P2 Electric Motor ភ្ជាប់ជាមួយប្រព័ន្ធ 9HAT ដែលផ្តល់នូវប្រសិទ្ធិភាពថាមពលដ៏ប្រសើរបំផុត ដែលអាចផលិតកំលាំងសរុបបានដល់ 300kW និងប្រព័ន្ធរមូល 750Nm។ បន្ថែមពីនេះ រថយន្ត Off-road SUV ស៊េរីថ្មីនេះមានប្រព័ន្ធ Locking rear សម្រាប់ចាក់ដំណើរការប្រព័ន្ធប៉ុងខាងក្រោយ ក៏ដូចជាដំណើរការដោយប្រព័ន្ធ Four-Wheel-Drive System ថែមទៀតផង។
សម្រាប់កញ្ចប់អាគុយអគ្គិសនីវិញ Tank 300 Hi4-T បានប្រើនូវប្រភេទ ternary lithium battery pack ដែលសាកថ្មមួយពេញម្តងអាចបើកបរដោយប្រើថាមពលអគ្គិសនីសុទ្ធបានចំងាយផ្លូវ 105km នេះបើតាមការបញ្ជាក់ពីស្ថាប័ន WLTC។ សម្រាប់សមត្ថភាពក្នុងការបើកបររបស់ Tank 300 Hi4-T អាចធ្វើបានដល់ចំងាយផ្លូវ 860km ជាមួយកម្រិតស៊ីសាំងតិចបំផុតត្រឹម 2.06 លីត្រប៉ុណ្ណោះក្នុងចំងាយផ្លូវ 100 គីឡូម៉ែត្រ។ ចំនែកសាកកន្លែងសាកភ្លើង គឺស្ថិននៅផ្នែកខាងក្រោយចំហោងខាងស្តាំនៃរថយន្តតែម្តង៕
